សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើយោងតាមលោក ដួង តារា ជំនួយការសម្តេចតេជោ ហ៊ុន សែន នាយករដ្ឋមន្រ្តី និងជារដ្ឋលេខាធិការទីស្តីការគណៈរដ្ឋមន្រ្តី បានបង្ហោះនៅលេីបណ្ដាញសង្គមហ្វេសប៊ុកផ្លូវការរបស់ខ្លួននៅថ្ងៃសុក្រុទី២១ ខែឧសភា ឆ្នាំ២០២១នេះថា៖ ទោះបីពេលនេះតំបន់ក្រហមមួយចំនួនត្រូវបានបើកឡើងហើយក្តី ប៉ុន្តែជំងឺកូវីដ-១៩ នៅមិនឆ្ងាយពីយើងទេ បើធ្វេសប្រហែសភ្លេចខ្លួនវានឹងឆ្លងយើងភ្លាមមួយរំពេច។ ជំងឺកូវីដ-១៩ ឆ្លងលឿនសាហាវណាស់។
ធ្វើអ្វីមួយគឺត្រូវគិតពីសុវត្ថិភាពសុខភាពអាយុជីវិតជាចម្បង គឺត្រូវពាក់ម៉ាសជាប់គ្រប់ទីកន្លែង ហើយឧស្សាហ៍ដុសលាងសម្អាតដៃ និងមុខមាត់ឲ្យបានញឹកញាប់។
ទោះបីពេលនេះតំបន់បិទខ្ទប់ត្រូវបានបើកឡើងវិញក្តី ហើយពលរដ្ឋមួយចំនួនរួមទាំងបងប្អូនកម្មករកម្មការិនីបានវិលទៅធ្វើការជាបណ្តើរៗឡើងវិញក្តី ក៏ប៉ុន្តែបងប្អូនយើងនៅមានការខ្វះខាតស្បៀងអាហារ បើពេលនេះយើងអាចជួយស្បៀងពួកគាត់បាន គឺនឹងផ្តល់ឱកាសអោយពួកគាត់ដោះស្រាយជីវភាពដោយខ្លួនឯងបានបន្ទាប់ពីបានវិលចូលធ្វើការបាន១ខែនេះ។
បន្ថែមពីនេះ រដ្ឋលេខាធិការរូបនេះ បន្តថា ខ្ញុំខិតខំបន្តផ្តល់ស្បៀងជូនបងប្អូនដែលខ្វះខាត និងដាច់ស្បៀងនៅក្នុងពេលវេលាដ៏លំបាកនេះ។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើងក្រោមម្លប់សន្តិភាព៕ដោយ៖សហការី
រូបភាព៖ហ្វេសប៊ុករបស់លោក ដួង តារា
