ព័ត៌មានទាន់ហេតុការណ៍៖

សមត្ថកិច្ចបញ្ជូនខ្លួនជនសង្ស័យ២នាក់ទៅតុលាការ ពីបទហិង្សាដោយចេតនាមានស្ថានទម្ងន់

ចែករំលែក៖

ខេត្តបាត់ដំបង៖ កម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបាត់ដំបង បានកសាងសំណុំរឿងបញ្ជូនខ្លួនជនសង្ស័យចំនួន០២នាក់ទៅតុលាការ ក្រោយឃាត់ខ្លួនពីបទហិង្សាដោយចេតនាមានស្ថានទម្ងន់ទោស(វាយដោយដំបងដែក)។

លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាលបានអោយដឹងថា ជនសង្ស័យទាំងពីរនាក់មាន៖
១. ឈ្មោះ​ ព្រំ​ សុជាតិ​ ភេទប្រុស​ អាយុ​ ២១​ឆ្នាំ​ មានទីលំនៅ​ ភូមិ​ទួលតាឯក​ សង្កាត់​ទួលតាឯក​ ក្រុងបាត់ដំបង​។
២.ឈ្មោះ​ ខា​ សីហា​ ហៅ​ ទិត្យ​ ភេទប្រុស​ អាយុ​ ១៩​ឆ្នាំ​ មានទីលំនៅ​ភូមិ​អូរតាគាំ១​ សង្កាត់​ទួលតាឯក​ ក្រុងបាត់ដំបង​។

ដែលជនសង្ស័យទាំងពីរនាក់ខាងលើត្រូវបាន លោកវរសេនីយ៍ឯក​ ឈឿង​ គឹមសុង​ នាយការិយាល័យនគរបាល​ព្រហ្មទណ្ឌ​កម្រិត​ស្រាល​ បាន​ដឹកនាំ​កម្លាំង​ក្រុមអន្តរាគមន៍​ បង្ការ​ បង្ក្រាប​ ចុះ​ប្រតិបត្តិការ​ បង្ក្រាប​ឃាត់ខ្លួនកាលពីវេលាម៉ោង ១៤និង៣០​ នាទី​ ថ្ងៃទី១៦ ខែមីនា ឆ្នាំ២០២១នៅ​ចំណុច​ភូមិ​ទួលតាឯក​ សង្កាត់​ទួលតាឯក​ ក្រុងបាត់ដំបង​
ពីបទហិង្សាដោយចេតនាមានស្ថានទម្ងន់ទោស​ (​ វាយ​ដោយ​ដំបង​ដែក​ )​ ។

លោកប្រធានការិយាល័យដដែលបានបញ្ជាក់ថា កាលពីថ្ងៃទី ១៤​ ខែ​ មីនា​ ឆ្នាំ​ ២០២១​ នៅ​ចំណុច​មុខ​ភោជនីយដ្ឋាន​ សាច់អាំង​ផ្សារលេី​២​ ដែល​ស្ថិត​នៅ​ក្នុង​ភូមិ​កម្មករ​ សង្កាត់​ ស្វាយប៉ោ​ ក្រុងបាត់ដំបង​ ជនសង្ស័យ​ទាំង​ ០២​នាក់​ខាង​លេី​បាន​ធ្វេី​សកម្មភាព​ យក​ដំបង​ដែក​ និង​ ខ្សែក្រវ៉ាត់​ក្បាល​ដែក​ វាយ​ទៅ​លេី​ជនរងគ្រោះ​ ឈ្មោះ​ សយ​ វិស័យ​ ភេទប្រុស​ អាយុ​ ១៩​ ឆ្នាំ​ មានទីលំនៅ​ភូមិ​បោះពោធិ៍​ ឃុំ​អូរដំបង​១​ ស្រុក​សង្កែ​ ខេត្ត​បាត់ដំបង​ ដែល​បណ្តាល​ឲ្យ​រងរបួស​ ត្រង់​ក្បាល​ផ្នែក​ខាង​ស្តាំ​ ដេរ​ចំនួន​ ០៣​ ថ្នេរ​ ត្រង់​ក្បាល​ខាង​ឆ្វេង​ ដេរ​ចំនួន​ ០៤​ ថ្នេរ​ រយះ​ចុង​ចិញ្ចេីម​ស្តាំ​ ដេរ​ចំនួន​ ០៤​ ថ្នេរ​ និង​ ហេីម​ប៉ោង​ភ្នែក​ខាង​ស្តាំ​ ។

ក្រោយពេលកើតហេតុជនសង្ស័យបានព្យាយាមគេចខ្លួន តែក្រោយមកត្រូវបានសមត្ថកិច្ចជំនាញចុះស្រាវជ្រាវរហូតឈានឃាត់ខ្លួនបាន និងកំពុងរៀបចំសំណុំរឿងបញ្ជូនទៅសាលាដំបូងខេត្តបាត់ដំបងដើម្បីចាត់ការបន្ត​តាម​នីតិវិធីច្បាប់​ ៕

ដោយ៖ចន្ទ លីហ្សា


ចែករំលែក៖