សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងបណ្តាលឱ្យមនុស្សប្រុសស្រីចំនួន០៣នាក់ មិនស្គាល់អត្តសញ្ញាណបានស្លាប់ភ្លាមៗនៅកន្លែងកើតហេតុ ។
ហេតុការណ៍នេះបានកើតឡើងកាលពីយប់ថ្ងៃទី១០ ខែវិច្ឆិកា ឆ្នាំ២០២១ នៅតាមបណ្តោយផ្លូវជាតិលេខ៤ ត្រង់ចន្លោះគីឡូម៉ែត្រលេខ ៤៤-៤៥ ស្ថិតក្នុងភូមិរលាំងសង្កែ សង្កាត់សុព័រទេព ក្រុងច្បារមន ខេត្តកំពង់ស្ពឺ ។
សមត្ថកិច្ចមូលដ្ឋានបានឱ្យដឹងថា ក្រោយកើតហេតុគេឃើញរថយន្ដម៉ាក ហ្វដ រ៉ាប់ទ័រ (FORD RAPTOR) ពណ៌ស មានអ្នកដោះស្លាកលេខចេញ និងមិនទាន់ស្គាល់អត្តសញ្ញាណអ្នកបើកនោះទេដោយបានចុះរត់គេចខ្លួនបាត់។ មុនកើតហេតុរថយន្តនេះបានបើកតាមបណ្តោយផ្លូវជាតិលេខ៤ ក្នុងទិសដៅពីលិចទៅកើត ខណៈមកដល់ចំណុចកើតហេតុ បានបុកម៉ូតូមួយគ្រឿង ម៉ាកហុងដា ឌ្រីម ពាក់ស្លាកលេខ តាកែវ 1H-6748 អ្នកបើកបរម៉ូតូគឺជាបុរសម្នាក់ បានឌុបមនុស្សស្រី២នាក់ (មិនទាន់ស្គាល់អត្តសញ្ញាណទាំងអស់) ដែលកំពុងតែបើកបរឆ្លងផ្លូវ ពីទិសខាងត្បូងទៅទិសខាងជើង បណ្តាលឲ្យស្លាប់ទាំងបីនាក់ភ្លាមៗនៅនឹងកន្លែង។
បន្ទាប់ពីកើតហេតុសពជនរងគ្រោះទាំងបីនាក់ ត្រូវបានតម្កល់នៅមន្ទីរពេទ្យបង្អែក ខេត្តកំពង់ស្ពឺ រង់ចាំក្រុមគ្រួសារមកយកទៅធ្វើបុណ្យតាមប្រពៃណី។ ចំណែកវត្ថុតាង ត្រូវបានសមត្ថកិច្ចជំនាញយកទៅរក្សាទុកនៅការិយាល័យនគរបាលចរាចរណ៍ផ្លូវគោក ដើម្បីស្រាវជ្រាវតាមនីតិវិធី៕
ដោយ៖ ជ្រោយពេជ្រ
