សារព័ត៌មាន នគរវត្ត តែងតែនាំមុខគេជានិច្ច
បង្កើតឲ្យមានការចាប់អារម្មណ៍ពីអ្នកគាំទ្រនៅកម្ពុជាសាជាថ្មីក្រោយពីគេបានឃើញរូបថតជាច្រើនសន្លឹករបស់ម្ចាស់មកុដកញ្ញាឯកចក្រវាឡកម្ពុជា ជាមួយនឹងបុរសជនបរទេសដ៏សង្ហាម្នាក់ត្រូវបានធ្លាយចេញនៅលើបណ្តាញសង្គម។ រូបថតទាំងនេះបានបង្ហាញពីភាពផ្អែមផ្អែមល្ហែមខ្លាំងដែលធ្វើឲ្យអ្នកគាំទ្រនាងមានការសាទរ និងផ្ញើសារអបអរគ្រប់ៗគ្នា។
ទើបនឹងធ្វើឲ្យមហាជនពេញចិត្ត និងគាំទ្រនាងក្នុងការបង្ហាញមុខលើឆាកអន្តរជាតិមិនបានប៉ុន្មានផង ស្រាប់តែពេលនេះរ៉េត សារីតា បានធ្វើឲ្យអ្នកគាំទ្របើកភ្នែកធំៗ ព្រោះតែរូបថតជាច្រើនសន្លឹកនៃភាពស្និទ្ធស្នាលគ្នាខ្លាំងជាមួយនឹងបុរសសង្ហាម្នាក់ ។
ភាពស្និទ្ធស្នាលនេះដែរត្រូវបានគេសន្មត់ស្ទើរគ្រប់មាត់ថា មិនមែនជារូបថតទំនាក់ទំនងជាFan ឬជាអ្នកគាំទ្រ ឬត្រឹមតែជាមិត្តនោះទេ គឺជាគូស្នេហ៍តែម្តង ព្រោះស្ទើរតែគ្រប់សន្លឹកនៃរូបថតបានបង្ហាញពីភាពស្អិតរមួត និងមើលទៅអារម្មណ៍របស់នាងនិងបុរសនោះពិតជាពោរពេញដោយភាពផ្អែមល្ហែមមានក្តីសុខខ្លាំងណាស់។ មានការសង្ស័យដែរថា បុរសនេះក៏បានរួមដំណើរជាមួយនាងពីកម្ពុជាឆ្ពោះទៅកាន់ទឹកដីនៃសហរដ្ឋអាមេរិកដែរ ប៉ុន្តែពួកគេមិនបង្ហាញរូបថតណាមួយមុនពេលដែលកម្មវិធីប្រកួតកញ្ញាឯកចក្រវាឡ២០២០ បានចាប់ផ្តើមនោះឡើយ។ ងាកមកក្រុមអ្នកគាំទ្រនាងវិញបានបញ្ចេញសារសាទរជាហូរហែចំពោះរូបភាព និងដំណឹងល្ហិចល្ហៀងមួយនេះ ព្រមទាំងសរសើរថានាងពិតជាសំណាងដែលអាចរកបុរសស្រស់សង្ហាម្នាក់រួមដំណើរជាមួយនិងអាចមើលថែនាងបានយ៉ាងល្អ។ ក៏មានអ្នកលើកឡើងដែរថា នាងមានទាំងរូបសម្រស់ និងសមត្ថភាពមិនពិបាកនឹងរកបានបុរសល្អមកកៀកកើយបែបនេះនោះទេ ហើយពួកគេរំពឹងថា សារីតា នឹងបញ្ជាក់អំពីអត្តសញ្ញាណនិងការណ៍ពិតទៅកាន់អ្នកគាំទ្រនៅពេលដ៏ខ្លីខាងមុខនេះ។ ទោះជាយ៉ាងណា តាមការគ្រោងទុក រ៉េត សារីតា នឹងធ្វើដំណើរមកដល់កម្ពុជានៅអំឡុងចុងខែឧសភានេះ បន្ទាប់ពីកម្មវិធីប្រកួតចប់សព្វគ្រប់ និងមានកម្មវិធីជួបជុំពលរដ្ឋខ្មែររស់នៅលើទឹកដីនៃសហរដ្ឋអាមេរិកនោះ។
ទោះជាយ៉ាងណាគេនៅមិនទាន់អាចស្វែងការណ៍ពិតបញ្ជាក់បន្ថែមលម្អិតអំពីអត្តសញ្ញាណ និងទំនាក់ទំនងរវាងនាងនឹងបុរសដែលតាមនាងស្អិតចាប់តាំងពីនៅកម្ពុជា រហូតដល់សហរដ្ឋអាមេរិកនោះឡើយ។ មានការលើកឡើងពីក្រុមអ្នកជីតដិតនឹងកញ្ញាឯកដែរថា កន្លងទៅកញ្ញាឯកមួយចំនួនក៏បាននាំទាំងសង្សារបណ្តូលចិត្តទៅចូលរួម និងបង្ហាញមុខដោយបើកចំហក្នុងគ្រាដែលពួកគេចូលរួមប្រកួតផងដែរ ៕
ដោយ៖ វឌ្ឍនា
