សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបើករថយន្តជូនសង្សារទៅផ្ទះ ស្រាប់តែមានបុរសម្នាក់ទៀតបានទូរស័ព្ទណាត់ជួប និងបាននាំបក្សពួក មករួចយកពូថៅទៅគប់ តែមិនត្រូវរួចបាននាំគ្នាបើករថយន្តគេចខ្លួនបាត់ ។
ហេតុការណ៍នេះបង្កឲ្យមានការភ្ញាក់ផ្អើលឡើងកាលពីម៉ោង១០និង៤០នាទីយប់ ថ្ងៃទី១៥ ខែមីនា ឆ្នាំ២០២២ នៅត្រង់ចំណុចក្បែរផ្សារទំនើបខាលែនឌែនម៉ល តាមបណ្តោយផ្លូវR1 ស្ថិតក្នុងសង្កាត់ស្រះចក ខណ្ឌដូនពេញ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញបុរសម្នាក់បើករថយន្តមួយគ្រឿងម៉ាក ម៊ែកសឺដេស ពណ៌ខ្មៅ ពាក់ស្លាកលេខ ភ្នំពេញ2F-0102 ធ្វើដំណើរតាមបណ្ដោយផ្លូវR1 ទិសដៅពីត្បូងទៅជើង ។ខណៈមកដល់ចំណុចកើតហេតុក៏បានឈប់ចតរថយន្តនៅលើចិញ្ចើមផ្លូវ ។បន្តិចក្រោយមកស្រាប់តែមានរថយន្តពីរគ្រឿង ដោយមួយគ្រឿងម៉ាក ហ្វ័តរ៉ែនជឺរ ពណ៌ស ពាក់ស្លាកលេខ ភ្នំពេញ2BD-1909 បើកបរដោយបុរសម្នាក់ និងរថយន្តមួយគ្រឿងទៀតម៉ាក ឡង់គ្រីស័រ ពណ៌ស មិនចាំស្លាកលេខ បើកបរដោយបុរសម្នាក់ទៀត ដែលរថយន្តទាំងពីរគ្រឿងនោះ បានបើកទៅចតជិតនឹងរថយន្តម៊ែកសឺដេស ។
បន្ទាប់មកបុរសម្នាក់ជាអ្នកបើករថយន្តហ្វ័តរ៉ែនជឺរ បានចុះទៅឈរនិយាយគ្នាជាមួយបុរសជាអ្នកបើកបររថយន្តម៊ែកសឺដេស ស្រាប់តែបុរសដែលបើកបររថយន្តឡង់គ្រីស័របានចុះពីលើរថយន្តរួចដើរទៅវាយតប់គ្នាជាមួយបុរសដែលជាអ្នកបើករថយន្តមែសឺរដេស ដោយមិនដឹងថាមានរឿងទំនាស់អ្វីហ្នឹងគ្នានោះទេ។
ភ្លាមនោះបុរសជាអ្នកបើកបររថយន្តម៊ែកសឺដេស បានរត់គេចខ្លួន ខណៈនោះដែរ បុរសជាអ្នកបើករថយន្តឡង់គ្រីស័រ ក៏បានយកពូថៅគប់ទៅលើបុរសជាអ្នកបើករថយន្តម៊ែកសឺដេស តែគប់មិនត្រូវនោះទេ។ក្រោយបង្កហេតុរួច បុរសជាអ្នកបើករថយន្តហ្វ័តរ៉ែនជឺរ និងបុរសបើករថយន្តឡង់គ្រីស័របាននាំគ្នាបើករថយន្តរត់គេចខ្លួនចេញពីកន្លែងកើតហេតុ ដោយបន្សល់ទុកតែពូថៅនៅកន្លែងកើតហេតុ ។
ភ្លាមៗនោះក៏មានប្រជាពលរដ្ឋដែលឃើញហេតុការណ៍បាននាំគ្នាជួយជិះដេញតាមពីក្រោយ និងបានរាយការណ៍ជូនសមត្ថកិច្ចឲ្យជួយអន្តរាគមន៍ផងដែរ ខណៈបើកគេចខ្លួននោះ រថយន្តហ្វ័តរ៉ែនជឺរបានបែកកង់ចំហៀងខាងក្រោយ តែអ្នកបើករថយន្តមិនព្រមឈប់នោះទេនៅតែបន្តបើករត់ រហូតដាច់សំបកកង់នៅសល់តែយ៉ាន់ទៅមុខបាន ។
ប្រភពបានឲ្យដឹងដែរថា អ្នកបើករថយន្តហ្វ័តរ៉ែនជឺរ មិនអាចបើករត់គេចខ្លួនបាន ស្រាប់តែមានរថយន្តមួយគ្រឿង ម៉ាកឡង់គ្រីស័រ ពណ៌ស ពាក់ស្លាកលេខ ភ្នំពេញ2BM-7001 បើកបរដោយបុរសម្នាក់ និងស្ត្រីម្នាក់ បានមករំដោះយកអ្នកបើករថយន្តហ្វ័តរ៉ែនជឺរ ចេញពីកន្លែងកើតហេតុបាត់ស្រមោលតែម្តង បន្សល់ទុកតែរថយន្តហ្វ័តរ៉ែនជឺរ ដែលបែកកង់នៅត្រង់ចំណុចក្បែរបុរីភ្នំពេញថ្មី តាមបណ្ដោយផ្លូវបេតុង ស្ថិតក្នុងសង្កាត់ក្រាំងធ្នង់ ខណ្ឌសែនសុខ។
ប្រភពពីជនរងគ្រោះដែលជាអ្នកបើករថយន្តម៊ែកសឺដេស សូមមិនបញ្ចេញឈ្មោះបានឲ្យដឹងថា គាត់នឹងបុរសជាអ្នកបើកបររថយន្តហ្វ័តរ៉ែនជឺរ គឺជាមនុស្សដែលធ្លាប់ស្គាល់គ្នា ហើយពួកគាត់ក៏មិនដែលមានរឿងឈ្លោះប្រកែកគុំគួនអ្វីនឹងគ្នាទេ តែពីមុនមក គឺធ្លាប់អន់ចិត្តនឹងគ្នាតិចតួច ដោយសាររឿងស្នេហា។
បន្ទាប់ពីកើតហេតុ ជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្រះចក ដើម្បីឲ្យសមត្ថកិច្ចស្រាវជ្រាវតាមចាប់ជនបង្កយកមកផ្តន្ទាទោសទៅតាមផ្លូវច្បាប់ ចំណែកឯរថយន្តហ្វ័តរ៉ែនជឺរ ក៏ត្រូវបានសមត្ថកិច្ចខណ្ឌសែនសុខ យកទៅរក្សាទុករង់ចាំចាត់ការបន្តតាមនីតិវិធី ៕
ដោយ៖ជ្រោយពេជ្រ
