សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រសួងអប់រំយុវជននិងកីឡា បានចេញសេចក្តីប្រកាសព័ត៌មាន ស្តីពី ការដាក់ឱ្យដំណើរការសាកល្បង នៃគេហទំព័រ “ទូរសិក្សា” www.duraseksa.com សម្រាប់គាំទ្របន្ថែមដល់ដំណើរការរៀន និងបង្រៀនជាលក្ខណៈបណ្ដុំ ។
ក្រសួងអប់រំ យុវជន និងកីឡា សូមជម្រាបជូនគណៈគ្រប់គ្រងគ្រឹះស្ថានសិក្សា បុគ្គលិកអប់រំ សិស្សានុសិស្ស និងសាធារណជនទាំងអស់ ជ្រាបថា៖ ក្រសួងនឹងដាក់ឱ្យដំណើរការសាកល្បងនូវគេហទំព័រ www.duraseksa.com ចាប់ពីថ្ងៃផ្សាយដំណឹងនេះតទៅ សម្រាប់គាំទ្របន្ថែមដល់ការរៀន និងបង្រៀនជា លក្ខណៈបណ្ដុំ ក្នុងបរិការណ៍ នៃការទប់ស្កាត់ការរាលដាលជំងឺកវីដ-១៩។
គេហទំព័រ www.duraseksa.com ជាគេហទំព័របន្ថែមថ្មីមួយទៀតរបស់ក្រសួងអប់រំ យុវជន និងកីឡា ដែលមានបញ្ចូលវីដេអូ នៃការបង្រៀនគ្រប់មេរៀន និងគ្រប់មុខវិជ្ជា សម្រាប់សិស្សានុសិស្សគ្រប់កម្រិតថ្នាក់ ទាំងអស់ ចាប់ពីមត្តេយ្យសិក្សា រហូតដល់មធ្យមសិក្សាទុតិយភូមិ។ វីដេអូនៃការបង្រៀនទាំងអស់ត្រូវបាន ផលិតឡើងដោយនាយកដ្ឋានអប់រំកុមារតូច នាយកដ្ឋានបឋមសិក្សា នាយកដ្ឋានមធ្យមសិក្សាចំណេះ ទូទៅ និងកម្មវិធីសាលារៀនជំនាន់ថ្មី ព្រមទាំងមានកិច្ចសម្របសម្រួលពីមជ្ឈមណ្ឌលសម្រាប់ការអប់រំឌីជីថល និងពីចម្ងាយ។ បន្ថែមពីនេះ គេហទំព័រក៏បានបញ្ជូលវីដេអូឯកសារ និងវីដេអូ នៃការបង្រៀនសម្រាប់ការអប់រំ ក្រៅប្រព័ន្ធ ការអភិវឌ្ឍយុវជន ការបណ្តុះបណ្តាលគ្រូ និងមាតិកាឌីជីថលមួយចំនួនទៀត។ លោកគ្រូ អ្នកគ្រូ និងសិស្សានុសិស្សទាំងអស់ ត្រូវធ្វើការចុះឈ្មោះជាសមាជិកជាមួយគេហទំព័រ និងចំណាយពេលរៀនដោយ ការទស្សនាវីដេអូ នៃការបង្រៀនតាមមេរៀន នៃមុខវិជ្ជានីមួយៗ និងកម្រិតថ្នាក់មុនពេលចូលរៀនជាបណ្តុំ។ អាស្រ័យដូចបានជម្រាបជូនខាងលើសូម គណៈគ្រប់គ្រងគ្រឹះស្ថានសិក្សា បុគ្គលិកអប់រំ សិស្សានុសិស្ស និងសាធារណជនទាំងអស់ ចូលទៅកាន់គេហទំព័រ www.duraseksa.com ដើម្បីស្វែងរកព័ត៌មានបន្ថែមតាមការគួរ៕
ដោយ៖ សុខ ខេមរា
