សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ គេហទំព័រឈ្មោះ K01 ធីវីអនឡាញ ដោយម្ចាស់អាជ្ញាបណ្ណបានផ្សព្វផ្សាយ ព័ត៌មានញុះញង់ មានចេតនាទុច្ចរិតបង្កចលាចលក្នុងសង្គម ដែលបំពានលើវិជ្ជាជីវៈសារព័ត៌មាន និងកិច្ចសន្យាអាជីវកម្មត្រូវបានលោក ខៀវ កាញារីទ្ធ រដ្ឋមន្ដ្រីក្រសួងព័ត៌មាន បានសម្រេចលុបអាជ្ញាបណ្ណ។
យោងតាមសេចក្ដីសម្រេចរបស់ក្រសួងព័ត៌មានបញ្ជាក់ ក្នុងប្រការ១ បានបញ្ជាក់យ៉ាងដូច្នេះថា «លុបប្រកាសលេខ២៦៨ព.ម.ប្រក ចុះថ្ងៃទី២២ ខែសីហា ឆ្នាំ២០១៨ របស់ក្រសួងព័ត៌មានស្តីពីការអនុញ្ញាតឲ្យលោក ឃឿន សុឡា សញ្ជាតិខ្មែរ កាន់អត្តសញ្ញាណបណ្ណលេខ០១១២៤១២៧៣ ចុះថ្ងៃទី១២ ខែកក្កដា ឆ្នាំ២០១៦ អាសយដ្ឋានស្នាក់នៅផ្ទះលេខ៨៤ ផ្លូវលេខ២៦៥ ភូមិ១៣សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ បើកអាជីវកម្មគេហទំព័រឈ្មោះ K01 ធីវីអនឡាញ www.k01tvonline.com ដោយម្ចាស់អាជ្ញាបណ្ណ បានផ្សព្វផ្សាយព័ត៌មានញុះញង់ មានចេតនាទុច្ចរិតបង្កចលាចលក្នុងសង្គម ដែលបំពានលើវិជ្ជាជីវៈសារព័ត៌មាន និងកិច្ចសន្យាអាជីវកម្មដែលសាមីខ្លួនបានតម្កល់ទុកនៅក្រសួងព័ត៌មាន»។
ការសម្រេចលុបអាជ្ញាបណ្ណផ្សព្វផ្សាយព័ត៌មានរបស់ K01ដោយក្រសួងព័ត៌មាន ធ្វើឡើងបន្ទាប់លោក ឃឿន សុឡា ហៅ K01 បានផ្សព្វផ្សាយ និងចែកចាយវីដេអូមួយចំនួន ដែលត្រូវបានចាត់ទុកថា មានលក្ខណៈញុះញង់ និងបង្កចលាចលនៅក្នុងសង្គម គ្រាដែលកម្ពុជាកំពុងប្រយុទ្ធប្រឆាំងជាមួយជំងឺកូវីដ-១៩។
ភ្លាមៗបន្ទាប់ពីការថ្លែងរបស់សម្ដេចតេជោ ហ៊ុន សែន លោក ឃឿន សុឡា ក៏បានចេញមកសុំទោសជាសាធារណៈ ពិសេសសុំទោសសម្ដេចតេជោ ហ៊ុន សែន ចំពោះអ្វីដែលខ្លួនបានប្រព្រឹត្តិខុសឆ្គងនាពេលកន្លងទៅ ហើយក៏បានលុបវីដេអូដែលខ្លួនបានបង្ហោះនោះផងដែរ។
លោក ផុស សុវណ្ណ ប្រតិភូរាជរដ្ឋាភិបាល ទទួលបន្ទុកអគ្គនាយក អគ្គនាយកដ្ឋានព័ត៌មាននិងសោតទស្សន៍ នៃក្រសួងព័ត៌មាន បានប្រាប់អង្គភាព”នគរដ្រេហ្គននិងកាសែតនគរវត្ត” នៅរសៀលថ្ងៃទី១០ ខែមេសា ឆ្នាំ២០២១ ថា, លោក k01 មានកំហុសចំនួនពីរដងរួចមកហើយ ក្នុងនោះខាងក្រសួងក៏បានធ្វើការណែនាំ ប៉ុន្តែគាត់នៅតែប្រព្រឹត្តដដែល ទើបលើកទី៣នេះ លោករដ្ឋមន្ត្រីសម្រេចលុបអាជ្ញាប័ណ្ណចោល៕
ដោយ៖ សុខ ខេមរា
