សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ក្រុមអ្នកញៀនល្បែងស៉ីសងខុសច្បាប់(លេងចាក់អាប៉ោង)ចំនួន៨នាក់ ខណៈដែលផ្គេីននឹងវិធានការក្រសួងសុខាភិបាល នារដូវជំងឺឆ្លងកូវីដ-១៩នោះ ហើយត្រូវសមត្ថកិច្ចនគរបាលខេត្តកំពង់ស្ពឺ ចុះបង្ក្រាបកាលពីពេលកន្លងទៅនោះ។ ពេលនេះ កំពុងតែមានអ្នកខំប្រឹងប្រែងរត់ការដោះលែង ដើម្បីឲ្យបក្សពួកខ្លួនបានស្ថិតនៅក្រៅឃុំ។ នេះបេីយោងតាមការលួចបង្ហេីបពីមន្រ្តីសាលាដំបូងខេត្តម្នាក់។
មន្រ្តីរូបនេះ លួចបង្ហេីបប្រាប់ទៀតថា អ្នកដែលខំប្រឹងប្រែងរត់ការដោះលែងនោះ មានមេខ្លោងបនល្បែងស៊ីសងម្នាក់ ដែលល្បីល្បាញជាងគេ និងជាអ្នកធានាលើការបង្ក្រាបរាល់ការលេងល្បែងទាំងនេះ ត្រូវបានស្គាល់ថាឈ្មោះ អ៊ុក សុផាត។ មិនតែប៉ុណ្ណោះ ឈ្មោះអ៊ុក សុផាត ត្រូវបានគេអះអាងថា មានខ្សែស្រឡាយ និងខ្នងបង្អែកជាមន្រ្តីធំមានអំណាចចាំជួយពីក្រោយផងដែរ។
ប្រភពដដែល បង្ហេីបប្រាប់ទៀតថា ចំពោះការដោះលែងក្រុមអ្នកញៀនល្បែងស៉ីសងខុសច្បាប់ ដែលល្មើសបំរាមការជួបជុំ របស់ក្រសួងសុខាភិបាលនោះ បើតាមព័ត៌មានដែលលេចឮពីតុលាការខេត្ដកំពង់ស្ពឺមកថា ការដោះលែងអ្នកលេងល្បែងហើយជាមេខ្លោងដែលនាំមនុស្សប្រមូលផ្ដុំជួបជុំ ល្មើសបំរាមរាជរដ្ឋាភិបាល និងវិធានការសុខាភិបាលនោះ បានត្រៀមនឹងមានសេរីភាពនៅសប្ដាហ៍ក្រោយនេះហើយ។ ការដែលក្រុមមនុស្សទាំង៨នាក់អាចមានសេរីភាពបាន គឺគ្មានអ្វី ក្រៅពីចរចាក្រៅផ្លូវការ និងក្រោមតុនោះឡើយ។
បេីតាមប្រភពច្បាស់ការមួយ បានបញ្ជាក់ថា ឈ្មោះ អ៊ុក សុផាត ជាអ្នករ៉ាប់រងចំណាយទាំងអស់ ដើម្បីឲ្យបក្សពួក និងក្រុមអ្នកញៀនល្បែងអាប៉ោងទាំងនោះបានរួចខ្លួន។
គួររម្លឹកថា ករណីបង្ក្រាបល្បែងស៊ីសងខុសច្បាប់ និងការបំពានបំរាមវិធានការសុខាភិបាល ប្រមូលផ្តុំលេងល្បែងក្នុងចំការស្វាយមួយកន្លែង ស្ថិតនៅខាងលិច ភូមិសន្តិភាព ឃុំតាំងក្រូច ស្រុកសំរោងទង ខេត្តកំពង់ស្ពឺ កាលពីថ្ងៃទី២៩ ខែមេសា ឆ្នាំ២០២១ ។ លុះនៅវេលាម៉ោង១ និង៤៥នាទីរសៀលថ្ងៃដដែល កម្លាំងអធិការដ្ឋាននគរបាលស្រុកសំរោងទង បានចុះស្រាវជ្រាវបង្ក្រាបមុខសញ្ញាប្រមូលផ្តុំជួបជុំគ្នាល្មើសបំរាមវិធានការសុខាភិបាល និងលេងល្បែងស៊ីសង(អាប៉ោង) នៅក្នុងដីចំការស្វាយ ស្ថិតក្នុងភូមិសន្តិភាព ឃុំតាំងក្រូច ស្រុកសំរោងទង ។ ជាក់ស្ដែងនៅក្នុងហេតុការណ៍ខាងលើនេះ សមត្ថកិច្ចបានឃាត់ខ្លួនមនុស្សចំនួន៨នាក់ រួមជាមួយនឹងវត្ថុតាងផងដែរ ។
គួរជម្រាបថា ក្រុមលេងល្បែងល្មើសបំរាមវិធានការសុខាភិបាលនេះ រួមមាន ៖ ១-ឈ្មោះ ង៉ែត សំណាង ភេទប្រុស អាយុ ៣៧ឆ្នាំ នៅភូមិតាកុក ឃុំតានី ស្រុកអង្គរជ័យ ខេត្តកំពត ។ ២-ឈ្មោះ ប៉ុម សារុន ភេទប្រុស អាយុ២៥ឆ្នាំ នៅភូមិចំការស្លែង ឃុំតាំងក្រូច ស្រុកសំរោងទង ។ ៣-ឈ្មោះ ស៊ឹម ថុង ភេទប្រុស អាយុ៤១ឆ្នាំ នៅភូមិព្រៃដងទឹក ឃុំទឹកល្អក ស្រុកគងពិសី ។ ៤-ឈ្មោះ សៀម ប៉េង ភេទប្រុស អាយុ៤០ឆ្នាំ នៅភូមិថ្នល់បំបែក សង្កាត់ស្វាយក្រវ៉ាន់ ក្រុងច្បារមន ។ ៥-ឈ្មោះ ណេន នី ភេទប្រុស អាយុ៤២ឆ្នាំ នៅភូមិគោកស្រប់ ឃុំគោកត្រប់ ស្រុកកណ្តាលស្ទឹង ខេត្តកណ្តាល ។ ៦-ឈ្មោះ អ៊ុយ សុផាត ភេទប្រុស អាយុ៦៣ឆ្នាំ នៅភូមិព្នៅ ឃុំត្រពាំងគង ស្រុកសំរោងទង ។ ៧-ឈ្មោះ ម៉ឺ វឺន ភេទស្រី អាយុ ៤២ឆ្នាំ ភូមិគោកមានជ័យ ឃុំព្នាយ ស្រុកសំរោងទង និង៨-ឈ្មោះ យ៉ន តាំង ភេទស្រី អាយុ៤០ឆ្នាំ នៅភូមិអណ្តូង សង្កាត់គោករកា ខ ណ្ឌព្រែកព្នៅ រាជធានីភ្នំពេញ ។
ដោយឡែកវត្ថុតាងដកហូតបានជាក់ស្ដែងរួមមាន ៖ -មេអាប៉ោង០៧, -ចានបាញ់អាប៉ោង០១, -គំរបគ្រប ០១, -ឧបករណ៍បញ្ជាមេ អាប៉ោង១, -កំរាលក្រាល១. -ប៊ិច៧ដើម, -សៀវភៅកត់បុង៧ក្បាល, -តង់កៅស៊ូប្រក់ ១, -កៅអីជ័រ ៥, -ប្រាក់រៀលចំនួន ២,២០០,០០០រៀល ( ពីរលានម្ភៃម៉ឺនរៀល ), -ទូរស័ព្ទដៃ ម៉ាកចំរុះ ៣គ្រឿង, – ម៉ូតូម៉ាកចំរុះ ៤គ្រឿង និងរថយន្តចំនួន២គ្រឿងផងដែរ។
គួរបញ្ជាក់ថា បច្ចុប្បន្នមជ្ឈដ្ឋានទូទៅ ជាពិសេសគឺប្រជាពលរដ្ឋរង់ចាំមេីលថា បុគ្គលឈ្មោះ អ៊ុក សុផាត ដែលជាអ្នករត់ការនិងរ៉ាប់រងចំណាយលុយទាំងអស់ ដើម្បីឲ្យបក្សពួក និងក្រុមអ្នកញៀនល្បែងអាប៉ោងទាំងនោះបានរួចខ្លួនដែលឬទេ? តើអំណាចទឹកប្រាក់ឬ ក៏វិធានការសុខាភិបាលមួយណាមានប្រសិទ្ធខ្លាំងជាង៕ដោយ៖សហការី
រូបថត៖ឯកសារ ពេលសមត្ថកិច្ចបង្ក្រាបកាលពីពេលកន្លងទៅនេះ
