សារព័ត៌មាន នគរវត្ត តែងតែនាំមុខគេជានិច្ច
គ្រាប់បាល់របស់កីឡាករ Federico Chiesa បានជួយលើកពានរង្វាន់ Coppa Italia ដល់ក្រុមសេះបង្កង់ Juventus ក្នុងជ័យជម្នះ ២-១ លើក្រុម Atalanta កាលពីរំលងអធ្រាត្រឈានចូលថ្ងៃព្រហស្បតិ៍ ទី២០ ឧសភា២០២១នេះ។
ជាមួយនឹងអ្នកទស្សនាប្រហែលជា៤៣០០នាក់បានបង្ហាញវត្តមាននៅឯពហុកីឡដ្ឋាន Mapei ដើម្បីធ្វើជាសាក្សីក្នុងវគ្គផ្តាច់ព្រ័ត្រហើយវាមិនខកចិត្តនោះទេ នៅពេលដែលការប្រកួតនេះមានការជក់ចិត្ត និងមិនបញ្ហាហិង្សាកើតឡើងនោះទេ។ នេះបើយោងតាមការចេញផ្សាយរបស់ MARCA ។
គ្រាប់បាល់របស់ Dejan Kulusevski ជាអ្នកនាំមុខដល់ក្រុម Juventusនៅនាទីទី៣១ ប៉ុន្តែក្រុម Atalanta រកបាន១គ្រាប់សងវិញនៅនាទីទី៤១ ដោយកីឡាករ Ruslan Malinovskyi ។ ធ្វើឲ្យចប់ការប្រកួតតង់ទី១ លទ្ធផលស្មើគ្នា១ទល់១។
ចូលដល់ការប្រកួតតង់ទី២ ក្រុម Juventus បានព្យាយាមស៊ុតបាល់ចំគោលដៅ តែត្រូវអ្នកចាំទីសង្គ្រោះបាន និងព្យាយាមដាក់សម្ពាធយ៉ាងខ្លាំងទៅលើក្រុម Atalanta។ ចូលដល់នាទីទី៧៣ កីឡាករ Chiesa ក៏រកបាន១គ្រាប់ទៀតដែលជាគ្រាប់ជ័យជម្នះ ហើយនៅនាទីទី៨៨ ជិតចប់ការប្រកួតទៅហើយ កីឡាករ Toloi របស់ក្រុម Atalanta បានបង្កកំហុស ក៏ត្រូវអាជ្ញាកណ្តាលផ្តល់កាតក្រហមផងដែរ។
នេះជាមោទនភាពរបស់ក្រុម Juventus ក្រោមការដឹកនាំរបស់លោក Andrea Pirlo បានឈ្នះពានដំបូងក្នុងនាមជាគ្រូបង្វឹក។ បច្ចុប្បន្នក្រុមនេះស្ថិតនៅចំណាត់ថ្នាក់លេខ៥ ចាញ់ក្រុមលេខ៤តែមួយពិន្ទុប៉ុណ្ណោះ ដែលត្រូវការឈ្នះជាចាំបាច់ក្នុងការប្រកួតក្របខ័ណ្ឌអុីតាលី Serie A ដើម្បីមានកៅអីទៅលេង Champions League រដូវកាលក្រោយ ៕ដោយ៖ ភារៈ
