សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីតាមការបញ្ជាក់ពីលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៉ីម៉ាក់) បានថ្លែងនៅលេីបណ្ដាញសង្គមហ្វេសប៊ុកផ្ទាល់ខ្លួននាព្រឹកថ្ងៃសៅរ៍ទី១២ ខែមីនា ឆ្នាំ២០២២នេះថា៖ មេីលគូទនិងគីបគេផង! (គូទនិងគីបគ្រាប់ហ្នឹងណា) ទោះបីជាកប់ក្នុងដីជម្រៅប្រមាណ១៥ម៉ែត្រជាង៥០ឆ្នាំមកហេីយក្តី ក៏នៅមានសម្រស់ស្រស់ស្អាតនៅឡេីយទេ!។
អគ្គនាយកស៊ីម៉ាក់រូបនេះបានថ្លែងបន្តថា នៅព្រឹកថ្ងៃសៅរ៍ ទី១២ ខែមីនានេះ កម្លាំងជំនាញគ្រាប់មិនទាន់ផ្ទុះរបស់អង្គ
ភាពសុីម៉ាក់ភ្នំពេញ បានដោះបន្សាបគ្រាប់បែកទម្លាក់ពីយន្តហោះប្រភេទMK82 ទម្ងន់ប្រមាណ២៣០គីឡូក្រាមចំនួនមួយគ្រាប់ ជាសំណល់សង្គ្រាមនោះ ប្រកបដោយសុវត្ថិភាពនិងជោគជ័យ។ គ្រាប់បែកនេះស្ថិតនៅក្នុងភូមិក្តឿង ឃុំតាដោក ស្រុកកណ្តាលស្ទឹង ខេត្តកណ្តាល កប់ក្នុងដីជម្រៅប្រមាណ១៥ម៉ែត្រ ប្រទះឃេីញដោយម្ចាស់ការដ្ឋានរណ្តៅដី ។
គួរជម្រាបដែរថា កាលពីថ្ងៃទី៩ ខែមីនាថ្មីៗនេះ កម្លាំងជំនាញបានបោសសម្អាតគ្រាប់យុទ្ធភណ្ឌក្រោមទឹកនៃអង្គភាពស៊ីម៉ាក់ បានបញ្ចប់កិច្ចប្រតិបតិ្តការដោះ បន្សាបគ្រាប់បែកប្រភេទ MK82 ទម្ងន់ជាង២៣០គីឡូក្រាមទម្លាក់ពីយន្តហោះ ស្ថិតនៅបាតស្ទឹងសែន ខេត្តកំពង់ធំ ប្រកបដោយជោគជ័យ។ ការបោសសម្អាតគ្រាប់សំណល់យុទ្ធភណ្ឌសង្គ្រាមក្រោមទឹករបស់អង្គភាពស៊ីម៉ាក់ បានចាប់ផ្តើមបោសសម្អាតគ្រាប់បែកទម្លាក់ពីយន្តហោះនៅបាតស្ទឹងសែន ខេត្តកំពង់ធំ ដែលកំពុងលាក់ខ្លួនក្នុងជម្រៅទឹកជិត៥ម៉ែត្រ ។
គួរបញ្ជាក់ថា គ្រាប់បែកនេះត្រូវបានប្រទះឃើញដោយអ្នកនេសាទត្រីតាមដងស្ទឹងសែន ដែលអ្នកជំនាញសន្និដ្ឋានថា អាចជាគ្រាប់បែកនៃត្រកូល MK ទម្លាក់ពីយន្តហោះ។ ដើម្បីធានាសុវត្ថិភាពក្នុងការបោសសម្អាតក្រុមអ្នកជំនាញស៊ីម៉ាក់បានប្រើឧបករណ៍បច្ចេកវិទ្យាទំនើបដើម្បីស្គែនពិនិត្យមើលក្រោមបាតទឹកឱ្យបានច្បាស់លាស់ មុននឹងចាប់ផ្តើមកិច្ចប្រតិបតិ្តការ៕
ដោយ៖សហការី
