សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ក្រសួងការបរទេសកូរ៉េខាងត្បូង បានលើកឡើងនៅថ្ងៃទី១២ ខែមីនា ឆ្នាំ២០២១ថា៖ ដើម្បីឆ្លើយតបរដ្ឋប្រហារយោធា និងការបង្រ្កាបយ៉ាងសាហាវឃោរឃៅលើបាតុករពីសំណាក់ក្រុមយោធាមីយ៉ាន់ម៉ា ខ្លួននឹងផ្អាកការផ្លាស់ប្តូរលើវិស័យការពារជាតិ និងហាមឃាត់នាំចេញអាវុធទៅមីយ៉ាន់ម៉ា។ មិនតែប៉ុណ្ណោះកូរ៉េខាងត្បូង ក៏នឹងអនុញ្ញាតឱ្យប្រជាជនមីយ៉ាន់ម៉ាប្រមាណ៣ម៉ឺននាក់បន្តស្នាក់នៅទឹកដីខ្លួនរហូតស្ថានការណ៍ក្នុងស្រុកធូរស្បើយផងដែរ។
ជាក់ស្ដែងកូរ៉េខាងត្បូង នៅថ្ងៃទី១២ ខែមីនា បានប្រកាសសម្រេចចិត្តចាត់វិធានការប្រឆាំងរបបយោធាមីយ៉ាន់ម៉ា បន្ទាប់ពីរដ្ឋប្រហារយោធាកាលពីថ្ងៃទី១ ខែកុម្ភៈ អង្គការក្រៅរដ្ឋាភិបាលមួយចំនួន និងក្រុមប្រឹក្សាសិទ្ធិមនុស្សអង្គការសហប្រជាជាតិ បានអំពាវនាវទៅក្រុមប្រឹក្សាសន្តិសុខនៃអង្គការសហប្រជាជាតិ និងប្រទេសជាដៃគូលក់អាវុធឱ្យមីយ៉ាន់ម៉ាផ្សេងទៀត ដាក់ទណ្ឌកម្មលើរបបសឹកមីយ៉ាន់ម៉ា។
បើតាមទីភ្នាក់ងារព័ត៌មានYonhap ដែលដកស្រង់នៅក្នុងសេចក្ដីថ្លែងការណ៍របស់ក្រសួងការបរទេសកូរ៉េខាងត្បូង បានប្រកាសថា ទីក្រុងសេអ៊ូលនឹងផ្អាកការផ្លាស់ប្តូរទៅវិញទៅមកលើវិស័យការពារជាតិ និងហាមឃាត់នាំចេញអាវុធទៅប្រទេសអាស៊ីគ្នេយ៍មួយនេះ ថែមទៀត។ បន្ថែមពីនេះ រដ្ឋាភិបាលកូរ៉េខាងត្បូង ក៏សម្រេចរឹតត្បិតលើការនាំចេញឧបករណ៍យុទ្ធសាស្រ្តមួយចំនួន និងអនុញ្ញាតឱ្យជនជាតិមីយ៉ាន់ម៉ាបន្តស្នាក់នៅកូរ៉េខាងត្បូងផងដែរ រហូតដល់ស្ថានភាពមានភាពធូរស្បើយ។
ក្រសួងការបរទេសកូរ៉េខាងត្បូង បានបន្ថែមទៀតថា ចំពោះការសម្រេចចិត្តរបស់ខ្លួន ធ្វើឡើងបន្ទាប់ពីរដ្ឋាភិបាលយោធាមីយ៉ាន់ម៉ា មិនស្តាប់តាមការអំពាវនាវរបស់សហគមន៍អន្តរជាតិ និងរដ្ឋាភិបាលទីក្រុងសេអ៊ូល ស្របពេលចំនួនអ្នករងគ្រោះនៅតែបន្តកើនឡើង ដោយសារតែការបង្រ្កាបរបស់ក្រុមកម្លាំងសន្តិសុខ។ មិនត្រឹមតែប៉ុណ្ណោះ រដ្ឋាភិបាលកូរ៉េខាងត្បូង នឹងពិចារណាលើកិច្ចសហប្រតិបត្តិការអភិវឌ្ឍលើវិស័យមួយចំនួនជាមួយមីយ៉ាន់ម៉ាផងដែ។ ការបណ្ដុះបណ្ដាលយោធា និងប៉ូលីស នឹងត្រូវផ្អាកជំនួយទៅរដ្ឋាភិបាលនឹងត្រូវផ្អឹបទុកដូចគ្នា ប៉ុន្តែគម្រោងដែលជួយលើស្ទួយជីវភាពប្រជាជនមីយ៉ាន់ម៉ា និងជំនួយមនុស្សធម៌ ត្រូវរក្សាទុកនៅដដែល។
ដោយឡែកបេីតាមទិន្នន័យអង្គការគំនិតផ្តួចផ្តើមតម្លាភាពជំនួយអន្តរជាតិ បានបញ្ជាក់ថា ការនាំចេញលើវិស័យការពារជាតិពីកូរ៉េខាងត្បូងទៅមីយ៉ាន់ម៉ាចុងក្រោយ គឺនៅឆ្នាំ២០១៩។ កូរ៉េខាងត្បូងបានចំណាយថវិកាជាច្រើនលានដុល្លារលើគម្រោងអភិវឌ្ឍន៍នៅមីយ៉ាន់ម៉ាផងដែរ។
គួររម្លឹកដែរថាថា អាមេរិក កន្លងមកក៏បានហាមឃាត់នាំចេញលើប្រភេទអាវុធជាក់លាក់មួយចំនួន ទៅប្រទេសមីយ៉ាន់ម៉ាផងដែរ ខណៈដែលប្រទេសនូវែលសេឡង់ បានផ្អាកទស្សនកិច្ចកម្រិតខ្ពស់ជាមួយរបបសឹកទៀតផង៕ដោយ៖ស តារា
រូបភាព៖ សកម្មជនកូរ៉េខាងត្បូងតវ៉ាប្រឆាំងរដ្ឋប្រហារនៅមីយ៉ាន់ម៉ា
រូបថត៖ AFP
