សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានការភ្ញាក់ផ្អើលដល់អ្នកភូមិនិងអ្នកធ្វើដំណើរចោមរោមមើលនិងរាយការណ៍ទៅសមត្ថកិច្ចបន្ទាប់ពីមាន រថយន្តធុនធំសង្ស័យជាន់ហ្វ្រ័ងមិនសុីទើបរេចង្កូតធ្លាក់ផ្លូវទៅបុកសំយាបផ្ទះប្រជាពលរដ្ឋ តែសំណាងល្អមិនមានបង្កគ្រោះថ្នាក់ដល់មនុស្ស។
ហេតុការណ៍នេះបានកើតឡើងកាលពីវេលាម៉ោង១១និង៤០នាទីថ្ងៃត្រង់ទី៧ ខែមេសាឆ្នាំ២០២១នៅលេីផ្លូវជាតិលេខ១ ត្រង់ចន្លោះគីឡូម៉ែត្រលេខ១៣៦និង១៣៧ ស្ថិតក្នុងភូមិ ប្រសូតិ២ ឃុំកណ្តៀងរាយ ស្រុក ស្វាយទាប ខេត្តស្វាយរៀង។
យោងតាមសមត្ថកិច្ចបានឱ្យដឹងថាផ្ទះដែលរងការខូចខាតមានម្ចាស់ឈ្មោះ តូច គន្ធា ភេទស្រី អាយុ ៥៨ឆ្នាំ និងសំយាបផ្ទះមួយទៀតមានម្ចាស់ឈ្មោះ ពិន ចាន់ថន ភេទប្រុស អាយុ៣៩ឆ្នាំ មុខរបរលក់ចាបហួយ បណ្តាលឲ្យខូចសំយាបផ្ទះ និងអីវ៉ាន់លក់ដូរមួយចំនួនធំ។
ចំណែកអ្នកបើករថយន្តបង្កហេតុមិនត្រូវបានស្គាល់ឈ្មោះនោះទេ ព្រោះក្រោយកើតហេតុគាត់បានដាក់មេប្រូចបាត់បន្សល់ទុកតែរថយន្តធំ(បែនដឹកថ្ម) ពណ៌ ទឹកប្រាក់ គ្មានស្លាកលេខនៅនឹងកន្លែង។
តាមអ្នកភូមិបានឱ្យដឹងថា មុនកើតហេតុមានរថយន្តធុនធំ(បែនដឹកថ្ម) ពណ៌ ទឹកប្រាក់ គ្មានស្លាកលេខបើកក្នុងទិសដៅពីលិចទៅកើតលើផ្លូវជាតិលេខ១ ខណៈនោះស្រាប់តែរថយន្តរេចង្កូតធ្លាក់ផ្លូវ បណ្តាលឱ្យបុកចូលសំយាបផ្ទះប្រជាពលរដ្ឋទាំង២គ្រួសារយ៉ាងពេញទំហឹងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរចោមរោមមើលនិងរាយការណ៍ទៅសមត្ថកិច្ចមកធ្វើអន្តរាគមន៍តែម្ដង។
បើតាមសមត្ថកិច្ចនគរបាលបានបញ្ជាក់ថា មូលហេតុដោយសារតែរថយន្តបានរលត់ម៉ាសុីនបញ្ជាលែងបានទើបបង្កឱ្យមានករណីគ្រោះថ្នាក់ចរាចរណ៍បែបនេះ៕
ដោយ៖យឹម សុថាន
