សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារីវ័យក្មេងម្នាក់បើកម៉ូតូចេញពីធ្វើការត្រឡប់ទៅផ្ទះវិញត្រូវជនមួយក្រុមធ្វើសកម្មភាពឆក់យកទូរស័ព្ទអាយហ្វូន១២promax គេចខ្លួនបាត់ស្រមោល។
ហេតុការណ៍នេះបង្កឲ្យមានការភ្ញាក់ផ្អើលឡើង កាលពីម៉ោង៨យប់ថ្ងៃទី១ ខែមីនា ឆ្នាំ២០២២ នៅតាមផ្លូវព្រះមុនីរ៉េត ជិតស្ពានអាកាសស្ទឹងមានជ័យ ក្នុងសង្កាត់បឹងសាឡាងខណ្ឌទួលគោក ។
នារីរងគ្រោះដែលសុំមិនបញ្ចេញឈ្មោះ និយាយថា រូបនាងជិះម៉ូតូស្គូពី ពណ៌ក្រហម ចេញពីធ្វើការនៅម្ដុំទួលគោក ត្រឡប់ទៅផ្ទះវិញនៅម្ដុំបុរី លឹមឈាងហាក់ ចំការដូង ដោយធ្វើដំណើរតាមផ្លូវព្រះមុនីរ៉េតពីខាងកើតទៅខាងលិច ខណៈមកដល់ចំណុចកើតហេតុស្រាប់តែមានជនសង្ស័យមួយក្រុមជិះម៉ូតូ២គ្រឿង មិនចាំម៉ាក មានគ្នា៤នាក់ ហើយជន២នាក់ក្នុងចំណោមនោះ បានឆក់យកទូរស័ព្ទអាយហ្វូនរបស់នាងដែលទុកនៅឃ្លុបម៉ូតូខាងមុខ រួចហើយក៏ជិះម៉ូតូបត់ស្តាំឡើងទៅផ្លូវលេខ២៧១ ។ ភ្លាមនោះនាងបានបើកម៉ូតូដេញតាមស្រែកថាចោរៗបានប្រហែល៥០០ម៉ែត្រ ស្រាប់តែបក្ខពួកជនសង្ស័យជិះម៉ូតូមកពីក្រោយ ហើយលូកដៃកាច់សោម៉ូតូរបស់នាងពន្លត់ម៉ាស៊ីន រួចយកកូនសោបោះចោលទៅកណ្ដាលផ្លូវថែមទៀត ។
បន្ទាប់ពីកើតហេតុ នាងបានទៅក្រោមស្ពានអាកាសស្ទឹងមានជ័យ ដើម្បីឱ្យសមត្ថកិច្ចជួយជូននាងទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបឹងសាឡាង ខណ្ឌទួលគោក ជួយស្រាវជ្រាវចាប់ជនសង្ស័យយកមកចាត់ការតាមនីតិវិធី ៕
ដោយ៖ជ្រោយពេជ្រ
