ជនសង្ស័យម្នាក់ត្រូវបាននគរបាលជំនាញសហការគ្នាចុះស្រាវជ្រាវឃាត់ខ្លួនតាមពាក្យបណ្តឹង

ខេត្តប៉ៃលិន ៖ កាលពីថ្ងៃទី០៥ ខែមីនា ឆ្នាំ២០២២ វេលាម៉ោង១០:០០នាទី ប៉ុស្តិ៍នគរបាលរដ្ឋបាលអូរតាវ៉ៅ បានទទួលពាក្យបណ្តឹង ០១ករណី ពីបទរំលោភលើទំនុកចិត្ត(ខ្ចីម៉ូតូយកទៅបាត់)ម៉ូតូម៉ាកហុងដាឌ្រីមស៊េរីឆ្នាំ២០១៦ ពណ៌ខ្មៅ ស្លាកលេខប៉ៃលិន ១B-២៨៤៤ កើតឡើងនៅចំណុចផ្ទះលោក យិន សុខៃ ស្ថិតនៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។

កម្លាំងសមត្ថកិច្ចជំនាញបានឲ្យដឹងថា÷ជនរងគ្រោះម្ចាស់ម៉ូតូ ឈ្មោះ អិត ចាន់វង្ស ភេទប្រុស អាយុ២៧ឆ្នាំ មុខរបរកសិករ រស់នៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។

 សមត្ថកិច្ចនគរបាលជំនាញបានបន្តទៀតថា÷ក្រោយពីទទួលពាក្យបណ្តឹងកម្លាំងផ្នែកជំនាញនគរបាលយុត្តិធម៌ នៃអធិការដ្ឋាននគរបាលក្រុងប៉ៃលិន កម្លាំងប៉ុស្តិ៍នគរបាលរដ្ឋបាលអូរតាវ៉ៅ សហការជាមួយកម្លាំងនៃអធិការដ្ឋាននគរបាលស្រុកបាណន់ ខេត្តបាត់ដំបង បន្តធ្វើការស៊ើបអង្កេតនិងស្រាវជ្រាវរហូតដល់ម៉ោង១៦និង០០នាទី ឈានដល់ការឃាត់ខ្លួនជនសង្ស័យម្នាក់ដែលមាន ឈ្មោះ ជៀន ជិត ភេទប្រុស អាយុ២៦ឆ្នាំ មុខរបរមិនពិតប្រាកដ ស្នាក់នៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។

 ករណីខាងលើនេះ កម្លាំងជំនាញនៃអធិការដ្ឋាននគរបាលស្រុកបាណន់ ខេត្តបាត់ដំបង បានប្រគល់ជនសង្ស័យរួមទាំងវត្ថុតាង ឲ្យកម្លាំងជំនាញផ្នែកនគរបាលយុត្តិធម៌នៃអធិការដ្ឋាននគរបាលក្រុងប៉ៃលិន ដើម្បីអនុវត្តនីតិវិធីបន្ត។

ដោយ៖ស សារ៉េត