សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងចម្រុះ នៃគណៈបញ្ជាការឯកភាពខណ្ឌមានជ័យ នៅវេលាម៉ោង៨យប់ ថ្ងៃសុក្រ ៣កើត ខែ ជេស្ឋ ឆ្នាំឆ្លូវ ព.ស ២៥៦៥ ត្រូវនឹង ថ្ងៃទី ១៤ ខែ ឩសភា ឆ្នាំ២០២១ ដឹកនាំដោយលោក ពេជ្រ កែវមុនី អភិបាលខណ្ឌមានជ័យ និងមានការចូលរួមពី លោក ឌី រ័ត្នខេមរុណ អភិបាលរងខណ្ឌមានជ័យ លោកវរសេនីយ៍ឯក ម៉េង វិមានតារា អធិការខណ្ឌមានជ័យ និង លោក ណុល សុធា មេបញ្ជាការរងខណ្ឌមានជ័យ និង ដោយមានការចូលរួមពី កម្លាំងចម្រុះនៃស្នងការដ្ឋាននគរបាលរាជធានីភ្នំពេញ ដឹកនាំដោយ ឧត្តមសេនីយ៍ទោ គល់ យី ស្នងការរង រាជធានីភ្នំពេញ បានចុះអនុវត្តរឹតបណ្តឹងសន្តិសុខ នៃបំរាមគោចរ ត្រង់ចំណុចច្រមុះជ្រូកស្ទឹងមានជ័យ ក្នុងភូមិសាស្រ្តខណ្ឌមានជ័យ រាជធានីភ្នំពេញ ។
ការចុះអនុវត្ត ពង្រឹងសន្តិសុខ និងបំរាមគោចរ នេះដែរ លោក អភិបាលរង បានបញ្ជាក់ថា គោល បំណងកំណត់គោលដៅបិទខ្ទប់ នៃតំបន់ក្រហម ក្នុងភូមិសាស្រ្ត សង្កាត់ស្ទឹងមានជ័យ៣ ដើម្បីរៀបចំកម្លាំងប្រចាំការតាមគោលដៅបិទខ្ទប់នីមួយៗ ក្នុងនោះ គោលដៅបិទខ្ទប់ នៃតំបន់ក្រហម ក្នុងភូមិសាស្រ្តសង្កាត់ស្ទឹងមានជ័យ៣ មាន ១០គោលដៅ ។ ជាមួយគ្នានេះដែរ រដ្ឋបាលខណ្ឌមានជ័យ បានទទូចដល់បងប្អូនប្រជាពលរដ្ឋទាំងអស់ ដែលរស់នៅក្នុងតំបន់បិទខ្ទប់ នៃតំបន់ក្រហម សូមយោគយល់ និងបន្តសហការជាមួយអាជ្ញាធរមូលដ្ឋាន កុំចេញក្រៅក្រៅផ្ទះ ប្រសិនបើគ្មានការចាំបាច់ដើម្បីកាត់បន្ថយការរីករាលដាលនៃជំងឺកូវីដ-១៩ ។
ក្នុងប្រតិបត្តិការនៃការអនុវត្តន៍បំរាមគោចរ កម្លាំងចម្រុះរបស់គណៈបញ្ជាការខណ្ឌមានជ័យ បានប្រើប្រាស់កម្លាំងសរុប ៥៨នាក់ បានដកហូតម៉ូតូ ចំនួន០៣គ្រឿង ដែលល្មើសនិងបំរាមគោចរ យកទៅរក្សាទុក និង ឲ្យមនុស្សទៅធ្វើចត្តាឡីស័កនៅលំនៅដ្ឋានខ្លួនឯង ៕
ដោយ ៖ ភារ៉ា ដង្កោ
