សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្មេងស្ទាវ២ក្រុមចេញពីផឹកស៊ីសប្បាយនៅក្នុងក្លឹបហើយក៏បានជិះម៉ូតូដេញធាក់គ្នាតាមដងផ្លូវ បណ្ដាលឲ្យដួលម៉ូតូបោកទៅនឹងផ្លូវថ្នល់ បណ្តាលឲ្យមនុស្សប្រុសស្រី២នាក់រងរបួសធ្ងន់ស្រាល។
ហេតុការណ៍នេះបង្កឲ្យមានការភ្ញាក់ផ្អើលកាលពីម៉ោង១និង៤៥នាទីរំលងអធ្រាត្រឈានចូលថ្ងៃទី១០ ខែមីនា ឆ្នាំ២០២២ នៅតាមបណ្ដោយផ្លូវវេងស្រេង ស្ថិតក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ។
ប្រភពព័ត៌មាននៅកន្លែងកើតហេតុបានឲ្យដឹងថា ជនរងគ្រោះជិះម៉ូតូម៉ាកហុងដាប៊ីត ពណ៌ខ្មៅ ពាក់ស្លាកលេខភ្នំពេញ1IX-5132 ជិះឌុបគ្នា២នាក់ ស្រីម្នាក់ និងប្រុសម្នាក់ ។
ប្រភពព័ត៌មានពីមិត្តភក្តិរបស់ជនរងគ្រោះ បានឲ្យដឹងថា នៅមុនពេលកើតហេតុ ពួកគាត់ និងជនរងគ្រោះបាននាំគ្នាចូលផឹកស៊ីនៅក្នុងក្លឺបមួយកន្លែងយីហោ «ក្លឹប មីត ណាយ» ដែលមានទីតាំងនៅតាមបណ្ដោយផ្លូវវេងស្រេង ។ ខណៈពេលផឹកស៊ីនោះ ក៏បានទាស់ពាក្យសម្ដីឌឺដងដាក់គ្នាជាមួយនឹងជនបង្កនៅក្នុងក្លឹបនោះ បន្ទាប់មកពួកគាត់ក៏បាននាំគ្នាចេញពីផឹកស៊ីក្នុងក្លឹប រួចក៏នាំគ្នាជិះម៉ូតូក្នុងគោលបំណងត្រឡប់ទៅផ្ទះវិញ ។នៅពេលកំពុងតែជិះម៉ូតូត្រឡប់ទៅផ្ទះនោះ ដោយមិនដឹងខ្លួនថា មានជនសង្ស័យជិះម៉ូតូដេញតាមពីក្រោយ រួចធ្វើសកម្មភាពដេញធាក់ម៉ូតូរបស់គាត់ទេ តែពេលនោះគឺម៉ូតូរបស់គាត់មិនបានដួលឡើយ ។ បន្ទាប់មក ជនសង្ស័យក៏បានជិះម៉ូតូហួសទៅធាក់ម៉ូតូមិត្តភក្ដិរបស់គាត់ ដែលជិះនៅខាងមុខជិះមានគ្នា២នាក់ ក្នុងនោះមានស្រីម្នាក់ និងប្រុសម្នាក់ បណ្ដាលឲ្យដួលម៉ូតូបោកទៅនឹងផ្លូវថ្នល់ ហើយម៉ូតូក៏សង្កត់ជាប់ពីលើស្ត្រីរងគ្រោះធ្វើអោយបាក់ជើងម្ខាងផ្នែកខាងឆ្វេង ចំណែកខាងប្រុសវិញ គ្រាន់តែរងរបួសស្រាលប៉ុណ្ណោះ ។ ភ្លាមៗនោះ ជនរងគ្រោះទាំង២នាក់ត្រូវបានរថយន្តឯកជនសម្ភពរស្មី បានមកដឹកយកទៅសង្គ្រោះភ្លាមៗផងដែរ ចំណែកម៉ូតូវិញ ត្រូវបានប្រជាពលរដ្ឋលើកទៅដាក់អែបខាង។ ចំណែកជនបង្កវិញជិះម៉ូតូម៉ាកសង់ប៊ិច មានគ្នាចំនួន៣នាក់ មិនចាំស្លាកលេខ បានរត់គេចខ្លួនបាត់ស្រមោលពីកន្លែងកើតហេតុ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុបានយកម៉ូតូជនរងគ្រោះយកទៅរក្សាទុកនៅប៉ុស្តិ៍រង់ចាំម្ចាស់ម៉ូតូយកឯកសារគ្រប់គ្រាន់មកទើបប្រគល់ឱ្យទៅវិញ៕
ដោយ៖ ជ្រោយពេជ្រ
