សារព័ត៌មាន នគរវត្ត តែងតែនាំមុខគេជានិច្ច
កីឡាករវាយតឺន្នីសឆ្នើម Andy Murray បាននិយាយថា គាត់មានអារម្មណ៍ល្អនៅពេលដែលគាត់ត្រៀមការពារតំណែងជើងឯកកីឡាវាយតឺន្នីសក្នុងព្រឹត្តិការណ៍កីឡាអូឡាំពិករបស់គាត់នៅទីក្រុងតូក្យូ ប៉ុន្តែគាត់បានសារភាពថា មានការព្រួយបារម្ភពីបញ្ហាជំងឺកូវីដ–១៩ក្នុងចំណោមក្រុមដែលបានមកប្រកួត។
កីឡាករជនជាតិអង់គ្លេសរូបនេះបានឈ្នះមេដាយមាសនៅឯព្រឹត្តិការណ៍អូឡាំពិកទីក្រុងឡុងឆ្នាំ ២០១២ និងទីក្រុងរីយ៉ូ២០១៦ ប៉ុន្តែធ្លាប់បានវះកាត់ត្រគាកចំនួន២ដងចាប់តាំងពីពេលបច្ចុប្បន្ន។ Murray នឹងត្រូវប្រកួតជាមួយនឹងកីឡាករលំដាប់ទី៩របស់កាណាដា Felix Auger-Aliassime ក្នុងព្រឹត្តិការណ៍អូឡាំពិកឆ្នាំនេះ។
កីឡាកររូបនេះបាននិយាយថា “ខ្ញុំបានត្រៀមលក្ខណៈល្អបំផុតតាមដែលខ្ញុំអាចធ្វើបាន។ ប្រសិនបើខ្ញុំអាចឆ្លងកាត់ជុំទី១ ឬទី២ខ្ញុំនឹងចាប់ផ្តើមមានអារម្មណ៍សុខស្រួលជាងមុន។ ប៉ុន្តែខ្ញុំនៅតែមានការថប់បារម្ភក្នុងចំណោមក្រុមអង់គ្លេសនៅក្នុងការប្រកួតនេះដោយសារតែជំងឺ Covid-19 រាតត្បាត”។
កីឡាករវាយកូនបាល់លំដាប់ខ្ពស់បំផុតរបស់អង់គ្លេស Dan Evans និង Johanna Konta ត្រូវបង្ខំចិត្តដកខ្លួនចេញពីអូឡាំពិកបន្ទាប់ពីធ្វើតេស្តវិជ្ជមានជំងឺកូវីដ–១៩ ហើយខែនេះ Amber Hill ក៏ត្រូវដកខ្លួនចេញពីការប្រកួតប្រជែងផ្នែកស្ត្រីដែរនៅថ្ងៃពុធបន្ទាប់ពីធ្វើតេស្តវិជ្ជមានដូចគ្នា។
Murray ដែលមិនអាចធ្វើដំណើរទៅអូស្ត្រាលីកាលពីខែមករាបន្ទាប់ពីធ្វើតេស្តវិជ្ជមានជំងឺ Covid-19 បាននិយាយថា “វាបានកើតឡើងចំពោះខ្ញុំមុនពេលព្រឹត្តិការណ៍ Australian Open ហើយខ្ញុំបានវង្វេងស្មារតី ។ អរគុណណាស់ដែលខ្ញុំអាចប្រកួតប្រជែងក្នុងកម្មវិធី Grand Slam មួយផ្សេងទៀត២–៣ខែក្រោយមកប៉ុន្តែប្រសិនបើអ្នកបានត្រៀមអ្វីមួយក្នុងរយៈពេល៥ឆ្នាំ ហើយអ្វីដែលកើតឡើងចំពោះអ្នកវាពិតជាសាហាវណាស់។ ដូច្នេះមានការថប់បារម្ភ ប៉ុន្តែពីអ្វីដែលខ្ញុំបានឃើញមនុស្សគ្រប់គ្នាយកចិត្តទុកដាក់លើការអនុវត្តការការពារយ៉ាងម៉ឺងម៉ាត់ សង្ឃឹមថាវានឹងមិនមានបញ្ហាច្រើនពេកទេ”។
អតីតកីឡាករលេខ១ពិភពលោក Murray ធ្លាប់បានឈ្នះការប្រកួតជាប់ៗគ្នានៅឯ Grand Slam ជាលើកដំបូងក្នុងរយៈពេល៤ឆ្នាំនៅពេលដែលគាត់ឈានដល់ជុំទី៣ក្នុងព្រឹត្តិការណ៍ Wimbledon ឆ្នាំនេះ។ បុរសវ័យ៣៤ឆ្នាំរូបនេះបាននិយាយថា គាត់ចាំបាច់ត្រូវថ្លឹងថ្លែង ប្រសិនបើការខិតខំប្រឹងប្រែងទាំងអស់សមនឹងទទួលបានផលនៅពេលប៉ះកីឡាករកាណាដា Denis Shapovalov ។
Murray ក៏នឹងលេងក្នុងការប្រកួតជាគូជាមួយ Joe Salisbury ផងដែរ។ គូនេះប្រឈមមុខនឹងកីឡាករ Pierre-Hugues Herbert និង Nicolas Mahut ។
គួរបញ្ជាក់ថា Roger Federer, Rafael Nadal និង Serena Williams ស្ថិតក្នុងចំណោមកីឡាករល្បីៗ ដែលមិនចូលរួមប្រកួតក្នុងព្រឹត្តិការណ៍កីឡាអូឡាំពិកនៅទីក្រុងតូក្យូទេ ប៉ុន្តែម្ចាស់ជើងឯក Wimbledon គឺ Novak Djokovic និង Ashleigh Barty ស្ថិតនៅក្នុងប្រទេសជប៉ុនរួមជាមួយកីឡាការិនី Naomi Osaka ដែរ។ កីឡាករវាយតឺន្នីសលេខ១ពិភពលោក Djokovic នឹងប្រកួតប្រជែងដើម្បីដណ្តើមមេដាយមាស ដោយធ្លាប់បានទទួលជោគជ័យក្នុងព្រឹត្តិការណ៍ Australian Open, French Open និង Wimbledon ក្នុងឆ្នាំ២០២១រួចទៅហើយ ។ គាត់នឹងបើកយុទ្ធនាការប្រកួតដំបូងរបស់គាត់ទល់នឹងលេខ១៣៩ពិភពលោករបស់បូលីវីកីឡាករ Hugo Dellien ៕
ដោយ៖ ភារៈ(រូបភាព៖ BBC Sport)
