សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តកុងតឺន័រមួយគ្រឿងបេីកបរក្នុងល្បឿនលឿនមិនប្រយ័ត្នបានជ្រុលទៅបុករថយន្តសាំយ៉ុងពីក្រោយពេញទំហឹងហេីយរុញទៅបុកឡំប្រឺតាមួយគ្រឿងពីក្រោយទៀតបណ្តាលឱ្យក្រឡាប់ផ្ងារជេីងធ្វេីឱ្យមនុស្សពីរនាក់រងរបួស។
ហេតុការណ៍នេះបានកេីតឡេីងកាលពីវេលាម៉ោង១០យប់ថ្ងៃទី០៥ ខែកុម្ភៈ ឆ្នាំ២០២២ នៅចំណុចមុខវត្តអរុណវតី តាមបណ្តោយផ្លូវជាតិលេខ៤ ក្នុងភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញឡំប្រឺតាមួយគ្រឿង ពណ៌ស ពាក់ស្លាកលេខភ្នំពេញ1IK-0942 និងរថយន្តសាំយ៉ុងពណ៌ស ពាក់ស្លាកលេខកំពង់ចាម2A- 0638 បើកតាមបណ្តោយផ្លូវជាតិលេខ៤ ក្នុងទិសដៅពីកេីតទៅលិច ខណៈមកដល់ចំណុចកេីតហេតុស្រាប់តែមានរថយន្តកុងតឺន័រក្បាលពណ៌ខៀវ ពាក់ស្លាកលេខភ្នំពេញ3D-0508 ធ្វេីដំណេីរមកពីក្រោយក្នុងល្បឿនលឿនមិនប្រយ័ត្នក៏ជ្រុលទៅបុករថយន្តសាំយ៉ុងពីក្រោយពេញទំហឹងបណ្តាលឱ្យរងការខូចខាតយ៉ាងដំណំ ហេីយរថយន្តសាំយ៉ុងក៏បន្តទៅបុកឡំប្រឺតាពីក្រោយទៀតបណ្តាលឱ្យក្រឡាប់ផ្ងារជេីងនិងធ្វេីឲ្យមនុស្សចំនួនពីរនាក់រងរបួសស្រាល។
នៅក្នុងហេតុការណ៍គ្រោះថ្នាក់ចរាចរណ៍ខាងលេីនេះបង្កឱ្យមានការកកស្ទះចរាចរណ៍យ៉ាងខ្លាំងផងដែរ។
ក្រោយកេីតហេតុសមត្ថកិច្ចបានចុះទៅដល់ ហើយធ្វេីការគូសវាសយករថយន្តនិងឡំប្រឺតាទៅអែបខាងដេីម្បីឱ្យភាគីទាំងបីនាក់សម្របសម្រួលគ្នា និងបានបញ្ជាចរាចរណ៍កុំឱ្យស្ទះកាន់តែខ្លាំងថែមទៀត៕
ដោយ៖សុខាសែនជ័យ
