សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមសារព័ត៌មានថៃ និងប៉ូលិសថៃ បានធ្វើសេចក្ដីរាយការណ៍មួយកាលពីថ្ងៃអង្គារទី១១ ខែឧសភា ឆ្នាំ២០២១នេះថា៖ អ្នកយកព័ត៌មាន៣នាក់ និងសកម្មជន ២នាក់របស់មីយ៉ាន់ម៉ា ត្រូវបានប៉ូលិសថៃ ចាប់ឃាត់ខ្លួន បន្ទាប់ពីពួកគេលួចឆ្លងដែនចូលក្នុងប្រទេសថៃដោយខុសច្បាប់ និងអាចប្រឈមការបញ្ជូនចេញទៅប្រទេសវិញផងដែរ។
បេីតាមវិទ្យុសម្លេងប្រជាធិបតេយ្យភូមា(DVB) បានចុះផ្សាយដែរថា អ្នកទាំង៥ត្រូវបានចាប់ខ្លួនកាលពីថ្ងៃអាទិត្យ នៅខេត្តឈាងម៉ៃភាគខាងជើង ហើយខ្លួនអំពាវនាវឲ្យអាជ្ញាធរថៃ កុំបញ្ជូនពួកគេត្រឡប់ទៅមីយ៉ាន់ម៉ាវិញ។ មិនតែប៉ុណ្ណោះ នាយកវិទ្យុ DVB បាននិយាយនៅក្នុងសេចក្តីថ្លែងការណ៍មួយថា «ជីវិតរបស់គេប្រឈមគ្រោះថ្នាក់ខ្លាំង បើសិនជាពួកគេវិលទៅវិញ»។
នៅក្នុងសេចក្តីថ្លែងការណ៍ដដែល បន្តថា ពួកគេបានភៀសខ្លួនចេញពីការបង្ក្រាបរបស់យោធានៅមីយ៉ាន់ម៉ា ចាប់ពីរដ្ឋប្រហារថ្ងៃ០១កុម្ភៈ ដែលក្នុងពេលបង្ក្រាបនេះ អ្នកកាសែតជាច្រើននាក់ត្រូវបានចាប់ខ្លួន។ ជាក់ស្ដែងក្រោយរដ្ឋប្រហាររបបសឹកយោធា អង្គការសារព័ត៌មានជាច្រើនទៀត ត្រូវបានដកហូតអាជ្ញាបណ្ណនៅមីយ៉ាន់ម៉ា។
ដោយឡែកជុំវិញករណីនេះដែរ មេប៉ូលិស នៅស្រុកសានសៃ ក្នុងខេត្តឈៀងម៉ៃ បានថ្លែងប្រាប់សារព័ត៌មានបរទេសថា៖ ពលរដ្ឋមីយ៉ាន់ម៉ា៥នាក់ ត្រូវបានចាប់ខ្លួនចំពោះការចូលក្នុងប្រទេសដោយខុសច្បាប់ ហើយនឹងត្រូវនាំឡើងតុលាការនៅថ្ងៃអង្គារទី១១ ខែឧសភានេះ។
មេប៉ូលិសរូបនេះ បន្ថែមទៀតថា ពួកគេអាចនឹងត្រូវបញ្ជូនខ្លួនចេញ ស្របទៅតាមច្បាប់ តែដោយសារតែការផ្ទុះកូវីដ-១៩ ពួកគេអាចនឹងត្រូវឃុំខ្លួននៅជំរំ១៤ថ្ងៃសិន មុនប្រគល់ទៅឲ្យអាជ្ញាធរអន្តោប្រវេសន៍ ដេីម្បីបន្តនីតិវិធី៕ដោយ៖ស តារា
រូបភាព៖ ជនចំណាកស្រុកមីយ៉ាន់ម៉ា ត្រូវប៉ូលិសថៃចាប់ខ្លួន
