សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ បេីយោងតាមការបញ្ជាក់ពីមន្រ្តីនគរបាល ប៉ុស្តិ៍រដ្ឋបាលឃុំដំរីស្លាប់ បានប្រាប់ឲ្យដឹងនៅថ្ងៃទី២៨ ខែមេសា ឆ្នាំ២០២១នេះថា៖ ពលរដ្ឋម្នាក់ រស់នៅចំណុចឃុំដំរីស្លាប់ ស្រុកកំពង់ស្វាយ បានស្លាប់ និងសត្វគោចំនួន ៧ក្បាល បានងាប់ក្នុងករណី គ្រោះធម្មជាតិ ដោយសារតែរន្ទះបាញ់ លាយឡំនិងខ្យល់កន្ត្រាក់កាលពីថ្ងៃទី២៧ ខែមេសាម្សិលមិញនេះ ។
មន្ត្រីនគរបាលដដែល បានបន្តថា ជនរងគ្រោះស្លាប់នោះ ឈ្មោះ សៀង ឈឿន ភេទប្រុស អាយុ៥៥ឆ្នាំ មានទីលំនៅភូមិ ល្វាជោម ឃុំត្រពាំងឫស្សី ស្រុកកំពង់ស្វាយ។
ប្រភពដដែល បន្ថែមទៀតថា មុនពេលកេីតហេតុ នៅវេលាម៉ោង១២ថ្ងៃត្រង់ខាងលេីនេះ មានករណីខ្យល់កន្ត្រាក់កើតឡើងនៅចំណុចឃុំដំរីស្លាប់ ស្រុកកំពង់ស្វាយដែលបណ្តាលឱ្យរបើកទាំងស្រុងដំបូលផ្ទះ ប្រជាពលរដ្ឋចំនួន ១ខ្នង។ លុះនៅវេលាម៉ោង ៤និង២៤នាទី រសៀលថ្ងៃដដែល មានករណីរន្ទះបាញ់មួយ បានកើតឡើងស្ថិតនៅល្វាជោម និងភូមិក្រសាំង ឃុំត្រពាំងឫស្សី ស្រុកកំពង់ស្វាយ បណ្តាលឲ្យមនុស្សម្នាក់ស្លាប់ និងសត្វគោចំនួន ៧ ក្បាលបានងាប់ ដោយសាររន្ទះបាញ់។
ក្រោយកើតហេតុ កម្លាំងនគរបាលជំនាញខាងកោសលវិច័យ បានចុះត្រួតពិនិត្យកន្លែងកើតហេតុ ដោយបានសន្ឋិដ្ឋានថា ករណីនេះពិតជាស្លាប់ដោយសារគ្រោះធម្មជាតិពិតប្រាដកមែន រួចប្រគល់សព ឲ្យក្រុមគ្រួសារយកទៅធ្វើបុណ្យតាមប្រពៃណី។ ចំណែកសត្វគោទាំងអស់ដែលងាប់នោះ ក៏បានប្រគល់ឲ្យម្ចាស់វិញ៕
ដោយ៖សហការី
