សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ យ៉ាងហោចណាស់ក៏មានមនុស្សប្រុសស្រី៣នាក់ដែរបានរងរបួសធ្ងន់ដោយសារករណីគ្រោះថ្នាក់ចរាចរណ៍រវាងម៉ូតូនឹងម៉ូតូដែលបុកគ្នាយ៉ាងពេញទំហឹងពេលជិះបញ្ច្រាសទិសគ្នាបង្កការភ្ញាក់ផ្អើលដល់អ្នកធ្វើដំណើរ។
ហេតុការណ៍នេះបានកើតឡើងកាលពីវេលាម៉ោង៤និង៤៧នាទីរសៀលថ្ងៃទី៨ ខែមីនា ឆ្នាំ២០២២នៅលើផ្លូវជាតិលេខ៣១៦ស្ថិតក្នុងភូមិព្រៃស្ទៀង ឃុំស្វាយតាយាន ស្រុកកំពង់រោទ៍។
តាមសមត្ថកិច្ចនគរបាលស្រុកបានឱ្យដឹងថា អ្នកបើកម៉ូតូបង្កហេតុមានឈ្មោះ សុខ រតនា អាយុ២៧ឆ្នាំ មុខរបរកម្មកររោងចក្រ មានទីលំនៅភូមិស្វាយ ឃុំរមាំងថ្កោល ស្រុកស្វាយទាប ខេត្តស្វាយរៀងជិះម៉ូតូម៉ាកHonda Dream ពណ៌ខ្មៅ ពាក់ស្លាកលេខ ភ្នំពេញ១K-៦៤៧០ ។
ចំណែកអ្នករងគ្រោះមានឈ្មោះ ឈួន តុលា ភេទស្រី អាយុ១៨ឆ្នាំ មុខរបរ កម្មការិនីរោងចក្រ និងម្ដាយមានឈ្មោះម៉ៅ នៅ អាយុ៥៦ឆ្នាំ មុខរបរកសិកររស់នៅភូមិពោធិ៍ថ្មី ឃុំស្វាយតាយាន ស្រុកកំពង់រោទ៍ ជិះម៉ូតូម៉ាកហុងដាវ៉េវ ពណ៌ខ្មៅ ពាក់ស្លាកលេខភ្នំពេញ ១EV- ៩៣៤០ ។
តាមសាក្សីបានឱ្យដឹងថា មុនកើតហេតុមានមនុស្សស្រី២នាក់បានជិះម៉ូតូមួយគ្រឿងម៉ាកហុងដាវ៉េវ ពណ៌ខ្មៅ ពាក់ស្លាកលេខភ្នំពេញ ១EV-៩៣៤០នៅលើផ្លូវជាតិលេខ៣១៦ក្នុងទិសដៅពីជើងទៅត្បូង ខណៈនោះស្រាប់តែមានម៉ូតូមួយគ្រឿងម៉ាកHonda Dream ពណ៌ខ្មៅ ពាក់ស្លាកលេខ ភ្នំពេញ១K-៦៤៧០ បើកក្នុងទិសដៅបញ្ច្រាសគ្នាដោយជិះមិនប្រកាន់ស្ដាំក៏បុកគ្នាយ៉ាងពេញទំហឹងបង្កការភ្ញាក់ផ្អើលដល់អ្នកធ្វើដំណើរនាំគ្នាចោមរោមមើល។
ក្រោយមកអ្នករងរបួសធ្ងន់ត្រូវបានសមត្ថកិច្ចហៅរថយន្តសាមុយមកដឹកយកទៅព្យាបាលនៅមន្ទីរពេទ្យជីភូ រួចហើយបានធ្វើការវាស់វែងនិងអូសយកវត្ថុតាងម៉ូតូទាំង២គ្រឿងទៅរក្សាទុកនៅប៉ុស្តិ៍នគរបាលរដ្ឋបាល ស្វាយតាយានដើម្បីដោះស្រាយបន្តតាមច្បាប់៕
ដោយ៖យឹម សុថាន
