សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសពីរនាក់បានជិះម៉ូតូមួយគ្រឿងឌុបគ្នាយ៉ាងលឿនមិនប្រយ័ត្នបានជ្រុលទៅបុករថយន្តស៊េរីទំនើប Land Cruiser ដែលកំពុងបត់ឆ្លងផ្លូវចូលបុរីហាយធិច លុច្សសារី ពេញទំហឹង បណ្ដាលឱ្យរងរបួសធ្ងន់និងស្រាល។ហេតុការណ៍នេះកើតឡើងកាលពីវេលាម៉ោង៩និង៤០នាទីយប់ ថ្ងៃពុធ ទី២៣ ខែមីនា ឆ្នាំ២០២២ ស្ថិតនៅតាមបណ្ដោយផ្លូវជាតិលេខ១ ត្រង់ចំណុចមុខបុរី ហាយធិច លុច្យសារី ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។
យោងតាមប្រភពពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់បើករថយន្តស៊េរីទំនើបម៉ាក Land Cruiser ពណ៌ស ពាក់ស្លាកលេខភ្នំពេញ2AQ -2382 តាមបណ្ដោយផ្លូវជាតិលេខ១ ក្នុងទិសដៅពីលិចទៅកើត ខណៈមកដល់ចំណុចកើតហេតុខាងលើក៏បានបត់ឆ្វេងបម្រុងចូលបុរីហាយធិច លុច្យសារី ដោយឆ្លងជិតផុតទៅហើយស្រាប់តែមានបុរសពីរជិះម៉ូតូម៉ាកហុងដាឌ្រីម ពណ៌ក្រហម ពាក់ស្លាកលេខ ព្រៃវែង1P-5185 ធ្វើដំណើរតាមបណ្ដោយផ្លូវជាតិលេខ១ពីកើតទៅលិចក្នុងល្បឿនយ៉ាងលឿន និងមិនប្រយ័ត្នក៏ជ្រុលទៅបុករថយន្ត Land Cruiser ចំទ្វារក្រោយផ្នែកខាងស្ដាំពេញទំហឹង បណ្ដាលឱ្យរថយន្តនិងម៉ូតូរងការខូចខាតយ៉ាងដំណំ រីឯបុរសម្នាក់ជាភាគីខាងម៉ូតូបោកក្បាលជាមួយរថយន្តនិងថ្នល់រងរបួសធ្ងន់ និងបុរសម្នាក់ទៀតជិះជាមួយរងរបួសស្រាល ។
ក្រោយកេីតហេតុ បុរសម្នាក់ដែលរងរបួសធ្ងន់ត្រូវរថយន្តសាមុយដឹកបញ្ជូនទៅសង្គ្រោះនៅឯមន្ទីរពេទ្យឯកជនភ្លាមៗ ចំណែកតៃកុងរថយន្ត Land Cruiser ក៏ត្រូវបានសមត្ថកិច្ចនាំខ្លួនយកទៅអធិការដ្ឋាននគរបាលខណ្ឌច្បារអំពៅ ចាត់ការតាមនីតិវិធី ។ ក្រោយមកទេីបសមត្ថកិច្ចជំនាញចរាចរណ៍ចុះមកធ្វេីការវាស់វែងយកម៉ូតូនិងរថយន្ត ទៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដេីម្បីដោះស្រាយគ្នានាពេលក្រោយ ៕
ដោយ ៖ ភារ៉ា ដង្កោ
