សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ រថយន្តមួយគ្រឿងបើកបត់ឆ្វេងមិនប្រយ័ត្នបណ្ដាលឱ្យបុកម៉ូតូមួយគ្រឿងធ្វើឱ្យនារី២នាក់ជាអ្នកបើកបរម៉ូតូនិងជាអ្នករួមដំណើរជាមួយរងរបួសធ្ងន់និងស្រាល។
ករណីនេះបានកើតឡើងកាលពីថ្ងៃទី០៤ ខែកុម្ភៈ ឆ្នាំ២០២២ វេលាម៉ោង១៨ និង២០នាទី ត្រង់ចំណុចផ្លូវលេខ១១៥ កែងផ្លូវលេខ២១១ ស្ថិតក្នុងភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្ដាល។
មន្ត្រីនគរបាលចរាចរណ៍ក្រុងតាខ្មៅបានឱ្យដឹងថា រថយន្តបង្កម៉ាក NISSAN ពណ៌ស ពាក់ស្លាកលេខភ្នំពេញ3C-8098 បើកបរដោយឈ្មោះ ជឹម សុខហាយ ភេទប្រុស អាយុ៣៤ឆ្នាំ មានទីលំនៅភូមិជូស ឃុំជីខ្មា ស្រុកទ្រាំង ខេត្តតាកែវ។
ចំណែកម៉ូតូជនរងគ្រោះម៉ាកSUZUKI NEX ពណ៌សលាយលឿង ពាក់ស្លាកលេខកណ្ដាល1V-6890 បើកបរដោយឈ្មោះថន កញ្ញា ភេទស្រី អាយុ១៦ឆ្នាំ (របួសស្រាល) និងមានអ្នករួមដំណើរពីក្រោយឈ្មោះ ចំរើន វណ្ណាពៅ ភេទស្រី អាយុ១៦ឆ្នាំ (របួសធ្ងន់)។ ជនរងគ្រោះទាំងពីរមានទីលំនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្ដាល។
ប្រភពដដែលបន្តថា នៅមុនពេលកើតហេតុគេបានឃើញរថយន្តមួយគ្រឿងម៉ាក NISSAN ពណ៌ស ពាក់ស្លាកលេខភ្នំពេញ3C-8098 បើកបរក្នុងទិសដៅពីកើតទៅលិច លុះមកដល់ចំណុចកើតហេតុបានបត់ឆ្វេង ក៏បានបុកជាមួយម៉ូតូមួយគ្រឿងម៉ាកSUZUKI NEX ពណ៌ស+លឿង ពាក់ស្លាកលេខកណ្ដាល1V-6890 ដែលបើកបរដោយឈ្មោះថន កញ្ញា ភេទស្រី អាយុ១៦ឆ្នាំ (របួសស្រាល) និងអ្នករួមដំណើរពីក្រោយឈ្មោះចំរើន វណ្ណាពៅ ភេទស្រី អាយុ១៦ ឆ្នាំ (របួសធ្ងន់)។
ក្រោយពីមានហេតុការណ៍កើតឡើង ជនរងគ្រោះត្រូវបានសាច់ញាតិដឹកយកទៅសង្រ្គោះនៅមន្ទីរពេទ្យសម្ភពផល្លីទាំង០២នាក់។ ចំពោះមធ្យោបាយដែលពាក់ព័ន្ធត្រូវបានកម្លាំងចរាចរណ៍ក្រុងតាខ្មៅយកទៅរក្សាទុកបណ្តោះអាសន្ននៅអធិការដ្ឋានដើម្បីចាត់ការតាមនីតិវិធី៕
ដោយ៖ស្អាងជ័យ
