សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសមួយក្រុមដែលត្រឹមតែជាអ្នកស្គាល់គ្នាតាមរយៈរត់ឡំប្រឺតានិងម៉ូតូឌុបនៅកន្លែងតែមួយបានអង្គុយផឹកស៊ីជុំគ្នា។
លុះនៅពេលស្រវឹងស្រឿងៗស្រាប់តែមានបុរសម្នាក់ដែលប្រពន្ធមានកូនខ្ចីទូរស័ព្ទហៅឱ្យត្រឡប់ទៅផ្ទះវិញ ពេលនោះក៏មានបុរសម្នាក់តឿនឱ្យទៅផ្ទះ២ទៅ៣ដង ធ្វើឱ្យបុរសម្នាក់នោះខឹងក៏កើតជាហិង្សាវាយបាក់ម្រាមដៃម្ខាង។
ហេតុការណ៍នេះបង្កការភ្ញាក់ផ្អេីលកាលពីវេលាម៉ោងប្រមាណ១១និង៤០នាទីយប់ថ្ងៃទី២៧ ខែកុម្ភៈ ឆ្នាំ២០២២ នៅទល់មុខអាកាសយានដ្ឋានអន្តរជាតិភ្នំពេញ តាមបណ្តោយមហាវិថីសហព័ន្ធរុស្ស៊ី ក្នុងភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ ។
បុរសដែលត្រូវគេវាយនេះឈ្មោះ សុខ ពិសិដ្ឋ អាយុ២៤ឆ្នាំ ស្នាក់នៅផ្ទះជួលក្នុងភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ ។ ចំណែកជនដែលបង្កហិង្សាមិនត្រូវបានស្គាល់ឈ្មោះទេ តែជាជាងជួសជុលឡំប្រឺតា ស្នាក់នៅម្តុំផ្សារព្រៃទា ខណ្ឌពោធិ៍សែនជ័យ។
តាមប្រភពព័ត៌មានពីជនរងគ្រោះបានឱ្យដឹងថា នៅមុនពេលកើតហេតុរូបគាត់និងជនបង្កព្រមទាំងមិត្តភក្តិផ្សេងទៀតមានគ្នា៤នាក់បាននាំគ្នាផឹកស៊ីនៅចិញ្ចើមផ្លូវទល់មុខព្រលានយន្តហោះនិងដើម្បីរង់ចាំម៉ូយផង ។ ខណៈកំពុងផឹកស៊ីនោះ គេឃើញបុរសអ្នករត់ឡំប្រឺតាម្នាក់ស្រវឹងខ្លាំងជាងគេ ហើយប្រពន្ធកូនខ្ចីបានទូរស័ព្ទហៅជាច្រើនដងទៀតឱ្យទៅផ្ទះ។ពេលនោះគាត់បានប្រាប់អ្នករត់ឡំប្រឺតានោះឱ្យទៅផ្ទះទៅព្រោះប្រពន្ធទូរស័ព្ទមកច្រើនដងហើយ ។ ជនរងគ្រោះរៀបរាប់ទៀតថា ផ្ទុយទៅវិញបែរជាបុរសនោះនិយាយតបមកវិញថា ម៉េចខ្ញុំអត់មានលុយទិញស្រាមែនបានបងឯងដេញខ្ញុំ? ជាមួយគ្នានេះ ប្អូនធម៌របស់បុរសរត់ឡំប្រឺតារូបនេះដែលកំពុងផឹកស៊ីជាមួយគ្នា ក៏និយាយមកកាន់គាត់ដែរថា ម៉េចបានបងឯងនិយាយដាក់បងខ្ញុំអ៊ីចឹង? នៅពេលនោះដែរ ស្រាប់តែមិត្តភក្តិរបស់បុរសអ្នករត់ឡំប្រឺតាម្នាក់នោះបានយកកៅអីដែលកំពុងអង្គុយមកវាយរូបគាត់ ហើយគាត់យកដៃរងក៏បណ្តាលឱ្យបាក់មេដៃ។មិនត្រឹមតែប៉ុណ្ណោះ ជននោះបានយកទូរស័ព្ទរបស់គាត់១គ្រឿងបោកចោលនិងបានកាច់មែកឈើដេញវាយគាត់រត់ពេញផ្លូវ បន្ទាប់មកក៏រត់គេចខ្លួនបាត់ទៅ ។
ប្រភពព័ត៌មាននៅកន្លែងកើតហេតុបានឱ្យដឹងទៀតថា បុរសអ្នករត់ឡំប្រឺតាម្នាក់ដែលជាមិត្តភក្តិជនបង្កហិង្សា ត្រូវបានសមត្ថកិច្ចនាំយកទៅសួរនាំភ្លាមៗ តែដោយមិនបានប្រើអំពើហិង្សាទៅលើជនរងគ្រោះ សមត្ថកិច្ចក៏បានឱ្យត្រឡប់ទៅផ្ទះវិញទៅ ។
ចំណែកជនរងគ្រោះបានទៅដាក់ពាក្យបណ្ដឹងដើម្បីឱ្យសមត្ថកិច្ចជួយតាមឃាត់ខ្លួនជនបង្កខាងលើយកមកផ្តន្ទាទោសតាមច្បាប់ ៕
ដោយ៖សុខាសែនជ័យ
