សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរស២នាក់បានដេកស្លាប់ក្នុងរថយន្ត និងនារី២នាក់ទៀតសន្លប់បាត់ស្មារតីត្រូវបានប្រជាពលរដ្ឋ និងសមត្ថកិច្ចមូលដ្ឋានបញ្ជូនទៅសង្គ្រោះនៅឯមន្ទីរពេទ្យ ដោយបង្កឲ្យមានការភ្ញាក់ផ្អេីលកាលពីវេលាម៉ោង១៨ និង៣០នាទីព្រលប់ ថ្ងៃទី៩ ខែមីនា ឆ្នាំ២០២២ ស្ថិតនៅក្នុងផ្ទះល្វែងមួយកន្លែង ភូមិបូរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ ។
សមត្ថកិច្ចបានបង្ហេីបឲ្យដឹងថា សពជនរងគ្រោះជាម្ចាស់ផ្ទះ មានឈ្មោះ ចំរេីន ឆៃយ៉ា ភេទប្រុស អាយុ២៧ឆ្នាំ មុខរបររត់តាក់ស៊ី ស្នាក់នៅផ្ទះកេីតហេតុ ផ្លូវលំ ភូមិបុរីកម្មករ សង្កាត់ជេីងឯក ខណ្ឌដង្កោ ។ និងសពបុរសម្នាក់ទៀត មានឈ្មោះ ឡូវ ឆាយហុង ភេទប្រុស អាយុ២៦ឆ្នាំ ស្នាក់នៅផ្ទះលេខ៦១ ផ្លូវបេីកថ្មី ភូមិ៤ សង្កាត់ទំនប់ទឹក ខណ្ឌបឹងកេងកង ។ ចំណែកស្ត្រីជាដៃគូ២នាក់ទៀតនៅមិនទាន់ស្គាល់អត្តសញ្ញាណ ដោយស្ថានភាពធ្ងន់ធ្ងរកំពុងសង្គ្រោះនៅមន្ទីរពេទ្យ ។
យោងតាមប្រភពព័ត៌មានពីប្រជាពលរដ្ឋដែលនៅក្បែរកន្លែងកេីតហេតុបានឲ្យដឹងថា ដំបូងឡេីយគេឃេីញរថយន្តមួយគ្រឿងម៉ាក Toyota Prius ពណ៌ប្រផេះ ពាក់ស្លាកលេខ ភ្នំពេញ 2BF-8087 ដែលជារបស់ជនរងគ្រោះបានចតមុខផ្ទះប្រជាពលរដ្ឋនៅទល់មុខផ្ទះកេីតហេតុតាំងពីយប់រំលងអធ្រាត្រឈានចូលថ្ងៃទី៩ ខែមីនា ឆ្នាំ២០២២ រហូតដល់ល្ងាចថ្ងៃដដែល ក៏មិនឃេីញជនរងគ្រោះចេញមក និងបេីកយករថយន្តចេញ ទេីបប្រជាពលរដ្ឋដែលរស់នៅក្បែរខាងនាំគ្នាទៅគាស់ទ្វារផ្ទះកេីតហេតុក៏មិនមានអ្នកឆ្លេីយតប ។ ដោយមានការសង្ស័យ ប្រជាពលរដ្ឋក៏បានទំនាក់ទំនងទៅសាច់ញាតិ និងរាយការណ៍ទៅអាជ្ញាធរមូលដ្ឋានឲ្យចុះមកផ្ទះកេីតហេតុ ដេីម្បីពិនិត្យ និងចាក់សោរផ្ទះចូលមេីលក៏ស្រាប់តែឃេីញជនរងគ្រោះប្រុសស្រី៤នាក់ដេកក្នុងរថយន្តមួយគ្រឿងទៀតម៉ាក ហាយឡេនឌ័រ ពណ៌ទឹកប្រាក់ ពាក់ស្លាកលេខភ្នំពេញ 2AM-2178 ទេីបបេីកទ្វារពិនិត្យឃេីញថា មានបុរស២នាក់បានដាច់ខ្យល់ស្លាប់ទៅហេីយនិងមានសារធាតុញៀន១កញ្ចប់ក្បែរខ្លួនផងដែរ រីឯនារី២នាក់ទៀតនៅមានដង្ហេីមតែទន់ខ្លួនប្រាណជាខ្លាំងក៏ប្រញាប់ដឹកបញ្ចូនទៅកាន់មន្ទីរពេទ្យដេីម្បីសង្គ្រោះភ្លាមៗ ។
ក្រោយមកទៀត សមត្ថកិច្ចមូលដ្ឋានបានហ៊ុំព័ទ្ធខ្សែសុវត្ថិភាព និងសហការជាមួយជំនាញបច្ចេកទេសនៃស្នងការដ្ឋាននគរបាលរាជធានីភ្នំពេញ ដើម្បធ្វើកោសល្យវិច័យរកហេតុផល នៃការស្លាប់ និងសន្លប់បាត់ស្មារតីរបស់ជនរងគ្រោះខាងលេីឲ្យពិតប្រាកដ ៕
ដោយ ៖ ភារ៉ា ដង្កោ
