សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រុមហ៊ុន ហ្គោលអេហ្វអិកស៍ អ៊ិនវេសម៉ិន (GOLDFX INVESTMENT CO.,LTD) កំពុងតែប្រឈមមុខ ជាមួយ មនុស្សប្រុសស្រី ប្រមាណជាង១០០នាក់ ដែលមកដល់ មុខទីតាំងក្រុមហ៊ុនដើម្បីធ្វើកូដកម្ម ទាមទារ ឱ្យអ្នកវិនិយោគិនរបស់ក្រុមហ៊ុន ទទួលខុសត្រូវ សងប្រាក់ដែលពួកគេខាតបង់ ដែលសរុបប្រមាណជិត៣០លានដុល្លារ ។
ហេតុការណ៍ធ្វើកូដកម្មនេះកើតឡើង កាលពីវេលាម៉ោងប្រមាណ៩ និង ៣០នាទីព្រឹក ថ្ងៃទី៣១ ខែឧសភា ឆ្នាំ ២០២១ ដោយមនុស្សប្រុសស្រីប្រហែលជាង១០០នាក់ មកដល់សាខាក្រុមហ៊ុន ដែលស្ថិតនៅ តាមផ្លូវលេខ ២១៦ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ។
តាមប្រភពព័ត៌មានដែលទទួលបានពីអ្នកធ្វើកូដកម្មទាំងនោះ បានឱ្យដឹងថា ជាច្រើនឆ្នាំមកហើយ ពួកគេបានរកស៊ី ជាមួយក្រុមហ៊ុន ហ្គោលអេហ្វអិកស៍ អ៊ិនវេសម៉ិន (GOLDFX INVESTMENT CO.,LTD) ក្នុងការជួញដូរ រូបិយបនអន្តរជាតិ ។ ដោយម្នាក់ៗ បានដាក់លុយឱ្យក្រុមហ៊ុន ក្នុងម្នាក់ៗ ខ្លះ រាប់ពាន់ដុល្លារ និងខ្លះទៀត រាប់ម៉ឺនដុល្លារ ដើម្បីវិនិយោគ ។កន្លងមក មិនមានបញ្ហា អ្វី នោះទេ ស្រាប់តែកាល ថ្ងៃទី២៣ខែមីនាឆ្នាំ ២០២១ ស្រាប់ប្រាក់នៅក្នុងក្រុមហ៊ុន ចំនួន ២៨លានដុល្លារ បានបាត់អស់ ដោយមិនដឹងខ្លួន ជាហេតុ ធ្វើឱ្យ អតិថជនទាំងអស់ ក៏បាននាំគ្នាតវ៉ា ហើយ ក្រុមហ៊ុនសន្យារកដំណោះស្រាយ សងលុយ របស់ពួកគាត់វិញតែបាត់ដំណឹងរហូត ។
តាមអ្នកតវ៉ាបានឱ្យដឹងទៀតថា នៅពេលថ្មី នេះក្រុមហ៊ុនក៏បានជូនដំណឹង ដោយគេចវេសមិនទទួលខុសត្រូវ រង់ចាំដោះស្រាយតាមផ្លូវច្បាប់ព្រោះក្រុមហ៊ុន ជាអ្នករងគ្រោះ ដែលទើបជាហេតុ ធ្វើឱ្យ ពួកគាត់នាំគ្នាតវ៉ាតែម្តង ។
តាមក្រុមអ្នកតវ៉ាបានឱ្យដឹងទៀត ក្រុមហ៊ុន ហ្គោលអេហ្វអិកស៍ អ៊ិនវេសម៉ិន (GOLDFX INVESTMENT CO.,LTD)មានសាខាចំនួន ៣ គឺនៅសង្កាត់ស្ទឹងមានជ័យ និងខណ្ឌបឹងកេងកង និងខណ្ឌទួលគោក ហើយ នៅព្រឹកថ្ងៃទី៣១ខែ ឧសភា នេះ ស្នាក់ការ ចំនួន ២បានបិទទ្វារ នៅសល់តែ ក្នុងខណ្ឌទួលគោកនេះ ។
បើតាមសេចក្តីជូនដំណឹង និយ័តករមូលបត្រកម្ពុជា (ន.ម.ក.) សូមជម្រាបជូនដំណឹងដល់វិនិយោគិនរបស់ក្រុមហ៊ុន ហ្គោលអេហ្វអិកស៍ អ៊ិនវេសម៉ិន មេត្តាជ្រាបថា៖ ក្រោយពីនិយ័តករមូលបត្រកម្ពុជាបានទទួលលិខិតស្នើសុំព្យួរប្រតិបត្តិការជួញដូរបណ្តោះអាសន្នរបស់ក្រុមហ៊ុន ហ្គោលអេហ្វអិកស៍ អ៊ិនវេសម៉ិន (GOLDFX INVESTMENT CO.,LTD) ចុះថ្ងៃទី២៩ ខែមីនា ឆ្នាំ២០២១ ក៏បានឃើញសារប្តឹងពីវិនិយោគិនរបស់ក្រុមហ៊ុននៅតាមបណ្តាញសង្គមហ្វេសប៊ុករបស់ “និយ័តករមូលបត្រកម្ពុជា” ផងដែរ ដូចនេះ និយ័តករមូលបត្រកម្ពុជាសូមប្រកាសជូនដំណឹងដល់វិនិយោគិនរបស់ក្រុមហ៊ុន ហ្គោលអេហ្វអិកស៍ អ៊ិនវេសម៉ិន ដែលមានបំណងដាក់ពាក្យប្តឹងមកនិយ័តករមូលបត្រកម្ពុជា សូមបំពេញទម្រង់ពាក្យប្តឹងដូចភ្ជាប់មកជាមួយ ហើយដាក់ពាក្យប្តឹងនេះនៅនិយ័តករមូលបត្រកម្ពុជា ដែលមានទីស្នាក់នៅ អគារ១៦៨F ផ្លូវ៥៩៨ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ។
សូមបញ្ជាក់ថា មិនទាន់មានតំណាងក្រុមហ៊ុនណាចេញមុខមកធ្វើការដោះស្រាយនោះទេ ៕
ដោយ ៖ រ៉ារ៉ា
