សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារព័ត៌មាន Reuters នៅព្រឹកថ្ងៃសៅរ៍ ទី០៣ ខែមេសា ឆ្នាំ២០២១នេះ បានចុះផ្សាយថា រដ្ឋអាជ្ញាកោះតៃវ៉ាន់ កំពុងទាមទារឲ្យមានដីកាចាប់ខ្លួន អ្នកគ្រប់គ្រងការដ្ឋានសំណង់មួយកន្លែង ដែលត្រូវបានគេសង្ស័យថា មានជាប់ពាក់ព័ន្ធនឹងការធ្វេសប្រហែស ជាដើមហេតុបង្កឱ្យមានគ្រោះថ្នាក់ រថភ្លើងរអិលធ្លាក់ចេញផ្លូវដែក បណ្ដាលឲ្យមនុស្សយ៉ាងហោចណាស់ ៥០នាក់បានស្លាប់។
បើតាមអាជ្ញាធរតៃវ៉ាន់ គ្រោះថ្នាក់រថភ្លើងដ៏អាក្រក់បំផុតនៅក្នុងរយៈពេលជាង ៧ទសវត្សរ៍មកនេះ បានកើតឡើងបន្ទាប់ពីរថភ្លើងល្បឿនលឿនមួយ ខ្សែបុកជាមួយឡានធុនធ្ងន់មួយគ្រឿង នៅកែ្បរការដ្ឋានសំណង់មួយ ដែលស្ថិតនៅជិតផ្លូវដែក ដែលជាហេតុធ្វើឱ្យរថភ្លើងនេះធ្លាក់ចេញពីផ្លូវដែក។ ខណៈដែលគេសង្ស័យថា អ្នកគ្រប់គ្រងការដ្ឋានសាងសង់នេះ បានបរាជ័យក្នុងការអនុវត្តបទដ្ឋានសុវត្ថិភាព។
ដោយឡែក ប្រធានរដ្ឋអាជ្ញានៃទីក្រុង ហ័រលៀន (Hualien) លោកស្រី យូ ស៊ូទ័ន (Yu Hsiu-duan) បានប្រាប់អ្នកសារព័ត៌មានថា ក្រុមការងាររបស់លោកស្រី កំពុងស្វែងរកដីកាចាប់ខ្លួនមួយ ហើយបច្ចុប្បន្នបញ្ហាទាំងឡាយកំពុងត្រូវបាន ដោះស្រាយតាមប្រព័ន្ធតុលាការ។
ចំណែកអាជ្ញាធរតៃវ៉ាន់ បានបញ្ជាក់ដែរថា រថភ្លើងខាងលើមានគោលដៅធ្វើដំណើរ ចេញពីទីក្រុងតៃប៉ិឆ្ពោះទៅកាន់ទីក្រុងតៃតាំង (Taitung) ប៉ុន្តែបានធ្លាក់ចេញពីផ្លូវក្នុងរូងក្រោមដីមួយកន្លែង ក្បែរទីក្រុងហ័រលៀន (Hualien) ដែលបណ្តាលឲ្យទូររថភ្លើងមួយចំនួន ខ្ទាតទៅបុកនឹងជញ្ជាំងរូងក្រោមដីនោះ ខណៈរថភ្លើងខាងលើនេះបានដឹកមនុស្សជិត ៥០០នាក់នៅពេលកើតហេតុ។
ជុំវិញករណីនេះដែរ ប្រធានាធិបតីតៃវ៉ាន់លោកស្រី ត្សៃ អ៊ីងវិន (Tsai Ing-wen) នឹងត្រូវធ្វើដំណើរទៅកាន់ទីក្រុង Hualien នៅថ្ងៃសៅរ៍នេះ ដើម្បីសួរសុខទុក្ខអ្នករងរបួស ដែលកំពុងសម្រាកព្យាបាលក្នុងមន្ទីរពេទ្យ។ ទន្ទឹមនឹងនេះរដ្ឋាភិបាលតៃវ៉ាន់ ក៏បានបង្គាប់ឲ្យបង្ហូតទង់ជាតិត្រឹមពាក់កណ្ដាល ដើម្បីកាន់ទុក្ខដល់អ្នកបាត់បង់ជីវិត សម្រាប់រយៈពេល ០៣ថ្ងៃផងដែរ។
ដោយឡែកបេីតាមការបញ្ជាក់ពីខាងសេវាអគ្គិភ័យរបស់កោះមួយនេះ ក៏បានអះអាងពីចំនួនស្លាប់រហូតមកទល់ពេលនេះ ៥១នាក់ រួមមាន៖ អ្នកបើករថភ្លើងវ័យក្មេងដែលទើបរៀបការ និងអ្នកបើកជំនួយរបស់គាត់។ រីឯផ្នែកគ្រោះមហន្តរាយវិញ បាននិយាយថា វាជាគ្រោះថ្នាក់ដ៏អាក្រក់បំផុតនៅរយៈពេល៧៣ឆ្នាំមកនេះ៕
ដោយ៖ស តារា
