សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ៖ បើតាមការលើកឡើងរបស់លោក សុខ ឡេង វ័យ ៦០ឆ្នាំ ដែលជាកសិករដាំទុរេន នៅស្រុកតំបែរ ខេត្តត្បូងឃ្មុំ បាននិយាយថានៅខេត្តត្បូងឃ្មុំឆ្នាំនេះ កសិករដាំទុរេន ទទួលបានផលល្អ ជាងឆ្នាំមុន។ នេះបើយោងតាមប្រភពព័ត៍មានពីក្រសួងព័ត៌មាន បានចុះផ្សាយ នាពេលថ្មីៗនេះ។
លោក សុខ ឡេង បន្តថា រយៈពេលជាង ២០ឆ្នាំមកហើយ ដែលគាត់ប្រកបរបរដាំទុរេននេះ ជាក់ស្ដែងក្នុងឆ្នាំនេះ ទុរេនចំនួន ២០០ដើម លើផ្ទៃដី ២០ហិកតា របស់លោកបានផលពី ៧០ ទៅ ១០០តោន ដោយភាគច្រើនជាទុរេនម៉ានថង។
កសិកររូបនេះ បន្ថែមទៀតថា លោកបានដាំទុរេន ចំនួន៣ប្រភេទ គឺ ម៉ានថង, វី៦ និងមូសាំងឃីង។ ស្ថិតនៅចម្ការទុរេន ក្នុងភូមិក្រសាំង ឃុំអូជ្រៅ លោក សុខឡេង បានរៀបរាប់ថា ទុរេនចំនួន ៣ប្រភេទនេះ គឺទុរេនម៉ានថង មានផលច្រើនជាងគេ។ « ពូជម៉ានថង ខ្ញុំដាំយូរហើយ ។ ពូជសាំងឃីង ខ្ញុំទើបដាំបាន ៣ឆ្នាំ មិនទាន់បានផលទេ។ ប៉ុន្តែជាទូទៅ ម៉ានថងល្អជាងគេ ពូជវី៦ និងមូសាំងឃីង ផ្លែតូចៗទេ។ ការលក់ហ្នឹងខ្ញុំបោះឱ្យគេលក់ខ្លះ ឱ្យកូនលក់ខ្លះ»។
លោក សុខ ឡេង បញ្ជាក់ទៀតថា ក្នុងឆ្នាំនេះទៀតទុរេនរបស់គាត់ កើនផលច្រើនជាងឆ្នាំមុន រហូតដល់ជិតពាក់កណ្ដាល ព្រោះមានទុរេនជាង ១០០ដើមទៀត អាចប្រមូលផលបាន។
ទោះបីជាឆ្នាំនេះទិន្នផលទុរេន កើនស្របពេលមានការរាលដាលនៃជំងឺកូវីដ-១៩ក្ដី ប៉ុន្តែម្ចាស់ចម្ការរូបនេះ អះអាងថា ទុរេនរបស់លោក នៅតែមានទីផ្សារល្អ។ ឆ្នាំនេះ លោក លក់ទុរេនបានតម្លៃដូចឆ្នាំមុនដែរ គឺតម្លៃបោះដុំ ១៥ ០០០ រៀលក្នុងមួយគីឡូ៕ដោយ៖សហការី
ប្រភពពី៖ក្រសួងព័ត៌មាន
