សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមសារព័ត៌មាន India Today នៅរសៀលថ្ងៃចន្ទទី១០ ខែឧសភា ឆ្នាំ២០២១នេះ បានចុះផ្សាយថា វេជ្ជបណ្ឌិត ៨០នាក់ នៅឯមន្ទីរពេទ្យមួយកន្លែង ក្នុងរដ្ឋធានីញូដេលី នៃប្រទេសឥណ្ឌា បានឆ្លងជំងឺ COVID-19 ខណៈវេជ្ជបណ្ឌិតឯកទេសវះកាត់ម្នាក់ ដែលធ្វើការងារនៅទីនោះជិត ៣ទសវត្សរ៍ បានស្លាប់ដោយសារតែជំងឺកាចសាហាវនេះ។
សារព័ត៌មាន India Today បាននិយាយបន្ថែមថា ក្នុងចំណោមវេជ្ជបណ្ឌិត ៨០រូបខាងលើ នៃមន្ទីរពេទ្យ សារ៉ូច (Saroj) ដែលបានធ្វើតេស្តវិជ្ជមានចំពោះ COVID-19 ១២នាក់ កំពុងទទួលការព្យាបាលនៅឯមន្ទីរពេទ្យ ខណៈ ៦៨នាក់ទៀត កំពុងធ្វើចត្តាឡីស័ក និងព្យាបាលនៅតាមលំនៅឋានរបស់ខ្លួន។ ចំណែកវេជ្ជបណ្ឌិតឯកទេសវះកាត់ម្នាក់ ដែលត្រូវបាន COVID-19 ផ្តាច់ជីវិត គឺធ្លាប់បានបម្រើការងារនៅមន្ទីរពេទ្យ Saroj អស់រយៈពេល ២៧ឆ្នាំមកហើយ។
គួរបញ្ជាក់ថា បេីគិតមកទល់ពេលនេះ វេជ្ជបណ្ឌិត និងបុគ្គលិកផ្នែកសុខាភិបាលសរុប ៣០០នាក់ នៅតាមមន្ទីរពេទ្យក្នុងទីក្រុងញូដេលី បានឆ្លងជំងឺ COVID-19 កំលុងការឆ្លងរាតត្បាតរលកថ្មី ដែលកំពុងវាយលុកយ៉ាងធ្ងន់ធ្ងរ លើប្រទេសឥណ្ឌា ដែលបានចាប់ផ្តើមកក្រើកឡើងវិញចាប់តាំងពីចុងខែមីនា ឆ្នាំ២០២១ និងខ្លាំងបំផុតចាប់ពីអំឡុងខែមេសា រហូតមកទល់នឹងពេលនេះ។
ជាមួយគ្នានេះ នារសៀលថ្ងៃចន្ទ ទី១០ ខែឧសភា ឆ្នាំ២០២១នេះដែរ ទីភ្នាក់ងារព័ត៌មាន Times of India (TOI) បានចុះផ្សាយថា ប្រទេសឥណ្ឌា នៅក្នុងរយៈពេល ២៤ម៉ោងប៉ុណ្ណោះ បានកត់ត្រាចំនួនអ្នកឆ្លងជំងឺ COVID-19 សរុប ៣៦៦,៤៩៩នាក់ទៀត ខណៈអ្នកជំងឺរហូតដល់ ៣,៧៤៨នាក់បាត់បង់ជីវិត។
ជាក់ស្ដែងក្រោយការបូកសរុបទិន្នន័យថ្មីៗខាងលើនេះ នាំឲ្យចំនួនករណីឆ្លង COVID-19 សរុបទូទាំងប្រទេសឥណ្ឌាកើនឡើងដល់ ២២,៦៦២,៤១០ករណី ក្នុងនោះមានអ្នកស្លាប់សរុបជាង ២៤៦,១៤៦នាក់ និងជាសះស្បើយឡើងវិញជាង ១៨.៦៦លាននាក់ ខណៈអ្នកជំងឺរហូតដល់ ៣.៧៥លាននាក់ កំពុងទទួលការព្យាបាល និងរង់ចាំការព្យាបាល។
គួរបញ្ជាក់ថា ស្ថិតនៅចំពោះមុខមហន្តរាយលើវិស័យសុខាភិបាល បង្កឡើងដោយរលកទី ៣ នៃ COVID-19 រដ្ឋ តាមិលណាឌូ (Tamil Nadu), កាណាតាកា (Karnataka) រ៉ាចាស្ថាន (Rajasthan) និង ភូឌូឈើរី (Puducherry) បានប្រកាសបិទរដ្ឋទាំងមូល (lockdown) ដោយចាប់អនុវត្តចាប់ពីថ្ងៃចន្ទនេះ រហូតដល់ថ្ងៃទី២៤ ខែឧសភា។
ដោយឡែករដ្ឋដេលី (Delhi), អ៊ូតតា ប្រាដែស (Uttar Pradesh) និងហាយ៉ាណា (Haryana) នឹងបន្តការអនុវត្តវិធានការបិទទ្វារ (lockdown) រហូតដល់ថ្ងៃទី១៧ ខែឧសភា។ ដូច្នេះមានន័យថា រដ្ឋភាគច្រើននៅក្នុងប្រទេសឥណ្ឌា កំពុងតែអនុវត្តវិធានការ lockdown ហើយ ដើម្បីទប់ទល់ COVID-19៕ដោយ៖ស តារា
រូបថត៖AFP
