សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ កម្លាំងនគរបាលស្រុកពួក បានឃាត់ខ្លួនបុរសម្នាក់ បន្ទាប់ពីរូបភាពបានចងគុំនំជាមួយអតីតប្រពន្ធ និងឪពុកម្តាយក្មេក បានទិញសាំងប្រុងដុតផ្ទះសម្លាប់មនុស្ស តែត្រូវអ្នកជិតខាងជួយអន្តរគមន៍ទាន់ពេលវេលា។ ហើយក្រោយសមត្ថកិច្ចជំនាញ សាកសួរបញ្ចប់នីតិវិធី នៅថ្ងៃអាទិត្យទី២០ ខែមីនាឆ្នាំ២០២២នេះ បានបញ្ជូនខ្លួនជនសង្ស័យទៅកាន់សាលាដំបូងខេត្ត ដេីម្បីចាត់ការតាមច្បាប់។
ជនសង្ស័យឈ្មោះ រីក ទូរី ភេទប្រុស អាយុ ៣៩ ឆ្នាំ រស់នៅភូមិថ្នល់ដាច់ ឃុំថ្មពួក ស្រុកថ្មពួក ត្រូវបានសមត្ថកិច្ចឃាត់ខ្លួនបាននៅវេលាម៉ោង ៧យប់ថ្ងៃទី១៨ ខែមីនា ឆ្នាំ២០២២ នៅចំណុចភូមិវត្តចាស់ ឃុំថ្មពួក ស្រុកថ្មពួក ខេត្តបន្ទាយមានជ័យ។ ចំណែកជនរងគ្រោះឈ្មោះ ជួប លាភ ភេទប្រុស អាយុ ៦៩ ឆ្នាំ រស់នៅភូមិវត្តចាស់ ឃុំថ្មពួក ស្រុកថ្មពួក ខេត្តបន្ទាយមានជ័យ។
បេីយោងតាមប្រភពព័ត៍មានពីស្នងការដ្ឋាននគរបាលខេត្តបន្ទាយមានជ័យ ដែលទទួលបាននៅថ្ងៃអាទិត្យទី២០ ខែមីនា ឆ្នាំ២០២២នេះថា៖ ដោយសារតែបុរសរូបនេះ មានការអន់ចិត្តជាមួយប្រពន្ធ និងបានលែងលះគ្នាជាង ១ឆ្នាំមកហើយ តែខ្លួននៅមានចិត្តគុំកួន ប៉ងធ្វើឃាតប្រពន្ធ និងឪពុកម្តាយក្មេក ដោយសម្តែងគំនុំនោះ ។ នៅពេលយប់ស្ងាត់ រូបគេដឹងថាប្រពន្ធ និងឪពុកម្តាយក្មេក កំពុង ស្ថិតនៅក្នុងផ្ទះទាំងអស់គ្នា ក៏បានទិញសាំងចំនួន ៣ដបទឹកសុទ្ធ និងចន្លុះ ១ដើម; ដែកកេះចំនួន១ យកទៅចាក់ស្រោចបង្កាត់ភ្លើងដុតបន្ទះក្ដារឈើមូល ១កំណាត់ ប្រវែងកន្លះម៉ែត្រ ដេីម្បីដុតផ្ទះប៉ងសម្លាប់មនុស្ស ប៉ុន្តែតែត្រូវបានអ្នកភូមិ ឃេីញនាំគ្នាជួយទាន់ពេលវេលា និងសង្គ្រោះអតីតប្រពន្ធ រួមនិងឪពុកម្តាយក្មេក ចេញផុតពីគ្រោះថ្នាក់មួយនេះ។
ប្រភពដដែលបន្តថា ក្នុងហេតុការណ៍នោះដែរ អតីតឪពុកម្ដាយក្មេក ក៏បានចេញមកប្រតាយប្រតប់យ៉ាងខ្លាំង ជាមួយជនសង្ស័យផងដែរ ប៉ុន្តែដោយសារតែកម្លាំងគាត់(អតីតឪពុកម្ដាយក្មេក) ខ្សោយជាងបាននាំគ្នារត់ចូលទៅបន្ទប់ ក្នុងផ្ទះបិទទ្វារ។ ភ្លាមនោះជនបង្កបានលោតធាក់ទ្វារ និងជញ្ជាំងផ្ទះ រួចបានយកសាំងចំនួនមួយដបទឹកសុទ្ធ ចាក់ស្រោចទៅលើជញ្ជាំងផ្ទះ និងស្រែកគំរាមថា នឹងដុតសម្លាប់ទាំងអស់។ តែមិនបានសម្រេចដោយសារកូន និងអ្នកជិតខាងទៅជួយឃាត់ទាន់ និងចាប់ឃាត់ខ្លួនជនសង្ស័យបាន ហើយប្រគល់ទៅឱ្យសមត្ថកិច្ចយកទៅសាកសួរ និងចាត់ការតាមច្បាប់។
ក្រោយឃាត់ខ្លួនជនសង្ស័យ បានឆ្លើយសារភាពថា៖ ខ្លួនក៏រងគ្រោះដែរ ដោយសារគ្រួសារនេះ បង្ខំឱ្យចាកចេញ ហើយខ្លួនមិនអត់ទ្រាំថា ត្រូវតែសងសឹកមិនបាន ទើបបញ្ចេញកំហឹងបែបនេះ តែម្ដង។
បច្ចុប្បន្នជនសង្ស័យ ត្រូវកម្លាំងនគរបាលស្រុកថ្មពួក បញ្ជូនមកការិយាល័យព្រហ្មទ័ណ្ឌកម្រិតធ្ងន់ នៃស្នងការដ្ឋាននគរបាលខេត្តបន្ទាយមានជ័យ ដើម្បីកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕
ដោយ៖សហការី
