សារព័ត៌មាន នគរវត្ត តែងតែនាំមុខគេជានិច្ច
ប្រភពព័ត៌មានដែលចេញផ្សាយដោយ ESPN បានឲ្យដឹងថា ក្លិបបិសាចក្រហម Manchester United បានស្នើសុំកីឡាកររួមទាំង Paul Pogbaពន្យារពេលការសម្រេចចិត្តលើអនាគតរបស់ពួកគាត់រហូតដល់ក្លិបជ្រើសរើសអ្នកចាត់ការថ្មី។
United សង្ឃឹមថា ជម្រើសរបស់អ្នកចាត់ការទូទៅអាចបញ្ចុះបញ្ចូល Pogba ឱ្យបន្តកិច្ចសន្យារបស់គាត់នៅ Old Trafford ជាជាងដើរចេញនៅរដូវក្តៅ។ កីឡាករ Anthony Martial និង Donny van de Beek ដែលអ្នកទាំង២បានចាកចេញក្នុងលក្ខខណ្ឌខ្ចីជើងក្នុងទីផ្សារដោះដូរកីឡាករខែមករា ក៏ត្រូវបានស្នើដោយនាយកបាល់ទាត់ John Murtough ឱ្យរង់ចាំរហូតដល់អ្នកចាត់ការថ្មីត្រូវបានតែងតាំងមុននឹងសម្រេចចិត្តថា ពួកគេចង់ទៅលេងនៅរដូវកាលក្រោយ។
លោក Mauricio Pochettino និងលោក Erik ten Hag ស្ថិតក្នុងបញ្ជីជ្រើសរើស៥នាក់សម្រាប់ការងារនេះ។ គ្រូបង្វឹកបណ្ដោះអាសន្នលោកRalf Rangnick ក៏មិនច្រានចោលនូវលទ្ធភាពដែលគាត់អាចបន្តតួនាទីនេះរយៈពេលមួយឆ្នាំទៀតផងដែរ។
រហូតមកដល់ពេលនេះ Pogba បានបដិសេធមិនចុះហត្ថលេខាលើការបន្ត ហើយប្រសិនបើលក្ខខណ្ឌថ្មីមិនត្រូវបានយល់ព្រម នឹងក្លាយជាកីឡាករគ្មានតម្លៃផ្ទេរនៅថ្ងៃទី៣០ ខែមិថុនាខាងមុខ។ Barcelona, Real Madrid, Juventus និង Paris Saint-Germain សុទ្ធតែបានចុះបញ្ជីការចាប់អារម្មណ៍កីឡាកររូបនេះ ប៉ុន្តែខ្សែបម្រើសញ្ជាតិបារាំងដែលមានសំណើលើតុពី United មិនបានធ្វើការសម្រេចចិត្តអំពីក្លិបបន្ទាប់របស់ខ្លួនទេ។
Martial និង Van de Beek ដែលបានចូលរួមជាមួយ Sevilla និង Everton រៀងៗខ្លួន ត្រូវបានគេរំពឹងថា នឹងត្រឡប់មក Old Trafford នៅពេលដែលកិច្ចព្រមព្រៀងបណ្តោះអាសន្នរបស់ពួកគេបញ្ចប់នៅរដូវក្តៅ។ អ្នកទាំងពីរនៅតែបើកចិត្តទូលាយអំពីអនាគតរបស់ពួកគេនៅ Man Utd ហើយថា ពួកគេត្រូវបានគេណែនាំឱ្យរង់ចាំមើលថា តើពួកគេជាផ្នែកនៃគម្រោងរបស់អ្នកចាត់ការថ្មីឬអត់?
កីឡាករ Dean Henderson និង Eric Bailly មិនបានផ្លាស់ប្តូរក្នុងខែមករាទេ ប៉ុន្តែមានបំណងចង់លេងបាល់ទាត់ក្នុងជម្រើសដំបូងឱ្យបានទៀងទាត់ជាងនេះ។ ក្រុមប្រឹក្សាភិបាលរបស់ United បានរារាំងការផ្លាស់ប្តូរដែលបានស្នើឡើងរបស់ Jesse Lingard ទៅ Newcastle នៅថ្ងៃផុតកំណត់ បើទោះបីជាលោក Rangnick បានផ្តល់ពរជ័យដល់គាត់ ហើយខ្សែបម្រើអង់គ្លេសត្រូវបានគេរំពឹងថា នឹងចាកចេញដោយមិនគិតថ្លៃក្នុងរដូវក្តៅនេះ។
ទន្ទឹមនឹងនេះដែរ United បានប្រកាសថា ខ្សែប្រយុទ្ធ Dillon Hoogewerf ដែលមានអាយុ១៨ឆ្នាំបានចូលរួមជាមួយក្លិប BorussiaMonchengladbach ក្នុងការផ្ទេរអចិន្រ្តៃយ៍។ ក្លិបបិសាចក្រហមបានយល់ព្រមលើតម្លៃដែលមិនបានបង្ហាញសម្រាប់កីឡាករវ័យក្មេងសញ្ជាតិហូឡង់រូបនេះនៅឡើយទេ ៕
ដោយ៖ ភារៈ(រូបភាព ៖ ESPN)
