ស្ត្រីម្នាក់បានសម្រេចចិត្តទៅដាក់ពាក្យបណ្ដឹងនៅការិយាល័យនគរបាលព្រហ្មទណ្ឌកំរិតធ្ងន់ដោយសារសមត្ថកិច្ចប៉ុស្តិ៍មិនមានចំណាត់ការក្នុងករណីប្អូនប្រុសគាត់ស្លាប់ដោយសារត្រូវគ្រាប់កាំភ្លើងខ្យល់

ចែករំលែក៖

ខេត្តបាត់ដំបង ៖ ស្ត្រីម្នាក់បានសម្រេចចិត្តធ្វើដំណើរពីស្រុកសំឡូត ទៅដាក់ពាក្យបណ្ដឹងជាថ្មីនៅការិយាល័យនគរបាលព្រហ្មទណ្ឌកំរិតធ្ងន់ នៃស្នងការខេត្ត កាលពីព្រឹកថ្ងៃទី០៥ ខែមីនា ឆ្នាំ២០២២ ដើម្បីឲ្យជួយរកយុត្ដិធម៌ និងចាត់វិធានការក្នុងសំណុំរឿង ដែលគាត់អះអាងថា «ប្អូនប្រុសគាត់បានស្លាប់ ដោយសារត្រូវគ្រាប់កាំភ្លើងខ្យល់» ដែលហេតុការណ៍បានកើតឡើងជិត២សប្ដាហ៍មកហើយ តែមន្ត្រីប៉ុស្ដិ៍រដ្ឋបាល និងកម្លាំងអធិការស្រុកនេះ មិនព្រមចាត់វិធានការអ្វីសោះទៅលើជនពាក់ព័ន្ធ បើទោះជាគាត់បានទូរស័ព្ទទៅប្ដឹងជាច្រើនលើកច្រើនសារក៏ដោយ។

អ្នកស្រី សំ សោភា អាយុ៤៨ឆ្នាំ ជាបងស្រីរបស់ជនរងគ្រោះ បានឲ្យដឹងកាលពីរសៀលថ្ងៃទី០៥ ខែមីនា ឆ្នាំ២០២២ ថា ប្អូនប្រុសរបស់អ្នកស្រី គឺឈ្មោះ សំ សុខេរៈ អាយុ៣៣ឆ្នាំ រស់នៅភូមិអូរសំរិលក្រោម ឃុំអូរសំរិល ស្រុកសំឡូត បានស្លាប់កាលពីយប់ថ្ងៃទី២៤ ខែកុម្ភៈ នៅមន្ទីរពេទ្យយោធភូមិភាគទី៥ (ពេទ្យពពីរ) ក្រោយពីត្រូវរបួសភ្នែកផុងចូលដល់លលាដ៍ក្បាលផ្នែកខាងក្រោយ ដោយសារគ្រាប់កាំភ្លើងខ្យល់ ដែលគាត់សង្ស័យថា មានអ្នកលួចបាញ់។

អ្នកស្រីបាននិយាយថា ហេតុការណ៍នោះបានកើតឡើងកាលពីរវេលារំលងអធ្រាត្រឈានចូលថ្ងៃទី២២ ខែកុម្ភៈ នៅចំណុចឃ្លាំងស្ដុកដំឡូងមីមួយកន្លែង ស្ថិតក្នុងភូមិអូរសំរិលក្រោម ឃុំអូរសំរិល ស្រុកសំឡូត។

អ្នកស្រីបានឲ្យដឹងទៀតថា ដំបូងក្រុមគ្រួសារគាត់មិនបានដឹងរឿងទេ តែនៅម៉ោងជាង១២យប់ ឈានចូលថ្ងៃទី២២ ខែកុម្ភៈ ស្រាប់តែឃើញឈ្មោះ ឆើត និងឈ្មោះប្រុស ដឹកប្អូនប្រុសគាត់មកដល់ផ្ទះទាំងឈាមជោកពេញខ្លួន និងមានរបួសភ្នែកខាងឆ្វេង។ ពេលនោះគាត់សួរឈ្មោះឆើត អំពីមូលហេតុ តែឈ្មោះ ឆើត ប្រាប់ថា «ត្រូវគ្រាប់កាំភ្លើងខ្យល់»រួចក៏ប្រញាប់ជូនប្អូនទៅពេទ្យ។

លោកស្រីបន្តថា ប៉ុន្តែក្នុងអំឡុងពេលនោះ គាត់ក៏បានរាយការណ៍ប្រាប់ទៅមេភូមិ ហើយមេភូមិក៏បានរាយការណ៍បន្តទៅមន្ត្រីនគរបាលប៉ុស្ដិ៍ និងលោកអធិការស្រុកសំឡូតផង ដើម្បីឲ្យជួយសួរនាំអំពីមូលហេតុ។ ប៉ុន្តែគ្មានអស់លោកណាអើពើនឹងករណីនេះទេ រហូតដល់ថ្ងៃទី២៤ ខែកុម្ភៈ ដោយសាររបួសធ្ងន់ពេក ប្អូនប្រុសរបស់គាត់ក៏បានស្លាប់នៅក្នុងមន្ទីរពេទ្យតែម្តង។

អ្នកស្រីបានបញ្ជាក់ថា ចាប់តាំងពីពេលកើតហេតុ រហូតប្អូនស្លាប់ និងធ្វើបុណ្យសពប្អូនរួច គាត់តែងតែទំនាក់ទំនងតាមទូរស័ព្ទទៅសមត្ថកិច្ចសុំឲ្យជួយស៊ើបអង្កេតរឿងប្អូនប្រុសគាត់ត្រូវគ្រាប់កាំភ្លើងខ្យល់ ព្រោះគាត់សង្ស័យថា ប្អូនប្រុសគាត់អាចត្រូវគេលបបាញ់ ខណៈពេលកំពុងឆាបរណាយន្តនៅក្នុងបន្ទប់ មិនមែនរាលកៃកាំភ្លើងខ្យល់ត្រូវភ្នែកខ្លួនឯងនោះទេ ប៉ុន្តែទាំងមន្ត្រីប៉ុស្ដិ៍ទាំងខាងអធិការស្រុក សុទ្ធតែបានអះអាងតបមកគាត់វិញ បែបជួយការពារភាគីជនសង្ស័យយ៉ាងដូច្នេះថា «គ្មានរឿងប៉ងធ្វើឃាតទេ បើគេធ្វើឃាតមិនមែនគេដឹកជនរងគ្រោះយកមកឲ្យដល់ផ្ទះនោះទេ»។

ដោយសារតែខាងប៉ុស្ដិ៍ និងខាងអធិការស្រុក មិនចាត់វិធានការតាមការស្នើសុំរបស់អ្នកស្រី ទើបអស់សង្ឃឹមលើសមត្ថកិច្ចស្រុក អ្នកស្រីក៏បានសម្រេចចិត្តធ្វើដំណើរទៅដាក់បណ្ដឹងនៅស្នងការខេត្ត កាលពីថ្ងៃទី០៥ ខែមីនា ឆ្នាំ២០២២ ដើម្បីសុំឲ្យលោកស្នងការជួយអន្តរាគមន៍ស៊ើបអង្កេតជួយរកយុត្តិធម)ឲ្យប្អូនប្រុសគាត់។

ពាក់ព័ន្ធនឹងសំណុំរឿងខាងលើនេះ បើតាមប្រភពពីសមត្ថកិច្ចបានឲ្យដឹងថា សំណុំរឿងនេះ ត្រូវបានមន្ត្រីមូលដ្ឋានបិទបាំងមិនរាយការណ៍ជូនការិយាល័យជំនាញ ឬលោកស្នងការឲ្យបានជ្រាបអំពីដំណើររឿងទេ។ លុះនៅថ្ងៃទី០៥ ខែមីនា នៅពេលសាច់ញាតិជនរងគ្រោះមកដាក់ពាក្យបណ្ដឹងនៅការិយាល័យព្រហ្មទណ្ឌកំរិតធ្ងន់ ទើបរឿងនេះត្រូវបែកធ្លាយ។

លោក លឹម ពុទ្ធីឡា ស្នងការរងទទួលផែនព្រហ្មទណ្ឌ បានឲ្យដឹងនៅព្រឹកថ្ងៃទី០៦ ខែមីនា ឆ្នាំ២០២២នេះថា លោកមិនទាន់ដឹងថា ករណីនេះ កើតឡើងបែបណាទេ តែការិយាល័យជំនាញ បានទទួលបណ្ដឹងក្រុមគ្រួសារជនរងគ្រោះហើយ។ ប៉ុន្តែលោកស្នងការរងហាក់បានជួយនិយាយការពារមន្ត្រីមូលដ្ឋាន ដែលព្យាយាមលាក់បាំងមិនរាយការណ៍មកស្នងការខេត្ត។

លោក លឹម ពុទ្ធីឡា បាននិយាយថា ក្រោយកើតហេតុ ខាងអធិការស្រុក បានរាយការណ៍ជាបន្តបន្ទាប់ ហើយលោកបញ្ជាក់ថា ក្រោយទទួលពាក្យបណ្ដឹងពីបងស្រីជនរងគ្រោះ ពេលនេះលោកស្នងការ បានចេញបញ្ជាឲ្យកម្លាំងជំនាញអធិការស្រុកសំឡូត ចុះស្រាវជ្រាវធ្វើរបាយការណ៍ជូនថ្នាក់លើ ដើម្បីចាត់ការតាមនីតិវិធីចំពោះមុខសញ្ញាជនពាក់ព័ន្ធក្នុងសំណុំរឿងនេះតាមផ្លូវច្បាប់៕