សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់បានធ្វេីសកម្មភាពយកកំណាត់ឫស្សីឆ្កឹះយកទូរស័ព្ទរបស់គេនៅក្នុងបន្ទប់ជួលបានសម្រេចហេីយ តែម្ចាស់ទូរស័ព្ទដឹងទាន់ក៏ដេញចាប់បាន រួចប្រគល់ជូនសមត្ថកិច្ចកាលពីវេលាម៉ោង៣និង៣០នាទីទៀបភ្លឺ ឈានចូលថ្ងៃទី៧ ខែមីនា ឆ្នាំ២០២២ នៅក្នុងភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ ។
ជនសង្ស័យឈ្មោះវ៉ាត់ ឆក ភេទប្រុសអាយុ២៦ឆ្នាំ មុខរបរកម្មករ ស្នាក់នៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ។
ចំណែកជនរងគ្រោះឈ្មោះមួង សីហា ភេទប្រុស អាយុ៣០ឆ្នាំ ស្នាក់នៅភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ។
តាមសម្តីម្ចាស់ទូរស័ព្ទបានឱ្យដឹងថា មុនពេលកេីតហេតុរូបគាត់បានដេកក្នុងបន្ទប់ជួលដោយសាកថ្មទូរស័ព្ទនៅក្បែរខ្លួន លុះមកដល់វេលាកេីតហេតុស្រាប់តែមានជនសង្ស័យម្នាក់ដេីរមកបេីកបង្អួចហើយពេលឃេីញទូរស័ព្ទរបស់គាត់ក៏យកកំណាត់ឫស្សីចងភ្ជាប់នឹងចង្អេីរអាំងត្រីមកឆ្កឹះយកទូរស័ព្ទបានសម្រេច ប៉ុន្តែភ្លាមនោះរូបគាត់ក៏ស្ទុះទៅបេីកទ្វារចេញមកក្រៅឃេីញជនសង្ស័យដេីរចេញទៅ។ ខណៈនោះរូបគាត់ក៏ដេីរតាមក្រោយរហូតទៅដល់ផ្លូវបេតុងក្នុងភូមិទួលពង្រជនសង្ស័យបានព្យាយាមរត់គេចខ្លួន តែរូបគាត់បានឃាត់ជាប់ឃេីញទូរស័ព្ទគាត់នៅនឹងដៃជនសង្ស័យទេីបរាយការណ៍ទៅសមត្ថកិច្ចឱ្យឃាត់ខ្លួនតែម្តង។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌដេីម្បីចាត់ការតាមច្បាប់៕
ដោយ៖ សុខាសែនជ័យ
