សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានថ្លែងសារនៅលេីបណ្ដាញសង្គមហ្វេសប៊ុកផ្លូវការ នៅយប់ថ្ងៃសុក្រទី២៥ ខែកុម្ភៈ ឆ្នាំ២០២២នេះថា៖ “ខ្ញុំបានមកទីក្រុងប៊ែរឡាំងកាលពី៥០ឆ្នាំមុន គឺនារដូវក្តៅឆ្នាំ១៩៧២”។ កាលនោះជាសម័យសង្គ្រាមត្រជាក់ ក្រុងនេះនៅចែកជាពីរនៅឡើយ ដែលខាងកើតត្រួតត្រាដោយសហភាពសូវៀត ឯខាងលិចត្រួតត្រាដោយកំលាំងសម្ព័ន្ធមិត្តបីទៀតគឺ អាមេរិក អង់គ្លេស និងបារាំង (អ្នកឈ្នះសង្គ្រាមលោកលើកទី២)។ ដំណើរពេលនោះជាដំណើរកំសាន្តដោយចេញពីទីក្រុងម៉ូស្គូ ក្រោយបានទទួលសញ្ញាប័ត្របញ្ចប់មធ្យមសិក្សាកំរិតពីរ។
លោកឧបនាយករដ្ឋមន្ត្រី ប្រាក់ សុខុន បានថ្លែងបន្តថា ៥០ ឆ្នាំក្រាយ ខ្ញុំមានភ័ព្វសំណាងមកកាន់ទីក្រុងនេះជាលើកទីពីរ។ ប៉ុន្តែលើកនេះគឺមកបំពេញបេសកកម្មការទូតដ៏មានអត្ថន័យមួយ។ ហើយនេះក៏ជាដំណើរទស្សនកិច្ចរបស់រដ្ឋមន្ត្រីការបរទេសខ្មែរលើកទីមួយក្នុងរយៈពេល ២៧ ឆ្នាំ។
លោកឧបនាយករដ្ឋមន្ត្រី បានបញ្ជាក់បន្ថែមថា ឆ្នាំនេះកម្ពុជាជាប្រធានអាស៊ាន ហើយតំបន់ទាំងពីរ អឺរ៉ុបនិងអាស៊ី មានបញ្ហាធំដូចគ្នាដែលត្រូវដោះស្រាយដើម្បីការពារសន្តិភាព ស្ថិរភាព ដែលការពិតត្រូវបានរបូតចេញពីដៃយើងរួចទៅហើយ។
ទោះបីកំពុងវិលវល់នឹងវិបត្តិ និងការគំរាមកំហែងនៃការផ្ទុះសង្គ្រាមនៅអ៊ុយក្រែនក៏ដោយ លោកស្រី អាណាឡេណា ប៊ែរបក់ រដ្ឋមន្ត្រីការបរទេសអាល្លឺម៉ង់ បានរក្សាពាក្យសន្យារបស់គាត់ឆ្លៀតពេលទទួលខ្ញុំជាលក្ខណៈផ្លូវការ និងពិភាក្សាការងារជាមួយគ្នាពេញមួយម៉ោង។ ឆ្លៀតក្នុងឱកាសនោះ លោកឧបនាយករដ្ឋមន្ត្រី អរគុណលោកស្រីរដ្ឋមន្ត្រី រដ្ឋាភិបាល និងប្រជាជនអាល្លឺម៉ង់ដែលតែងតែគាំទ្រ និងឧបត្ថម្ហដល់បុព្វហេតុសន្តិភាព និងការអភិវឌ្ឍរបស់កម្ពុជាយើង។
ទន្ទឹមនឹងនេះ លោកឧបនាយករដ្ឋមន្ត្រី បានសង្កត់ធ្ងន់ថា លោករីករាយដែលបានជួបសំណេះសំណាលជាមួយបងប្អូនប្រជាពលរដ្ឋខ្មែរដែលរស់នៅប្រទេសអាល្លឺម៉ង់ ហើយក៏អរគុណដល់ពួកគាត់ដែលខំធ្វើដំណើរមកជួបរូបខ្ញុំផ្ទាល់៕
ដោយ៖ស តារា
