សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ យ៉ាងហោចណាស់ក៏មានមនុស្ស ២នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ និង២នាក់ទៀតបានរងរបួសធ្ងន់ស្ថិតនៅក្នុងហេតុការណ៍គ្រោះថ្នាក់ចរាចរណ៍រវាងរថយន្តនិងរថយន្តក្នុងទិសដៅបញ្ច្រាសទិសគ្នា។
ហេតុការណ៍នេះបានកើតឡើងនៅវេលាម៉ោង២១ និង៥០នាទី ថ្ងៃទី៦ ខែមីនា ឆ្នាំ២០២២ ស្ថិតនៅលើផ្លូវ លេខ៣១ ចន្លោះគីឡូម៉ែត្រលេខ ២ -៣ក្នុងភូមិត្រពាំងស្នោ ឃុំញ៉ែងញ៉ង ស្រុកត្រាំកក់ ខេត្តតាកែវ។
សមត្ថកិច្ចបានឲ្យដឹងថាករណីគ្រោះថ្នាក់ចរាចរណ៍ខាងលើនេះបង្កឡើងដោយរថយន្តមួយគ្រឿងម៉ាកតូយ៉ូតាកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2X-2631 (អ្នកបើកបរគេចខ្លួនបាត់) ដែលបើកបរមកពីទិសខាងត្បូង លុះបើកបរមកដល់ចំណុចខាងលើក៏បានឡើងវ៉ាជែងរួចក៏ជ្រុលទៅបុករថយន្តមួយគ្រឿងទៀតចំពីមុខពេញមួយទំហឹងតែម្តង ដែលរថយន្តមួយគ្រឿងទៀតនោះម៉ាកសាំយ៉ុង ពណ៌បៃតង ពាក់ស្លាកលេខ ភ្នំពេញ 2BA-6417 បើកបរដោយឈ្មោះ អន រ៉ូ ភេទប្រុស អាយុ២៥ឆ្នាំ មុខរបរអ្នករត់តាក់ស៊ី នៅភូមិឈើទាល ឃុំម្រោម ស្រុកអង្គរជ័យ ខេត្តកំពត (រងរបួសធ្ងន់) មានអ្នករួមដំណើរក្នុងរថយន្តមួយចំនួនទៀតដែលមានឈ្មោះ៖ ទី១.ឈ្មោះ សែស រ៉ាម៉ុន ភេទស្រី អាយុ២៦ឆ្នាំ មុខរបរកសិករ នៅភូមិឃុំជាមួយគ្នា (រងរបួសធ្ងន់) អង្គុយនៅកៅអីក្រោយជាមួយកូន (ត្រូវជាប្រពន្ធតៃកុង), ទី២.ឈ្មោះ គៀ ហាក់ស៊ីព័រ ភេទប្រុស អាយុ២ឆ្នាំ មុខរបរក្នុងបន្ទុក នៅភូមិឃុំជាមួយគ្នា (ស្លាប់នៅកន្លែងកើតហេតុ) អង្គុយនៅកៅអីក្រោយជាមួយម្តាយ (ត្រូវជាកូនតៃកុង) និងទី៣.ឈ្មោះ ប៉ែន ជ្រិន ភេទប្រុស អាយុ៨៤ឆ្នាំ មុខរបរនៅផ្ទះ នៅភូមិដើមដូង ឃុំដើមដូង ស្រុកអង្គរជ័យ ខេត្តកំពត (ស្លាប់នៅកន្លែងកើតហេតុ) អង្គុយនៅកៅអីខាងមុខ ដែលបើកបរមកពីទិសខាងជើង។ អ្នករបួសទាំងអស់ត្រូវបានដឹកបញ្ជូនទៅសង្គ្រោះនៅមន្ទីរពេទ្យបង្អែកក្រុងដូនកែវ។ សមត្ថកិច្ចបានបញ្ជាក់ឲ្យដឹងថាមូលហេតុបណ្តាលមកពីរថយន្តតូយ៉ូតាកាមរីបាឡែនឡើងវ៉ាជែងក្នុងស្ថានភាពគ្រោះថ្នាក់ ក្រោយកើតហេតុកម្លាំងជំនាញបានចុះធ្វើការត្រួតពិនិត្យនិងវាស់វែងរួចកសាងសំណុំរឿងទៅតាមនីតិវិធី និងបានប្រគល់សពទាំងពីរជូនដល់សាច់ញាតិយកទៅធ្វើបុណ្យតាមប្រពៃណី រីឯវត្ថុតាងរថយន្តទាំងពីរគ្រឿងខាងលើរងការខូចខាតធ្ងន់ ហើយត្រូវបានយកមករក្សាទុកនៅអធិការដ្ឋាននគរបាលស្រុកត្រាំកក់៕
ដោយ៖ ស សម
