សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយបានកេីតឡេីង បន្ទាប់ពីស្ត្រីម្នាក់ បានដួលសន្លប់បាត់មាត់ឈឹង ផ្អើលដល់បងប្អូនប្រជាពលរដ្ឋ និងសមត្ថកិច្ចមូលដ្ឋាន ចុះទៅជួយធ្វេីអន្តរគមន៍កាលពីវេលាម៉ោង៦និង៤០នាទីព្រលប់ ថ្ងៃទី១០ ខែឧសភា ឆ្នាំ២០២១ ក្បែរអតីតក្លឹបកំសាន្ត រ៉ុក តាមផ្លូវព្រះមុនីវង្ស ស្ថិតក្នុងសង្កាត់បឹងត្របែក ខណ្ឌចំការមន ។
តាមប្រភពព័ត៌មានពីអ្នកលក់ដូរតាមម៉ូតូរ៉ឺម៉ក ដែលនៅក្បែរកន្លែងកើតហេតុ បានឲ្យដឹងថា ស្រ្តីរូបនេះមានឈ្មោះ ញន រចនា អាយុ៣៣ឆ្នាំ មុខរបរសន្តិសុខក្រុមហ៊ុនឯកជន ស្នាក់នៅកន្លែងធ្វើការ មានស្រុកកំណើត ភូមិច្រកម្រាក ឃុំអង្គប្រស្រែ ស្រុករមាសហែក ខេត្តស្វាយរៀង ព្រោះតែជីវភាពខ្វះខាតប្រចាំថ្ងៃ ព្រមទាំងខ្លួនមានជំងឺបេះដូងប្រចាំកាយផងនោះ គាត់បានជិះម៉ូតូមួយគ្រឿងម៉ាកហុងដាវ៉ែវ ពណ៌ខ្មៅ ពាក់ស្លាកលេខ ស្វាយរៀង 1N 6795 ដោយដឹកធុងលក់ទឹកសណ្ដែកតាមម៉ូតូយកមកលក់នៅពេលយប់ក្រោយពីធ្វេីការងារចប់ពីសន្តិសុខ។ ខណៈនៅពេលជំងឺធ្វើទុក្ខ ស្ត្រីរូបនេះក៏បានលេបថ្នាំដោយមិនបានហូបអាហារនោះទេ ស្រាប់តែដួលសន្លប់បាត់មាត់បាត់កតែម្តង។
ប្រភពដដែលបន្តថា លុះដល់ដល់ចំណុចកើតហេតុ ស្ត្រីរូបនេះក៏បានអែមម៉ូតូទៅកៀនផ្លូវ រួចអង្គុយចុះ ហើយពេលនោះដោយឃើញមានអាការៈមិនស្រួល អ្នកលក់ដូរដូចគ្នាក៏បានសួរនាំ ពីចម្ងាយ ស្រាប់តែស្ត្រីរងគ្រោះបាននិយាយថា «គាត់មានជំងឺបេះដូង ហើយគាត់លេបថ្នាំ ដោយមិនបានហូបបាយ ឬចំណីអ្វីទេ» លុះពេលទើបនិយាយរួច ក៏ស្រាប់តែដួលសន្លប់បាត់មាត់បាត់.កតែម្តង។
ប្រភពដដែលបន្តថា លុះបន្តិចក្រោយមក ក៏បង្កឱ្យមានភ្ញាក់ផ្អើលដល់បងប្អូនប្រជាពលរដ្ឋដែលធ្វើដំណើរតាមផ្លូវ រួមទាំងសមត្ថកិច្ចមូលដ្ឋាន បានចុះទៅសួរនាំពីចម្ងាយ ដោយមិនហ៊ាននាំគ្នាចូលទៅជិតទេ ព្រមទាំងធ្វើការទាក់ទងហៅរថយន្តសង្គ្រោះ តែមិនឃើញមានរថយន្តណាមួយមកទទួលនោះទេ ។ ចំណែកប្រជាពលរដ្ឋ និងសមត្ថកិច្ច ក៏មិនហ៊ានចូលជិតដែរ ដោយសារតែខ្លាចស្ត្រីរងគ្រោះរូបនេះ មានជំងឺកូវីដ១៩ គឺបានត្រឹមតែនាំគ្នាជួយបាញ់ទឹកអាល់កុល និងយកឈើមកឆ្កឹះដាស់ស្ត្រីរងគ្រោះតែប៉ុណ្ណោះ ។
ប្រភពដដែលបន្តទៀតថា បន្ទាប់ពីចាំរថយន្តសង្គ្រោះយូរពេកមិនឃើញមក សមត្ថកិច្ចក៏បានយកឈើឆ្កឹះចុះឆ្កឹះឡើង និងស្រែកហៅស្ត្រីរងគ្រោះ ក៏បានដឹងខ្លួនវិញ ហើយងើបអង្គុយទាំងទឹកមុខស្រងូតស្រងាត់ និងបាននិយាយថា គាត់បានចេញពីលក់ទឹកសណ្ដែកនៅម្តុំផ្សារថ្មី ក្នុងគោលបំណងទៅយាមកាមរោងចក្រ នៅម្តុំចាក់អង្រែ ខណ្ឌមានជ័យ បន្តទៀត តែដោយសារគាត់មានជំងឺបេះដូងធ្វើទុក្ខ ក៏យកថ្នាំមកលេបទាំងមិនបានញ៉ាំអាហារ ហើយណាមួយរូបគាត់ មិនបានសម្រាកគ្រប់គ្រាន់ផងនោះ ទើបធ្វើឱ្យអត់មានកម្លាំង ទប់ជាមួយនឹងថ្នាំមិនបាន ក៏ដួលសន្លប់តែម្តងទៅ ។
ក្រោយពេលដឹងខ្លួនឡើងវិញ ស្ត្រីរងគ្រោះបានអង្គុយឲ្យមានកម្លាំងបន្តិច រួចហើយក៏បន្តជិះម៉ូតូទៅមុខទៀត ដើម្បីទៅកន្លែងធ្វើការរបស់ខ្លួនជាបន្តទៀត៕ដោយ ៖ សហការី
