សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ នៅព្រឹកថ្ងៃអង្គារ ១២ រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២ ខែវិច្ឆិកា ឆ្នាំ២០២១ លោក ឧត្តមសេនីយ៍ទោ សេង ធារិន មេបញ្ជាការរងនាយសេនាធិការ យោធភូមិភាគទី៥ បានអញ្ជើញជាអធិបតីភាព ក្នុងពិធីប្រកាសតែងតាំងផ្លាស់ប្ដូរមុខងារ មេបញ្ជាការ វរសេនាតូចថ្មើរជើងលេខ៥១៣ នៅទីបញ្ជាការកងពលតូចថ្មើរជើងលេខ៥១។
សូមបញ្ជាក់ថា លោកវរសេនីយ៍ត្រី គង់ សារ៉ុម ត្រូវបានតែងតាំងជា មេបញ្ជាការ វរសេនាតូចថ្មើរជើងលេខ៥១៣ ជំនួសលោកវរសេនីយ៍ទោ យូ សុគន្ធភក្ដី ដែលត្រូវបានតែងតាំងជាមេបញ្ជាការរង កងពលតូចថ្មើរជើងលេខ៥១។
ថ្លែងក្នុងពិធីប្រកាសមុខងារនាឱកាសនោះ លោកឧត្តមសេនីយ៍ទោ សេង ធារិន បានលើកឡើងថា មេដឹកនាំដែលល្អ គឺត្រូវមានលក្ខណៈសម្បត្តិបីយ៉ាង៖ «១.សុខភាព, ២.សមត្ថភាព, និង៣.គុណធម៌»។ លោកឧត្តមសេនីយ៍ទោ បន្តថា ជាមួយនឹងលក្ខណៈសម្បត្តិទាំងបីនេះ ថ្នាក់ដឹកនាំក៏ត្រូវប្រកាន់ខ្ជាប់នូវសត្យានុម័ត និងអត្តនោម័ត នៅក្នុងការដឹកនាំ ទើបធ្វើឲ្យអង្គភាពមានការរីកចម្រើន។ អនុវត្តឲ្យបានមឹងម៉ាត់បទបញ្ជាដែលបានសម្រេចរួមគ្នា សាមគ្គីឯកភាព ដឹកនាំអង្គភាពឲ្យបានល្អ ធ្វើយ៉ាងណាកុំឲ្យបែកបាក់សាមគ្គីភាពផ្ទៃក្នុង។
ជាមួយគ្នានោះ លោកឧត្តមសេនីយ៍ទោ សេង ធារិន ក៏បានធ្វើការកោតសរសើរដល់ថ្នាក់ដឹកនាំគ្រប់ជាន់ថ្នាក់ របស់វរសេនាតូចថ្មើរជើងលេខ៥១៣ និងកងពលតូចថ្មើរជើងលេខ៥១ ដែលបានប្តេជ្ញាចិត្តខ្ពស់ ក្នុងការខិតខំពុះពារជម្នះនូវរាល់ឧបសគ្គ រហូតសម្រេចបាននូវស្នាដៃ និងសមិទ្ធិផលគួរឱ្យកត់សម្គាល់។ អនុវត្តតាមតួនាទី និងភារកិច្ចរបស់ខ្លួនស្របតាមគោលនយោបាយ របស់រាជរដ្ឋាភិបាល ក្នុងនោះកម្លាំងបានពង្រឹងខឿនការពារជាតិ ម្ចាស់ការក្នុងការបំពេញភារកិច្ចស្នូលរបស់ខ្លួន ធានាថែរក្សាបាននូវសន្តិភាព ស្ថិរភាពនយោបាយ សន្តិសុខ សុវត្ថិភាព និងការអភិវឌ្ឍជូនជាតិ មាតុភូមិ និងប្រជាពលរដ្ឋ។
ជាចុងបញ្ចប់ លោកឧត្តមសេនីយ៍ទោ សេង ធារិន ក៏បានផ្ដាំផ្ញើដល់នាយទាហាន នាយទាហានរង និងពលទាហានទាំងអស់សូមចៀសផុតពីជំងឺកាចសាហាវកូវីដ-១៩ និង ប្តេជ្ញារួមគ្នាប្រយុទ្ធប្រឆាំងដើម្បីបញ្ចប់ការឆ្លងរីករាលដាលជំងឺកូវីដ-១៩ និងបន្តអនុវត្តវិធានការ ៣ការពារ ៣កុំ របស់សម្តេចតេជោឲ្យបានដាច់ខាត៕
ដោយ ៖ សិលា
