សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារសារព័ត៌មានថៃ Bangkok Post នៅថ្ងៃអាទិត្យ ទី២៥ ខែកក្កដា ឆ្នាំ២០២១នេះ បានដកស្រង់ចេញផ្សាយពីក្រសួងសុខាភិបាលថៃ បានរាយការណ៍នៅថ្ងៃអាទិត្យនេះ ពីការបន្តរកឃើញករណីឆ្លងជំងឺ COVID-19 ថ្មីៗចំនួន ១៥,៣៣៥ករណី និង អ្នកជំងឺចំនួន ១២៩នាក់បន្ថែមទៀត ក៏ត្រូវបានរាយការណ៍ថាស្លាប់ផងដែរ ក្នុងរយៈពេល ២៤ម៉ោងចុងក្រោយនេះ។
សារព័ត៌មានថៃ Bangkok Post បានបញ្ជាក់ពីរបាយការណ៍របស់ក្រសួងសុខាភិបាលថៃ ថា៖ ក្នុងចំណោមករណីឆ្លងថ្មីៗខាងលើ គឺ១៤,៦៩៤ករណី ត្រូវបានរកឃើញនៅលើប្រជាជនថៃទូទៅ និង៦៤១ករណី ត្រូវបានរកឃើញលើអ្នកទោស នៅតាមពន្ធនាគារ។ ក្រៅពីការរកឃើញករណីឆ្លងថ្មីៗនោះ អ្នកជំងឺចំនួន ៦,៩០៤នាក់ផ្សេងទៀត ត្រូវបានអនុញ្ញាតឱ្យចាកចេញពីមន្ទីរពេទ្យ ក្រោយជាសះស្បើយ។
ប្រទេសថៃ រហូតមកទល់ពេលនេះ បានកត់ត្រានូវករណីឆ្លងសរុប នៅទូទាំងប្រទេសចំនួន ៤៩៧,៣០២ករណី ក្នុងនោះមានអ្នកស្លាប់ ៤,០៥៩នាក់ និងអ្នកជាសះស្បើយ ៣៣៤,៦៩៣នាក់។ ដោយឡែកសម្រាប់ការចាក់វ៉ាក់សាំងវិញ ថៃសម្រេចបានយ៉ាងហោចជា ១៥លានដូស ក្នុងនោះមនុស្សច្រើនជាង៣លាននាក់ នៃប្រជាជនសរុបជិត៧០លាននាក់ ចាក់បានគ្រប់ដូស។
គួរបញ្ជាក់ថា កាលពីថ្ងៃសុក្រសប្ដាហ៍នេះ ប្រមុខកងទ័ពថៃ លោកឧត្ដមសេនីយ៍ Narongphan Jitkaewtae ក៏បានចេញបទបញ្ជាឱ្យកងទ័ពចូលរួមចំណែកក្នុងការរៀបចំ ពិធីបុណ្យសពសម្រាប់អ្នកស្លាប់ដោយសារ COVID-19ផងដែរ។
បេីតាមលោក Narongphan Jitkaewtae រាល់អង្គភាពកងទ័ពទាំងអស់មានអង្គភាពរៀបចំពិធីបុណ្យសពមួយ ដែលទទួលខុសត្រូវលើការរៀបចំពិធីបុណ្យសព សម្រាប់កងទ័ពដែលបានស្លាប់។ ប្រមុខកងទ័ពថៃរូបនេះ បន្ថែមទៀតថា កងទ័ពនឹងប្រមូលសាកសពក៏ដូចជាកំណត់អត្តសញ្ញាណសពដើម្បីជួយសម្រួលដល់គ្រួសារ ជនរងគ្រោះក្នុងការបូជាសព។ចំណែកអង្គភាពរៀបចំពិធីបុណ្យសពក៏អាចប្រើប្រាស់ជំនាញ និងចំណេះរបស់ខ្លួនក្នុងការប្រមូលសពនៅក្នុងសមរភូមិយកមកជួយ គ្រួសារជនរងគ្រោះស្លាប់ដោយសារ COVID-19 ដើម្បីរៀបចំពិធីបុណ្យសពផងដែរ៕
ដោយ៖ស តារា
