សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ អាយុ២៣ឆ្នាំ ជាអ្នករស់នៅសង្កាត់បឹងកេងកង៣ ខណ្ឌបឹងកេងកង នៅយប់ថ្ងៃទី១៤ ខែមីនា ឆ្នាំ២០២១ ត្រូវបានអាជ្ញាធរមូលដ្ឋាន សហការជាមួយក្រុមគ្រូពេទ្យជំនាញ ចុះយកទាំងយប់ក្រោយដឹងថា មានវិជ្ជមានជំងឺកូវីដ-១៩។
យោងតាមរបាយការណ៍របស់សមត្ថកិច្ច បានសង្កត់ធ្ងន់ថា អ្វីដែលកំពុងធ្វើឱ្យមានការបារម្ភខ្លាំងនោះ គឺបុរសរូបនេះបានទៅចូលរួមពិធីមង្គលការមួយនៅស្រុកឈូក ខេត្តកំពត នៅរសៀលថ្ងៃទី១៤ ខែមីនា ឆ្នាំ២០២១។
សូមជម្រាបថា បុរសរូបនោះ កាលពីថ្ងៃទី១២ ខែមីនា ឆ្នាំ២០២១ បានទៅយកសំណាកពិនិត្យរកជំងឺកូវីដ-១៩ នៅមន្ទីរពេទ្យរុស្ស៉ី ដោយសារមានការពាក់ព័ន្ធនឹងអ្នកកើតជំងឺកូវីដ-១៩។ ក្រោយពីយកសំណាករួចហើយបុរសរូបនេះមិនបាននៅធ្វើចត្តាឡីស័កខ្លួនឯងនៅផ្ទះទេ បានធ្វើដំណើរទៅចូលរួមពិធីមង្គលការនៅក្នុងស្រុកឈូក ដោយជួលឡានតាក់ស៊ីហាយឡេនឌ័រមួយគ្រឿង លុះពេលត្រឡប់មកវិញ មានអ្នករួមដំណើរចំនួន៦នាក់។
លុះនៅយប់ថ្ងៃទី១៤ ខែមីនា ឆ្នាំ២០២១នេះ ទេីបព័ត៌មាននេះបែកធ្លាយក៏ផ្អើលឆោរឡោ ភ្លាមៗក្រុមគ្រូពេទ្យបានចុះទៅផ្ទះរបស់គេ បែរជាមិនឃើញរូបគេហើយ ត្រូវបានក្រុមគ្រួសារបញ្ជាក់ថា បុរសរូបនោះ បានទៅចូលរួមពិធីមង្គលការ។
សមត្ថកិច្ច បន្តថា ក្រោយពីបានរកឃើញបុរសរូបនោះ ក្រុមគ្រូពេទ្យបាននាំបុរសកើតជំងឺកូវីដ-១៩នេះ ទៅសម្រាកព្យាបាលនៅសណ្ឋាគារ The Great Duke។ ចំណែកអ្នករួមដំណើរ ០៥នាក់ (ប្រុស) យកទៅធ្វើចត្តាឡីស័ក នៅមណ្ឌលសុខភាពចាក់អង្រែ៕ដោយ៖ស តារា
