ភ្លៀងធ្លាក់ខ្លាំងបង្កជាទឹកជំនន់តាមមាត់ទន្លេចៅប្រាយ៉ាប្រទេសថៃ

ចែករំលែក៖

តំបន់ជាច្រើននៃទីក្រុងបាងកក កំពុងជួបការលំបាកយ៉ាងខ្លាំង ដោយសារតែរលកទី១ នៃទឹកជំនន់ដែលត្រូវបានគេព្យាករថា នឹងបន្តរហូតដល់ថ្ងៃទី១៣ ខែវិច្ឆិកា។ ទឹកជំនន់នៅសប្តាហ៍ក្រោយនេះ ត្រូវបានគេរំពឹងថា នឹងប៉ះពាល់ដល់តំបន់ទំនាបចំនួន០៥ដែលស្ថិតនៅជុំវិញស្ពាន Krung Thon ក្នុងសង្កាត់ Bang Phlat។
ប្រជាពលរដ្ឋដែលរស់នៅតាមបណ្ដោយមាត់ទន្លេក្នុងតំបន់ចំនួន ០៥ នៃទីក្រុងបាងកក ប្រទេសថៃ ដែលត្រូវបានជន់លិចដោយទឹកជំនន់នាពេលថ្មីៗនេះ ត្រូវបានគេប្រាប់ឱ្យត្រៀមខ្លួនជាថ្មីសម្រាប់ទឹកជំនន់ស្រដៀងគ្នានេះនៅសប្តាហ៍ក្រោយ។
រដ្ឋបាលទីក្រុងបាងកក (BMA) បានចេញការព្រមានកាលពីអង្គារសប្តាហ៍នេះដល់ប្រជាពលរដ្ឋនៅតំបន់ដែលងាយរងគ្រោះដោយទឹកជំនន់ ជាពិសេសអ្នកដែលរស់នៅតាមបណ្ដាយមាត់ទន្លេ ចៅ ប្រាយ៉ា (Chao Phraya) ឱ្យត្រៀមលក្ខណៈទុកជាមុន ដែលវាអាចនឹងជន់លិចម្តងទៀត ចាប់ពីថ្ងៃទី២០-២៦ ខែវិច្ឆិកា នៅពេលជំនន់ទឹកទន្លេ នឹងកើនឡើងដល់កម្រិតកំពូល៕ ដោយ៖ធីរីណា