ពលរដ្ឋរិះគន់ក្រុមហ៊ុនមួយដាក់លូចោលកណ្តាលផ្លូវបង្កគ្រោះថ្នាក់ចរាចរណ៍ដល់អ្នកដំណើរ

ខេត្តបន្ទាយមានជ័យ៖ បុរសម្នាក់បានជួបគ្រោះថ្នាក់ចរាចរណ៍បង្កឱ្យរងរបួសជើងម្ខាងនិងម៉ូតូរងការខូចខាតមួយកំណាត់មុខដោយសារតែជិះម៉ូតូបុកលូរបស់ក្រុមហ៊ុនមួយដែលទុកចោលគ្មានដាក់ស្លាកសញ្ញាចរាចរណ៍ឬភ្លើងបំភ្លឺនៅចំណុចផ្លូវបេតុងមួយក្នុងភូមិមិត្តភាពសង្កាត់ប៉ោយប៉ែត កាលពីយប់ថ្ងៃទី២២ ខែមីនា ឆ្នាំ២០២២។

   ជនរងគ្រោះឈ្មោះលី វុទ្ធា អាយុ៣៨ឆ្នាំជាសន្តិសុខសណ្ឋាគារ និងមានទីលំនៅក្នុងភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត។  ជនរងគ្រោះរងរបួសបាក់ភ្លៅខាងស្តាំ គាត់បើកបរម៉ូតូម៉ាកហុងដា សេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខបន្ទាយមានជ័យ១F-៥០៤៦ក្នុងទិសដៅពីជើងទៅត្បូង លុះមកដល់ចំណុចកើតហេតុដោយសារមេឃងងឹតក៏បានបុកលូដែលក្រុមហ៊ុនមួយទុកចោលកណ្តាលផ្លូវបណ្តាលឱ្យរងរបួសតែម្តង។ជនរងគ្រោះត្រូវបានអ្នកស្រុកនាំគ្នាលើកដាក់លើឡំប្រឺតាដឹកយកទៅមន្ទីរពេទ្យបង្អែកក្រុងប៉ោយប៉ែត ខណៈម៉ូតូរងគ្រោះត្រូវបានសមត្ថកិច្ចនាំយកទៅរក្សាទុកជាបណ្តោះអាសន្ននៅប៉ុស្តិ៍រដ្ឋបាលសង្កាត់ប៉ោយប៉ែត។  

ដោយឃើញហេតុផលផ្ទាល់ភ្នែកនេះអ្នកស្រុកបានលើកឡើងខឹងនឹងក្រុមហ៊ុនដោយនាំគ្នានិយាយថាមិនគួរដាក់លូចោលកណ្តាលផ្លូវគ្មានភ្លើងបំភ្លឺឬសញ្ញាចរាចរណ៍ដូចនេះឡើយ។អ្នកស្រុកលើកឡើងទៀតថា ករណីបែបនេះមិនមែនជាលើកទី១ទេ កន្លងមកក៏មានយានយន្តជួបគ្រោះថ្នាក់ស្មានមិនដល់បែបហ្នឹងជាញឹកញយផងដែរ។អ្នកស្រុកបានសំណូមពរដល់ក្រុមហ៊ុនដែលស្ថាបនាឬជួសជុលផ្លូវនានានៅក្រុងប៉ោយប៉ែតក៏ដូចជាកន្លែងផ្សេងៗមេត្តាដាក់សញ្ញាចរាចរណ៍ឲ្យបានត្រឹមត្រូវផងដើម្បីបញ្ចៀសកុំឲ្យកើតមានគ្រោះថ្នាក់ចរាចរណ៍ជាយថាហេតុដូចករណីខាងលើទៀត។

   ជំុវិញករណីនេះខាងក្រុមហ៊ុនដែលជាប់ពាក់ព័ន្ធមិនអាចរកកាបំភ្លឺបានទេព្រោះមិនស្គាល់លេខទូរស័ព្ទ ខណៈដែលអាជ្ញាធរភូមិមិត្តភាពអះអាងថាមិនស្គាល់ឈ្មោះក្រុមហ៊ុនខាងលើទេនិងប្រាប់ថាលូដែលគេដាក់ចោលកណ្តាលផ្លូវនេះកើតមានមួយរយៈមកហើយ។

 ពលរដ្ឋអ្នកធ្វើដគណើរលើកឡើងថាក្រុមហ៊ុនដែលសាងសង់ផ្លូវបេតុងតភ្ជាប់ពីផ្លូវបេតុងចាស់ត្រង់ចំណុចគ្រោះថ្នាក់ចរាចរណ៍ខាងលើគ្មានទំនួលខុសត្រូវក្នុងការដាក់ប្រពន្ធលូតាមបណ្ដោយផ្លូវធ្វើឲ្យមានគ្រោះថ្នាក់ដល់ពលរដ្ឋ៕

ដោយ ៖ វណ្ណា