ការជួយពលរដ្ឋក្រីក្រ និងផ្តល់ការអប់រំដល់កុមារជួយឱ្យអ្នកស្រី ផាន់ លក្ខិណា ជាប់វគ្គផ្តាច់ព្រ័ត្រនៃកម្មវិធីពានរង្វាន់ពលរដ្ឋគំរូ Smart

ចែករំលែក៖

ភ្នំពេញ៖ ថ្ងៃទី២៤ ខែមីនា ឆ្នាំ២០២១ ការជួយកុមារក្រីក្រឱ្យទទួលបានការសិក្សាដោយឥតគិតថ្លៃ និងការជួយសង់ផ្ទះឱ្យពលរដ្ឋគ្មានផ្ទះសម្បែង គឺជាអំពើល្អដែលជួយឱ្យអ្នកស្រី ផាន់ លក្ខិណា ត្រូវបានជ្រើសតាំងជាបេក្ខនារីមួយរូបក្នុងកម្មវិធីពានរង្វាន់ពលរដ្ឋគំរូSmart ឆ្នាំ២០២០។

ឥឡូវនេះ អ្នកស្រីបានជាប់ជាបេក្ខនារីម្នាក់ក្នុងចំណោមបុគ្គលដែលត្រូវបានជ្រើសតាំង ១០នាក់សម្រាប់វគ្គផ្តាច់ព្រ័ត្រនៃកម្មវិធីពានរង្វាន់ពលរដ្ឋគំរូនេះ ហើយបើអ្នកស្រីត្រូវបានគេជ្រើសរើសជាអ្នកទទួលជ័យលាភី អ្នកស្រីនឹងទទួលបានប្រាក់រង្វាន់ចំនួន ១ម៉ឺនដុល្លារ។

អ្នកស្រី ផាន់ លក្ខិណា ដែលកើតក្នុងគ្រួសារក្រីក្រក្នុងរាជធានីភ្នំពេញ គឺជាអតីតបុគ្គលិករបស់អង្គការមិនមែនរដ្ឋាភិបាលរយៈពេល១០ឆ្នាំ។ ក្នុងអំឡុងពេលបំពេញការងារ អ្នកស្រីតែងតែងស្រម៉ៃចង់មានឱកាសមួយដើម្បីជួយយកអាសារពលរដ្ឋដែលជួបការលំបាក។

ជាក់ស្តែង ក្រោយការចាកចេញពលរដ្ឋសហគមន៍ដីក្រហមក្នុងរាជធានីភ្នំពេញនៅឆ្នាំ២០០៩ អ្នកស្រីជាមួយនឹងស្វាមីបានជួយពួកគេបន្ទាប់ពីពលរដ្ឋទាំងនោះបានផ្លាស់ប្តូរទីលំនៅទៅរស់នៅក្នុងភូមិស្រះពោធិ៍ ឃុំភ្នំបាទ ស្រុកពញាឮ ខេត្តកំពង់ស្ពឺ ឬហៅថាសហគមន៍តង់ខៀវ។

អ្នកស្រីបានថ្លែងថា៖ “នៅពេលនោះយើងបានជួយពួកគាត់ក្នុងនាមពួកខ្ញុំជាសប្បុរសជន។ ខ្ញុំបានចំណាយថវិកាផ្ទាល់ខ្លួន និងរៃអង្គាសប្រាក់ពីមិត្តភក្តិដើម្បីទិញសំពត់តង់ចែកជូនដល់ពលរដ្ឋទាំងនោះដោយសារឃើញពួកគាត់មានការលំបាក”។

នៅដើមឆ្នាំ២០១១ ដោយទទួលបានជំនួយពីសប្បុរសជននៅប្រទេសអូស្រ្តាលី អ្នកស្រីបានមកបង្កើតអង្គការមួយឈ្មោះថាអង្គការម៉ាណាជីវិត ជាមួយស្វាមីរបស់អ្នកស្រី។ ក្រោយមក អង្គការរបស់អ្នកស្រីក៏ទទួលបានជំនួយបន្ថែមពីព្រះវិហារគ្រីស្ទសាសនានៅប្រទេសកាណាដា និងណូវែលសេឡង់។

អ្នកស្រីបន្ថែមថា៖ “ខ្ញុំកើតក្នុងគ្រួសារក្រីក្រ។ នៅពេលខ្ញុំឃើញពួកគាត់លំបាក វាធ្វើឱ្យខ្ញុំនឹកឃើញអតីតកាលរបស់ខ្ញុំុ។ ដូច្នេះ ខ្ញុំគិតថាពួកគាត់គួរទទួលបានជំនួយដូចជាផ្ទះជាដើម។ ដូច្នេះខ្ញុំបានសម្រេចចិត្តបើកអង្គការនេះឡើងដើម្បីជួយពួកគាត់”។

បន្ទាប់មក អង្គការរបស់អ្នកស្រីបានសាងសង់កូនផ្ទះតូចៗចំនួន ៩៣ខ្នងជូនពលរដ្ឋសហគមន៍តង់ខៀវ និងអតីតពលរដ្ឋសហគមនបុរីកីឡា ដែលគម្រោងនេះបានបញ្ចប់នៅឆ្នាំ២០១៣ ហើយក្នុងពេលជាមួយគ្នានោះដែរក៏មានការបើកវគ្គបង្រៀនកុំព្យូទ័រដល់កុមារផងដែរ។

អ្នកស្រី ធី ស្រី អាយុ ៤៣ឆ្នាំ ដែលបានចាកចេញពីសហគមន៍ដីក្រហមទៅរកនៅក្នុងសហគមន៍តង់ខៀវ បានថ្លែងថា អ្នកស្រីនិងក្រុមគ្រួសារជួបការលំបាកខ្លាំងនៅពេលរស់នៅក្នុងសហគមន៍តង់ខៀវដំបូង។

អ្នកស្រីថ្លែងថា៖ “កាលពីពួកយើងមករស់នៅទីនេះដំបូង យើងរស់នៅក្នុងខ្ទមដែលយកឈើគងលើគ្នា ហើយប្រក់សំពត់តង់។ គាត់ [អ្នកស្រី ផាន់ លក្ខិណា] ជួយសង់ផ្ទះឱ្យយើង”។

ក្រោយមកដើម្បីជួយដល់កុមារក្រីក្រនៅក្នុងតំបន់នោះឱ្យទទួលបានការសិក្សាចំណេះទូទៅ អង្គការរបស់អ្នកស្រីបានបង្កើតសាលារៀនមួយឈ្មោះថា សាលារៀនដើមស្វាយ នៅឆ្នាំ២០១៤ ដែលផ្តល់ការសិក្សាពីថ្នាក់ទី១ ដល់ទី ៦។

សាលាដើមស្វាយបានផ្តល់ការសិក្សាដល់សិស្សចំនួន ៣១៩ នាក់ក្នុងពេលបើកដំណើការពីឆ្នាំ២០១៤ ដល់២០១៩។ ជាអកុសល សាលាចំណេះទូទៅមួយនេះបានបិទនៅឆ្នាំ២០១៩ ដោយសារកង្វះខាតមូលនិធិ។

សម្រាប់ឆ្នាំសិក្សា២០២១នេះ អង្គការម៉ាណាជីវិតបានផ្តល់ការសិក្សាដល់សិស្សចំនួន៦៥ នាក់ តាមរយៈការផ្តល់អាហារូបករណ៍ដល់ពួកគេពី ៥០% ទៅ ១០០% ឱ្យទៅរៀននៅសាលាឯកជន។ ចំពោះគ្រួសារណាដែលមានការខ្វះខាតខ្លាំង អង្គការរបស់អ្នកស្រីក៏ផ្តល់ការឧបត្ថម្ភជាសាច់ប្រាក់ និងអង្ករផងដែរ។

អង្គការក៏ទទួលបានមូលនិធិពីសប្បុរសជនមួយចំនួនទៀតផងដែរ។ អ្នកស្រី លក្ខិណាបានអំពាវនាវស្វែងរកជំនួយបន្ថែមទៀត ដើម្បីរក្សានិរន្តរភាពរបស់អង្គការ។ មានពេលខ្លះ អ្នកស្រីចំណាយថវិកាផ្ទាល់ខ្លួនដែលជាប្រាក់ចំណូលរបស់គ្រួសារ ដើម្បីរក្សាលំនឹងរបស់អង្គការក្នុងពេលខ្វះខាតមូលនិធិ ជាពិសេសក្នុងពេលកើតមានជំងឺកូវីដ-១៩ ដែលសប្បុរជននិងព្រះវិហារដែលជាម្ចាស់ជំនួយបានផ្អាកនិងកាត់បន្ថយជំនួយ។

អំពើល្អទាំងនេះហើយដែលឆ្លើយតបទៅនឹងកម្មវិធីពានរង្វានពលរដ្ឋគំរូ Smart ដែលជាផ្នែកមួយនៃយុទ្ធនាការ «ឆ្ពោះទៅមុខរួមគ្នា» របស់ក្រុមហ៊ុន Smart Axiata ដែលបានចាប់ផ្តើមនៅថ្ងៃទី២៣ ខែវិច្ឆិកា ឆ្នាំ២០២០។ កម្មវិធីនេះមានបំណងស្វែងរកពលរដ្ឋកម្ពុជាដែលបានធ្វើសកម្មភាពល្អៗក្នុងការជួយប្រទេសជាតិ អ្នកជិតខាង និងសហគមន៍របស់ខ្លួន។

ការប្រកាសជ័យលាភីរបស់កម្មវិធីពលរដ្ឋគំរូ Smart ដែលដើមឡើយគ្រោងធ្វើនៅថ្ងៃទី២៧ មីនា ឆ្នាំ២០២១ ត្រូវបានពន្យាពេលដោយសារការរាតត្បាតជំងឺកូវីដ–១៩។ កាលបរិច្ឆេទថ្មីនឹងត្រូវជូនដំណឹងនៅពេលក្រោយ។

ដើម្បីចូលមើលវីដេអូអំពីអ្នកស្រី ផាន់ លក្ខិណា សូមចុចលើតំណភ្ជាប់ (Link) នេះ៖ https://www.facebook.com/watch/?v=736701273670822

សម្រាប់ព័ត៌មានបន្ថែម សូមតាមដានទំព័រហ្វេសប៊ុករបស់ក្រុមហ៊ុនSmart តាមរយៈ www.facebook.com/smartforcambodia ឬចូលទៅកាន់គេហទំព័រ www.smart.com.kh។

អំពីក្រុមហ៊ុន Smart

ក្រុមហ៊ុន Smart Axiata Co., Ltd. ជាប្រតិបត្ដិករទូរគមនាគមន៍ចល័តឈានមុនគេក្នុងព្រះរាជាណាចក្រកម្ពុជា។ បច្ចុប្បន្នក្រុមហ៊ុនបាននិងកំពុងបម្រើអតិថិជនចំនួន ៨ លាននាក់ ស្ថិតក្រោមស្លាកសញ្ញា “Smart”។ Smart Axiata គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ មានឈ្មោះថា “Axiata Group Berhad” ដែលជាក្រុមហ៊ុនផ្ដល់សេវាទូរគមនាគមន៍ធំជាងគេបង្អស់មួយក្នុងទ្វីបអាស៊ី។

ក្រុមហ៊ុន Smart គឺជាប្រតិបត្តិករទូរគមនាគមន៍ចល័តដែលមានភាពឈានមុខគេបង្អស់ផ្នែកសេវាបច្ចេកវិទ្យាទំនើបទាន់សម័យក្នុងព្រះរាជាណាចក្រកម្ពុជា។ ក្រុមហ៊ុន Smart គឺជាប្រតិបត្ដិករដំបូងបង្អស់ដែលបានដាក់ឱ្យដំណើរការសេវាបច្ចេកវិទ្យាជំនាន់ទី៤ “4G LTE” ក្នុងឆ្នាំ២០១៤ បច្ចេកវិទ្យា4G+ ក្នុងឆ្នាំ២០១៦ បច្ចេកវិទ្យា 4G+ ជាមួយ HD Voice (VoLTE) និង4.5G ក្នុងឆ្នាំ២០១៧។ នៅពាក់កណ្តាលឆ្នាំ២០១៩ Smart បានរៀបចំកម្មវិធីបង្ហាញសាកល្បងបច្ចេកវិទ្យាជំនាន់ទី៥ “5G” ដំបូងគេបង្អស់នៅកម្ពុជាដោយបង្ហាញពីភាពជាអ្នកដឹកនាំផ្នែកសេវាទិន្នន័យចល័ត។ ក្រុមហ៊ុន Smart ក៏មានផ្ដល់នូវបច្ចេកវិទ្យាទូរស័ព្ទចល័តដ៏សម្បូរបែបរួមមាន៖ សេវាបច្ចេកវិទ្យា 2G, 2.5G, 3G និង3.75G ក៏ដូចជាសេវាកម្មទូរស័ព្ទក្រៅប្រទេស (Roaming) ដែលអាចប្រើបានច្រើនជាង ១៩០ប្រទេស។ Smart បាននិងកំពុងផ្តល់សេវាគ្របដណ្តប់ក្នុងតំបន់ប្រជាសាស្ត្រច្រើនជាង ៩៩% (កៅសិបប្រាំបួន) ភាគរយ នៅទូរទាំងព្រះរាជាណាចក្រកម្ពុជា ។

ក្រុមហ៊ុនក៏កំពុងបម្លែងខ្លួនយ៉ាងសកម្មទៅជាប្រតិបត្តិករបែបឌីជីថល តាមរយៈការផ្ដល់នូវសេវាកម្ម និងកម្មវិធីកម្សាន្តលក្ខណៈស៊ីវិល័យប្រកបដោយភាពច្នៃប្រឌិតជាច្រើន។ នេះរួមបញ្ចូលភាពជាដៃគូជាមួយភាគីអន្តរជាតិនានាដូចជា៖ ក្រុមហ៊ុន Universal Music ក្រុមហ៊ុន Apple និង ក្រុមហ៊ុនFacebook ក៏ដូចជាសេវាកម្មឌីជីថលនានា រួមមាន៖ សេវាធានារ៉ាប់រងជីវិតឆ្លាតវ័យ សេវា SmartPay សេវា Pleng by Smart សេវា GigaGigs by Smart សេវា Pi Pay និងសេវា SmartNas។ ក្រុមហ៊ុន Smart មានចក្ខុវិស័យក្លាយជាក្រុមហ៊ុនលេខ១ និងជាក្រុមហ៊ុនបច្ចេកវិទ្យាទូរគមនាគមន៍ដែលទទួលបានកី្ដស្រលាញ់ពេញចិត្តបំផុតនៅព្រះរាជាណាចក្រកម្ពុជានៅត្រឹមឆ្នាំ២០២២ តាមរយៈកម្មវិធីទំនួលខុសត្រូវខ្ពស់លើកិច្ចការងារសង្គម និងកម្មវិធីនិរន្តរភាពនានាសម្រាប់កំណើនសេដ្ឋកិច្ច និងសង្គមជាតិ។

ក្រុមហ៊ុន Smart មានបុគ្គលិកនិយោជិតសរុបប្រមាណជាង ១.០០០ (មួយពាន់) នាក់ ក្នុងនោះរួមបញ្ចូលទាំងនិយោជិតក្នុងស្រុក និងនិយោជិតបរទេសដែលកំពុងខិតខំប្រឹងប្រែងឆ្ពោះទៅសម្រេចបេសកកម្មរួមគ្នាក្នុងការផ្សារភ្ជាប់ និងធ្វើឱ្យជីវិតកាន់តែប្រសើរឡើង។ Smart ជីវិតរស់រវើក!