សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ លោកវរសេនីយ៍ឯក ឈឿង គឹមសុង នាយការិយាល័យ នគរបាលព្រហ្មទណ្ឌកម្រិតស្រាល បានដឹកនាំកម្លាំងក្រុមអន្តរាគមន៍ បង្ការ បង្ក្រាប ចុះប្រតិបត្តិការ បង្រ្កាបករណីលួចម៉ូតូ ០១ ករណី និងបានធ្វើការឃាត់ខ្លួនជនសង្ស័យម្នាក់ខណ:តដៃសមត្ថកិច្ចបណ្តាលឲ្យរបួសសមត្ថកិច្ចម្នាក់។
ប្រតិបត្តិការបង្រ្កាបចោរលួចម៉ូតូនេះបានប្រព្រឹត្តទៅកាលពីរសៀលថ្ងៃទី ១៩ ខែ មេសា ឆ្នាំ ២០២១ នៅចំណុចភូមិវត្តរំដួល សង្កាត់ចំការសំរោង ក្រុងបាត់ដំបង ខេត្តបាត់ដំបង។
ជនសង្ស័យឈ្មោះ ភាព សុភា ហៅ តូច ភេទប្រុស អាយុ ២៥ ឆ្នាំ មានទីលំនៅមិនពិតប្រាកដ បានបញ្ជូនមកកាន់សស្នងការដ្ឋាននគរបាលខេត្តដើម្បីចាត់ការតាមច្បាប់។
លោកវរសេនីយ៍ឯក ឈឿង គឹមសុងបានមានប្រសាសន៍ថា កាលពីថ្ងៃទី ១៨ ខែ មេសា ឆ្នាំ ២០២១ វេលាម៉ោង ១៩:៤០ នាទី នៅចំណុចភូមិអូរចារ សង្កាត់អូរចារ ក្រុងបាត់ដំបង ខេត្ត បាត់ដំបង ជនសង្ស័យនេះ បានធ្វើសកម្មភាព ដើរតាមផ្លូវជាតិលេខ៥ រួចក៏បានលួចយកម៉ូតូរបស់ជនរងគ្រោះឈ្មោះ ហួន យឿម ភេទប្រុស អាយុ ៦០ ឆ្នាំ មានទីលំនៅ ភូមិអូរចារ សង្កាត់ អូរចារ ក្រុងបាត់ដំបង ខេត្តបាតបាត់ដំបង ខណ:ដែលជនរងគ្រោះកំពុងចុះពីលើម៉ូតូដើរទៅបត់ជើង ។ជនសង្ស័យក៏បានជិះម៉ូតូរត់គេចខ្លួនបាត់ រហូតមកដល់ថ្ងៃទី ១៩ ខែ មេសា ឆ្នាំ ២០២១ វេលាម៉ោង ០៣:១០ នាទីរសៀល ទើបកម្លាំងសមត្ថកិច្ចយើងស្រាវជ្រាវដឹងធ្វើការនាំខ្លួនជនសង្ស័យនេះមកសាកសួរ ប៉ុន្តែជនសង្ស័យបានតដៃមកលើសមត្ថកិច្ចដែលកំពុងប្រតិបត្តិការ បណ្តាលឲ្យកម្លាំងសមត្ថកិច្ចយើង លោក ព្រិន្ទបាលទោ សុង ហាក់ រងរបួសបាក់ម្រាម ប្រអប់ដៃខាងឆ្វេង ។
លោកមានប្រសាសន៍ទៀតថាវត្ថុតាងដកហូតរួមមាន ៖ ម៉ូតូ ០១ គ្រឿងម៉ាកហុងដាឌ្រីម សេ ១២៥ ពណ៌ខ្មៅ ស៊េរីឆ្នាំ ២០១២ បិតតែម ឆ្នាំ ២០១៥ គ្មានស្លាកលេខ ជារបស់ជនរងគ្រោះ ត្រូវបានប្រគល់ឲ្យជនរងគ្រោះវិញ ឯជនសង្ស័យបានកសាងសំណុំរឿងបញ្ជូនទៅសាលាដំបូងខេត្តបាត់ដំបងចាត់ការតាមច្បាប់៕
ដោយ ៖ ប្រាថ្នា
