សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ បន្ទាប់ពីក្រសួងសុខាភិបាលបានរកឃើញករណីវិជ្ជមានកូវីដ-១៩ បុរសជនជាតិខ្មែរ ឈ្មោះ ម៉ី ស៊ីថាន អាយុ២៧ឆ្នាំ រស់នៅភូមិអូរកណ្តៅ ឃុំព្រែកក្របៅ ស្រុកកងមាស ខេត្តកំពង់ចាម ធ្វើការជាគ្រូបង្រៀនម៉ាស្សា នៅសណ្ឋាគារសីញជីងថៃ នៅកែង LV ក្រុងព្រះសីហនុ ខេត្តព្រះសីហនុរួចមក នៅថ្ងៃទី០៨ ខែមីនា ឆ្នាំ២០២១នេះ រដ្ឋបាលខេត្តកំពង់ចាមបានបង្ហាញពីប្រវត្តិនៃការធ្វើដំណើររបស់អ្នកកើតជំងឺកូវីដ-១៩ម្នាក់នេះដែលរស់នៅភូមិអូរកណ្ដៅ ឃុំព្រែកក្របៅ ស្រុកកងមាស ខេត្តកំពង់ចាម ដែលបុគ្គលនេះមានការពាក់ព័ន្ធជាមួយប្រជាពលរដ្ឋនៅស្រុកកងមាស និងស្រុកព្រៃឈរ ពិសេសនៅផ្សារព្រៃទទឹង។
រដ្ឋបាលខេត្តកំពង់ចាមបានបញ្ជាក់ដូចតទៅនេះ ៖ នៅថ្ងៃទី០៣ ខែមីនា ឆ្នាំ២០២១ វេលាម៉ោង១២ថ្ងៃត្រង់ បុរសម្នាក់នេះ បានមកដល់ផ្ទះនៅភូមិអូរកណ្តៅ ឃុំព្រែកក្របៅ ស្រុកកងមាស ខេត្តកំពង់ចាម។ បន្ទាប់ពីទទួលសេចក្តីរាយការណ៍ពីអាជ្ញាធរមូលដ្ឋាន អំពីករណីបុរសម្នាក់មកពីតំបន់មានហានិភ័យខ្ពស់ (ខេត្តព្រះសីហនុ) បានចូលមកស្នាក់នៅក្នុងមូលដ្ឋាន នៅថ្ងៃទី០៥ ខែមីនា ឆ្នាំ២០២១ លោកអភិបាលខេត្ត បានចាត់ឲ្យមន្ត្រីមន្ទីរសុខាភិបាលនៃរដ្ឋបាលខេត្ត បានសហការជាមួយអាជ្ញាធរមូលដ្ឋាន នាំបុរសខាងលើមកធ្វើចត្តាឡីស័កនៅមណ្ឌលចត្តាឡីស័ករបស់រដ្ឋបាលខេត្ត (សណ្ឋាគារមេគង្គ) ក្រុងកំពង់ចាម។
នៅព្រឹកថ្ងៃទី០៦ ខែមីនា ឆ្នាំ២០២១ ក្រុមគ្រូពេទ្យ បានយកសំណាកទៅពិនិត្យ លុះដល់ថ្ងៃទី០៧ ខែមីនា ឆ្នាំ២០២១ បានទទួលលទ្ធផលបញ្ជាក់ពីវិទ្យាស្ថានប៉ាស្ទ័រកម្ពុជា ថាបុរសម្នាក់នេះមានវិជ្ជមានកូវីដ-១៩ និងបានបញ្ជូនទៅព្យាលបាលជំងឺនៅមន្ទីរពេទ្យខេត្តកំពង់ចាម។
ជាមួយគ្នានេះ លោក អ៊ុន ចាន់ដា អភិបាលខេត្តកំពង់ចាម បានចាត់ឲ្យមន្រ្តីសុខាភិបាល ចុះស្រាវជ្រាវបន្ទាន់ពាក់ព័ន្ធនឹងករណីនេះ៖
*ទី១- អំពីប្រវត្តិធ្វើដំណើរបុរសម្នាក់នេះ៖
នៅថ្ងៃទី០៣ ខែមីនា ឆ្នាំ២០២១ បុរសម្នាក់នេះ បានធ្វើដំណើរពីខេត្តព្រះសីហនុ តាមរយៈរថយន្តឈ្នួល (នៅជិតផ្សារពាណិជ្ជកម្ម ម្តុំពេទ្យចម្ការចេក) មករាជធានីភ្នំពេញ។
នៅម៉ោង៧ៈ៣០នាទីយប់ ថ្ងៃទី០៣ ខែមីនា ឆ្នាំ២០២១ បានមកដល់ និងចុះនៅមុខមន្ទីរពេទ្យកាល់ម៉ែត ហើយបានទៅសួរសុខទុក្ខក្មួយប្រុសដែលសម្រាកព្យាបាលជំងឺនៅអគារបេះដូង នៃមន្ទីរពេទ្យកាល់ម៉ែត។
នៅយប់ថ្ងៃដដែលបុរសនេះបានទៅស្នាក់នៅជាមួយបងស្រី (នៅបន្ទប់ជួល នៅស្ទឹងមានជ័យ រាជធានីភ្នំពេញ)។
នៅម៉ោង៧ៈ០០នាទីព្រឹក ថ្ងៃទី០៤ ខែមីនា ឆ្នាំ២០២១ បុរសម្នាក់នេះបានបន្តដំណើរពីស្ទឹងមានជ័យ ទៅមុខវត្ត
កៀនឃ្លាំង ជ្រោយចង្វា និងបានបន្តដំណើរតាមរថយន្តដែលមកខេត្តកំពង់ចាម ដោយបានឈប់នៅស្តុបផ្សារព្រៃទទឹង ឃុំជ្រៃវៀន ស្រុកព្រៃឈរ និងបានបន្តដំណើរតាមម៉ូតូឌុប បន្តរហូតដល់ផ្ទះនៅភូមិអូរកណ្តៅ ឃុំព្រែកក្របៅ ស្រុកកងមាស ខេត្តកំពង់ចាម វេលាម៉ោង១២ថ្ងៃត្រង់។
នៅព្រឹកថ្ងៃទី០៥ ខែមីនា ឆ្នាំ២០២១ បុរសម្នាក់នេះ និងប្អូនប្រុសបានជិះម៉ូតូទៅផ្សារព្រៃទទឹង និងបានដើរផ្សារទិញត្រី និងគ្រឿងធ្វើម្ហូបប្រហែល៣០នាទី មុនត្រឡប់ទៅផ្ទះវិញ។
*ទី២-អ្នកពាក់ព័ន្ធនឹងបុរសនេះ៖
នៅពេលទៅសុខទុក្ខក្មួយប្រុស បានជួបជាមួយស្ត្រី២នាក់កំពុងកំដរអ្នកជំងឺក្នុងនោះម្នាក់រស់នៅភូមិថ្លុកក្រវាន់ ឃុំបុស្សខ្នុរ ស្រុកចំការលើ និងម្នាក់ទៀត រស់នៅភូមិអូរកណ្តៅ ឃុំព្រែកក្របៅ ស្រុកកងមាស ខេត្តកំពង់ចាម (ធ្វើការនៅរោងចក្រកាត់ដេរឌីមហាន់ នៅស្ទឹងមានជ័យ) តែតាំងពីបានជួបបុរសម្នាក់នេះមក គាត់មិនទាន់បានទៅធ្វើការវិញទេ ព្រោះសុំច្បាប់ជាប់រវល់កំដរក្មួយឈឺ។
នៅយប់សម្រាកនៅស្ទឹងមានជ័យ បានជួបជាមួយបងស្រីម្នាក់ និងអ្នកជួលបន្ទប់នៅជិតបន្ទប់ (មិនស្គាល់ឈ្មោះ), អ្នករត់ PassApp (មិនស្គាល់ឈ្មោះអ្នកបើកបរ), អ្នករួមដំណើរតាមរថយន្តឈ្នួលពីភ្នំពេញមកកំពង់ចាម។
ពេលមកដល់ផ្ទះ ជួបជាមួយក្រុមគ្រួសារ (ឪពុក, ម្តាយ, បងថ្លៃប្រុស, បងស្រី, ប្អូនប្រុស, ក្មួយស្រី ២នាក់, ក្មួយប្រុស), អ្នកផ្ញើម៉ូតូនៅផ្សារព្រៃទទឹង និងអ្នកលក់ត្រី និងម្ហូបនៅផ្សារព្រៃទទឹង។
ដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ-១៩ក្នុងសហគមន៍ រដ្ឋបាលខេត្តកំពង់ចាមបានបន្តធ្វើការស្រាវជ្រាវ និងនាំយកអ្នកដែលពាក់ព័ន្ធដោយផ្ទាល់ និងអ្នកមានហានិភ័យខ្ពស់មកធ្វើចត្តាឡីស័កនៅមណ្ឌលចត្តាឡី
ស័ករបស់រដ្ឋបាលខេត្ត ដើម្បីបន្តតាមដានសុខភាព និងយកសំណាកពិនិត្យ។
រដ្ឋបាលខេត្តកំពង់ចាម សូមអំពាវនាវដល់អ្នកដែលពាក់ព័ន្ធនឹងបុរសខាងលើ តាមពេលវេលា និងទីកន្លែងដែលបានបញ្ជាក់ជូនខាងលើ សូមទៅពិនិត្យសុខភាព និងយកសំណាកនៅមន្ទីរពេទ្យបង្អែកដែលនៅជិតផ្ទះ និងត្រូវរាយការណ៍ជូនអាជ្ញាធរមូលដ្ឋានជាបន្ទាន់។ ជាមួយគ្នានេះ សូមអំពាវនាវដល់បងប្អូនដែលពាក់ព័ន្ធទាំងអស់ ត្រូវធ្វើចត្តាឡីស័កឲ្យបានត្រឹមត្រូវ និងអនុវត្តឲ្យបានខ្ជាប់ខ្លួនតាមការណែនាំរបស់មន្ត្រីសុខាភិបាល និងអាជ្ញាធរមូលដ្ឋាន៕
ដោយ៖ វណ្ណៈ
