ក្រុមបាតុករមីយ៉ាន់ម៉ារាប់រយនាក់ ក្រោយកងកម្លាំងសន្តិសុខឡោមព័ទ្ធតាំងតែពីយប់ អនុញ្ញាតឲ្យត្រលប់ទៅផ្ទះពួកគេវិញហើយ

ចែករំលែក៖

អន្តរជាតិ៖ បើតាមការចេញផ្សាយ ដោយសារព័ត៌មាន BBCបាននិយាយថា ក្រុមបាតុករមីយ៉ាន់ម៉ារាប់រយនាក់ ដែលត្រូវបានកងកម្លាំងសន្តិសុខឡោមព័ទ្ធ នៅក្នុងសង្កាត់សានឆង (Sanchaung) នៃទីក្រុងរ៉ង់ហ្គូនតាំងតែពីយប់ថ្ងៃចន្ទទី៨ មីនា ត្រូវបានអនុញ្ញាតឲ្យចាកចេញទៅផ្ទះរបស់ពួកគេវិញហើយ នៅព្រឹកថ្ងៃអង្គារ ទី០៩ ខែមីនា ឆ្នាំ២០២១នេះ។

បើតាមសម្តីបាតុករម្នាក់ ក្នុងចំណោមបាតុករដែលមានគ្នាសរុប ២០០នាក់ ដែលត្រូវបានកងកម្លាំងសន្តិសុខឡោមព័ទ្ធ នៅក្នុងសង្កាត់សានឆង(Sanchaung) នៃទីក្រុងរ៉ង់ហ្គូនកាលពីយប់ថ្ងៃចន្ទម្សិលមិញនេះ បានប្រាប់សារព័ត៌មាន BBC នៅព្រឹកថ្ងៃអង្គារទី០៩ ខែមីនានេះថា៖រូបលោកអាចចាកចេញពីកន្លែងឡោមព័ទ្ធ ក្រោយកងកម្លាំងសន្តិសុខ បានដកចេញនៅព្រឹកមិញនេះ ហេីយមនុស្សសរុប ៤០នាក់ ត្រូវបានចាប់ខ្លួន។ ប៉ុន្តែអ្នកដែលនៅសេសសល់នៅតែបន្តលាក់ខ្លួន រហូតដល់ព្រឹកមិញនេះ ទើបអាចចាកចេញបាន។

ដោយឡែកបាតុករម្នាក់ផ្សេងទៀត ក៏បានសរសេរសារបង្ហោះលើ Twitter ផងដែរថា៖ រូបនាងបានត្រឡប់ទៅដល់ផ្ទះដោយសុវត្ថិភាពបន្ទាប់ពីជាប់ខ្លួនពេញមួយយប់ នៅក្នុងសង្កាត់ សានឆង ហើយអ្នកដែលបានសម្ងំលាក់ខ្លួនជាមួយនាង ក៏មានសុវត្ថិភាពដូចគ្នា។

ជុំវិញករណីនេះដែរ បើតាមលោក អាន់តូនីញ៉ូ ហ្គូទែរែស (Antonio Guterres) អគ្គលេខាធិការអង្គការសហប្រជាជាតិ បាតុករភាគច្រើនដែលត្រូវបានឡោមព័ទ្ធ នៅក្នុងសង្កាត់សានឆង គឺជាស្ត្រីដែលនាំគ្នាចូលរួមក្នុងក្បួនដង្ហែរគាំទ្រដល់ថ្ងៃទិវាសិទ្ធិនារី ៨ មីនា កាលថ្ងៃចន្ទម្សិលមិញ ដែលប្រឆាំងនឹងបម្រាមរបស់អាជ្ញាធរ៕ដោយ៖ស តារា