មនុស្សប្រុសស្រី៥នាក់រងរបួសធ្ងន់និងស្រាលដោយគ្រោះថ្នាក់ចរាចរណ៍២កន្លែងផ្សេងគ្នានៅស្រុករំដួលនិងស្រុករមាសហែក

ខេត្តស្វាយរៀង៖ យ៉ាងហោចណាស់ក៏មានមនុស្សប្រុសស្រី៥នាក់ដែរបានរងរបួសធ្ងន់និងស្រាលដោយសារករណីគ្រោះថ្នាក់ចរាចរណ៍២កន្លែងផ្សេងគ្នានៅក្នុងស្រុករំដួលនិងស្រុករមាសហែក។

   យោងតាមសមត្ថកិច្ចនគរបាលបានឱ្យដឹងថា ករណីទី១បានកើតឡើងកាលពីវេលាម៉ោង១០និង៤៥នាទីព្រឹកថ្ងៃទី០១ ខែកុម្ភៈឆ្នាំ២០២២ នៅចំណុចលើផ្លូវជាតិលេខ១៣ ស្ថិតក្នុងភូមិត្រពាំងដំរី ឃុំ កំពង់អំពិល ស្រុករំដួល ដោយមានម៉ូតូម៉ាកហុងដាឌ្រីម សេ១២៥ ស៊េរីឆ្នាំ ២០២០ ពណ៌ក្រហម ពាក់ស្លាកលេខ ស្វាយរៀង១P-៤៥២៥បើកបរដោយឈ្មោះម៉ី សារ៉ា ភេទប្រុស អាយុ២២ឆ្នាំ និងរួមដំណើរដោយប្រពន្ធឈ្មោះ ជៃ ស្រីនិច  អាយុ២៣ឆ្នាំ រស់នៅភូមិត្រពាំងចំបក់ ឃុំស្វាយចេក ស្រុករំដួល ខេត្តស្វាយរៀង។  ពេលនោះក៏ស្រាប់តែមានម៉ូតូមួយគ្រឿងទៀតម៉ាកហុងដាឌ្រីម សេ១២៥ ស៊េរីឆ្នាំ ២០១៧ ពណ៌ខ្មៅ ពាក់ស្លាកលេខ ស្វាយរៀង ១GI-៥០៣៩ បើកបរដោយឈ្មោះឡាញ់ ភារុន អាយុ ១៨ឆ្នាំ រស់នៅភូមិធ្នង់ ឃុំថ្នាធ្នង់ ស្រុករំដួល ខេត្តស្វាយរៀងបានបើកបត់ឆ្វេងខ្វះការប្រុងប្រយ័ត្នក្នុងទិសដៅស្របគ្នាក៏បានបុកគ្នាយ៉ាងពេញទំហឹងបង្កការភ្ញាក់ផ្អើលតែម្ដង។

   បច្ចុប្បន្នមធ្យោបាយធ្វើដំណើរទាំងពីរគ្រឿងសមត្ថកិច្ចបានធ្វើការវាស់វែងនិងអូសយកទៅរក្សាទុកនៅនៅប៉ុស្តិ៍នគរបាលរដ្ឋបាលកំពង់អំពិលដើម្បីដោះស្រាយតាមច្បាប់។

   ករណីទី២បានកើតឡើងកាលពីវេលាម៉ោង៧និង៣០នាទីយប់ថ្ងៃទី១ខែកុម្ភៈឆ្នាំ ២០២២ លើផ្លូវលំនៅចំណុចភូមិព្រៃរំដេង ឃុំជ្រៃធំ ស្រុករមាសហែក មានម៉ូតូមួយគ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ស្វាយរៀង ១Q -៤៦៤៨ បើកបរដោយឈ្មោះយន់ សុផាត អាយុ២៧ឆ្នាំ មុខរបរកសិករ រស់នៅភូមិព្រៃរំដេង ឃុំជ្រៃធំ ស្រុករមាសហែក ក្នុងទិសដៅពីត្បូងទៅជើងមិនប្រកាន់ស្ដាំក៏បុកជាមួយម៉ូតូមួយគ្រឿងទៀតម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ១CA-២៩៩៦បើកបរដោយឈ្មោះប្រាក់ ផន អាយុ៦៥ឆ្នាំ មុខរបរកសិករ រស់នៅភូមិព្រៃផ្តៅទី១ ឃុំមុខដា ស្រុករមាសហែកក្នុងទិសដៅពីជើងទៅត្បូងបញ្ច្រាសគ្នាពេញទំហឹងបង្កការភ្ញាក់ផ្អើលនិងអ្នកឃើញហេតុការណ៍បានរាយការណ៍ទៅសមត្ថកិច្ចមកធ្វើអន្តរាគមន៍និងដឹកជនរងគ្រោះទៅសង្គ្រោះនៅមន្ទីរពេទ្យ៕

ដោយ៖យឹម សុថាន