សារព័ត៌មាន នគរវត្ត តែងតែនាំមុខគេជានិច្ច
ក្រុម Real Madrid នឹងសម្លឹងរកការសង្គ្រោះពីការប្រកួតជើងទី១ក្នុងការប្រកួត UEFA Champions League វគ្គ១៦ នៅពេលដែលក្រុមនេះស្វាគមន៍ក្រុមខ្លាំងមកពីបារាំង Paris Saint-Germain នៅកីឡដ្ឋាន Estadio Santiago Bernabéu សម្រាប់ការប្រកួតជើងទី២ នៅរាត្រីថ្ងៃពុធនេះ។
ក្នុងការប្រកួតជើងទី១ ក្រុម PSG បានយកឈ្នះ ១-០ នៅកីឡដ្ឋាន Parcdes Princes កាលពីថ្ងៃទី១៥ ខែកុម្ភៈ ដែល១គ្រាប់នោះរកបានដោយខ្សែប្រយុទ្ធ Kylian Mbappé នៅនាទីទី៩០+៤។
ការប្រកួតនោះ PSG មានប្រៀបជាង Real Madrid នៅចុងម៉ោង ដោយមិនស្គាល់ចាញ់សោះក្នុងការប្រកួត៣លើកចុងក្រោយរបស់ពួកគេ (ឈ្នះ២ ស្មើ១)។ រីឯ Real Madrid កំពុងស្វែងរកការឈ្នះលើកដំបូងរបស់ពួកគេក្នុងការប្រកួតរវាងក្រុមទាំង២ចាប់តាំងពីខែមីនា ឆ្នាំ២០១៨មក។ ក្រុមបារាំងបានយកឈ្នះលើក្រុមអេស្ប៉ាញ ៦–២ ក្នុងអំឡុងពេលនៃការប្រកួតមិនដែលចាញ់របស់ពួកគេ។
ខ្សែប្រយុទ្ធ Karim Benzema គឺជាកីឡាករសំខាន់ និងលេចធ្លោនៅ Real Madrid ក្នុងការប្រកួត Champions League ដោយខ្សែប្រយុទ្ធរូបនេះស៊ុតចូល៥គ្រាប់។ ចំណែក Mbappé និង Lionel Messi គឺជាកីឡាករសំខាន់របស់ Paris Saint-Germain ក្នុងយុទ្ធនាការ Champions League នេះ ដោយម្នាក់ៗស៊ុតបញ្ចូលទីបាន៥គ្រាប់ដែរ។
ក្រុមម្ចាស់ផ្ទះ Real Madrid មានទម្រង់លេងយ៉ាងសម្បើមនៅលើទឹកដីខ្លួនឯងក្នុង Champions League រដូវកាលនេះ ដោយឈ្នះ២លើក និងចាញ់តែមួយលើកប៉ុណ្ណោះក្នុងការប្រកួត៣លើក។ ក្រុមនេះត្រូវការឈ្នះ PSG ដាច់ខាតយ៉ាងតិច២ទល់០ ទើបអាចមានឱកាសឡើងទៅកាន់វគ្គ៨ក្រុមចុងក្រោយបាន។ រីឯ PSG នឹងស្វែងរកការឈ្នះការប្រកួតក្រៅដីជាលើកដំបូងរបស់ពួកគេក្នុងការប្រកួតនៅរដូវកាលនេះ ខណៈដែលពួកគេចាញ់មួយ និងស្មើ២នៅក្រៅទឹកដីកន្លងមក។
ក្នុងការប្រកួត៦លើកចុងក្រោយរបស់ Real Madrid ឈ្នះ៤ ស្មើ១ និងចាញ់១ ខណៈដែលក្រុម PSG ឈ្នះ៤ និងចាញ់២ ក្នុង៦ក្រុមចុងក្រោយដូចគ្នា។
ងាយមកមួយគូទៀតដែលត្រូវប្រកួតនៅរាត្រីនេះដែរ គឺដោយមានការនាំមុខចំនួន៥គ្រាប់នៅជើងទី១នៃការប្រកួត UEFA Champions League វគ្គ១៦ក្រុមចុងក្រោយ ក្រុមខ្លាំង Manchester City ត្រូវស្វាគមន៍ក្រុមSporting CP នៅកីឡដ្ឋាន Etihad សម្រាប់ការប្រកួតជើងទី២។
ក្នុងការប្រកួតជើងទី១នៅកីឡដ្ឋាន Estádio José Alvalade កាលពីថ្ងៃទី១៥ ខែកុម្ភៈ ក្រុម Manchester City បានយកឈ្នះ ៥-០ ទៅលើក្រុម Sporting CP រួចទៅហើយ។ ខ្សែបម្រើ Bernardo Silva បានគ្រាប់បាល់នាំមុខឱ្យក្រុមអង់គ្លេសមួយនេះដោយគ្រាប់បាល់នៅនាទី១៧ និងនាទីទី៤៤ ខណៈដែល Riyad Mahrez, Phil Foden, និង Raheem Sterling ក៏រកបានគ្រាប់បាល់ម្នាក់១គ្រាប់ផងដែរ។
ខ្សែប្រយុទ្ធ Mahrez ជាកីឡាករសំខាន់របស់ Manchester City ក្នុងការប្រកួត Champions League ដោយស៊ុតបញ្ចូលទីបាន៦គ្រាប់ ដែលត្រូវបានជាប់ចំណាត់ថ្នាក់ទី៥ក្នុងចំណោមអ្នកស៊ុតបញ្ចូលទីច្រើនជាងគេក្នុងការប្រកួតនៅឆ្នាំ២០២១–២០២២នេះ។ កីឡាករឆ្នើមបំផុតរបស់ Sporting CP គឺ Pote ដែលបានស៊ុតបាល់បញ្ចូលទីបាន៤គ្រាប់ក្នុងយុទ្ធនាការ Champions League នេះ រួមទាំងគ្រាប់បាល់បើកឆាកចំនួន២គ្រាប់ផងដែរ។
ក្រុមម្ចាស់ផ្ទះ Manchester City បានស៊ុតបញ្ចូលទីក្នុងការប្រកួត Champions League ចំនួន៥ជាប់ៗគ្នាក្នុងរដូវកាលនេះ។ ក្រុមនេះមិនដែលចាញ់ឡើយ ចាប់តាំងពីការចាញ់ក្នុងវគ្គចែកពូលរបស់ពួកគេទល់នឹង Paris Saint-Germainហើយក្នុងការប្រកួត Champions League ៣លើកនៅលើទឹកដីខ្លួនឯងក្នុងរដូវកាលនេះ Manchester City ទទួលបាន៩ពិន្ទុ ដោយរកបាន១២គ្រាប់ និងរបូត៥គ្រាប់។
ចំណែកក្រុម Sporting CP សម្រាប់ការប្រកួតចំនួន៣នៅក្នុងការប្រកួតនៅរដូវកាលនេះ ទទួលបាន៣ពិន្ទុប៉ុណ្ណោះ (ឈ្នះ១ និងចាញ់២)។ ក្រុមព័រទុយហ្គាល់ស្ថិតលើការប្រកួតក្រៅដីមិនស្គាល់ចាញ់ចំនួន៦ប្រកួត (ឈ្នះ៤ ស្មើ២) គ្រប់កម្មវិធីប្រកួត។
ក្នុងការប្រកួត៦លើកចុងក្រោយរបស់ក្នុងការប្រកួតទាំងអស់ Manchester City ឈ្នះ៥ និងចាញ់១ ខណៈដែលក្រុម Sporting CP ឈ្នះ២ ស្មើ២ និងចាញ់២ ក្នុង៦លើកចុងក្រោយដូចគ្នា។ ការប្រកួតនៅរាត្រីថ្ងៃពុធនេះនឹងធ្វើឡើងនៅវេលាម៉ោង៣រំលងអធ្រាត្រដូចគ្នា ហើយការចាប់ឆ្នោតសម្រាប់វគ្គ៨ក្រុមចុងក្រោយនឹងធ្វើឡើងនៅថ្ងៃទី១៨ ខែមីនាខាងមុខ ដែលធ្វើឡើងនៅប្រទេសស៊្វីស ៕
ដោយ៖ ភារៈ(រូបភាព ៖ soccerway.com)
