សារព័ត៌មាន នគរវត្ត តែងតែនាំមុខគេជានិច្ច
អតីតអ្នកចាំទីក្រុមជម្រើសជាតិអ៊ីតាលី កីឡាករ Gianluigi Buffon បានបន្តកុងត្រារបស់គាត់ជាមួយក្លិប Parma រហូតដល់ឆ្នាំ២០២៤ ដែលមានន័យថា គាត់នឹងមានអាយុ៤៦ឆ្នាំនៅពេលដែលកុងត្រានេះផុតកំណត់។
អ្នកចាំទីដែលជួយឲ្យអុីតាលីឈ្នះជើងឯក World Cup វ័យ៤៤ឆ្នាំរូបនេះបានចូលរួមជាមួយក្លិបនៅ Serie B ម្តងទៀតក្នុងកិច្ចសន្យារយៈពេល២ឆ្នាំកាលពីរដូវក្តៅមុន។
Buffon បានជួយឲ្យក្រុមឈ្នះជើងឯក Serie A ចំនួន១០ដងជាមួយក្លិបJuventus និងបានលេងជាប់កំណត់ត្រា៦៥៧ប្រកួតក្នុងក្របខ័ណ្ឌកំពូលរបស់អុីតាលីមួយនេះ។
Buffon បាននិយាយថា “សម្រាប់ខ្ញុំ និងក្រុមគ្រួសាររបស់ខ្ញុំ នេះគឺជាថ្ងៃដ៏អស្ចារ្យ។ ខ្ញុំសង្ឃឹមក្លិប និងអ្នកគាំទ្រទាំងអស់នឹងសប្បាយចិត្ត”។
Buffon បានបន្ថែមថា “ការវិលត្រឡប់របស់ខ្ញុំទៅកាន់ Parma ត្រូវបានផ្សារភ្ជាប់ទៅនឹងទំនាក់ទំនង និងចំណងដ៏ជ្រាលជ្រៅដែលខ្ញុំតែងតែមានជាមួយទីក្រុងនេះ។ ប្រសិនបើខ្ញុំមិនជឿលើអ្វីដែល មាននៅក្នុងចិត្ត និងនៅក្នុងអ្វីដែលយើងកំពុងធ្វើនោះ ខ្ញុំមិនទទួលយកសំណើនេះទេ។ ខ្ញុំមានសុទិដ្ឋិនិយមចំពោះអនាគតរបស់ក្លិបនេះ ដែលវាជាការប្រជែងដ៏អស្ចារ្យនិងគួរឱ្យរំភើបសម្រាប់ខ្ញុំ”។Buffon បានប្រកាសពីកិច្ចសន្យាថ្មីក្នុងសន្និសីទសារព័ត៌មានមួយកាលពីថ្ងៃចន្ទ ដែលលោកត្រូវបានចូលរួមដោយប្រធានក្លិប Kyle Krause។ លោក Krause បាននិយាយថា “បន្ថែមពីលើគុណសម្បត្តិនៃភាពជាអ្នកដឹកនាំ គាត់មានគុណសម្បត្តិរបស់មនុស្សដ៏អស្ចារ្យ។ សម្រាប់ Parma ការសម្រេចចិត្តរបស់គាត់ក្នុងការបន្តជាមួយយើងគឺជាកិត្តិយស” ។
សូមបញ្ជាក់ថា អ្នកចាំទីវ័យជ្រេ Buffon ដែលបានបង្ហាញខ្លួនជាលើកដំបូងនៅក្របខ័ណ្ឌ Serie A សម្រាប់ក្លិប Parma ក្នុងខែវិច្ឆិកា ឆ្នាំ១៩៩៥ បានលេងការប្រកួតលីគចំនួន២៣ដង នៅរដូវកាលនេះសម្រាប់ក្លិប ដែលជាក្រុមកំពុងឈរលេខ១៣ក្នុងក្របខ័ណ្ឌ Serie B ដែលមាន២០ក្រុមបន្ទាប់ពី២៦ប្រកួត ៕
ដោយ៖ ភារៈ(រូបភាព ៖ BBC Sport)
