សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបេីករថយន្តTundra ទាំងស្រវឹងស្រាបោះពួយទៅបុកសំយាបផ្ទះប្រជាពលរដ្ឋធ្វើឱ្យបាក់ធ្លាក់ដល់ដី រីឯរថយន្តទៅមុខលែងរួចនិងរងការខូចខាតយ៉ាងដំណំ ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១ និង១០នាទីយប់រំលងអធ្រាត្រឈានចូលថ្ងៃទី២៥ ខែកក្កដា ឆ្នាំ២០២១ នៅចំណុចមុខហាងមីហឹរ៧យ៉ាង តាមបណ្តោយផ្លូវលេខ៣៧១ ក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញរថយន្តម៉ាក Tundra ពណ៌ស្ករ ពាក់ស្លាកលេខ ភ្នំពេញ2BJ-0419បេីកបរដោយបុរសម្នាក់ធ្វើដំណើរតាមបណ្ដោយផ្លូវលេខ៣៧១ ពីកើតទៅលិចក្នុងល្បឿនលឿន លុះមកដល់ចំណុចកើតហេតុខាងលើសង្ស័យអ្នកបើកបរស្រវឹងស្រាខ្លាំងបានរេចង្កូតមកខាងស្ដាំដៃជ្រុលទៅបុកសំយាបផ្ទះប្រជាពលរដ្ឋបណ្ដាលឲ្យបាក់ធ្លាក់ដល់ដីរងការខូចខាតខ្ទេចខ្ទី។រីឯរថយន្តបង្ករងការខូចខាតផ្នែកខាងមុខយ៉ាងដំណំផងដែរ តែមិនធ្វេីឲ្យមនុស្សរងរបួសនោះទេ ។
ក្រោយកើតហេតុ សមត្ថកិច្ចមូលដ្ឋាននិងជំនាញចរាចរណ៍បានចុះមកដល់កន្លែងកើតហេតុនិងមានតំណាងខាងរថយន្តបង្កចុះមកធ្វើការចរចានិងសម្របសម្រួលគ្នាជាមួយភាគីម្ចាស់ផ្ទះដើម្បីបញ្ចប់រឿងនៅនឹងកន្លែងកើតហេតុ៕
ដោយ ៖ ភារ៉ា ដង្កោ
