សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ មនុស្ស៦នាក់រងរបួសនិងលំនៅឋានប្រជាពលរដ្ឋចំនួន១៣៨ខ្នង រងនូវការខូចខាត ធ្ងន់ស្រាលក្នុងហេតុការណ៍ភ្លៀងលាយឡំជាមួយខ្យល់កន្ត្រាក់បក់បោកយ៉ាងខ្លាំង នៅយប់ថ្ងៃទី២៧ ខែមីនា ឆ្នាំ ២០២២ លើស្រុកចំនួន០៣ គឺ ស្រុកភ្នំស្រុក ថ្មពួកនិងស្រុកស្វាយចេក ។
នគរបាលមូលដ្ឋាន បានឲ្យដឹងថា៖នៅស្រុកភ្នំស្រុកយប់ថ្ងៃទី២៧ ខែមីនា ឆ្នាំ២០២២ មានលំនៅឋានប្រជាពលរដ្ឋ នៅភូមិតេជោសន្តិភាព (២២២២) ស្ថិតនៅក្នុងឃុំប៉ោយចារ ស្រុកភ្នំស្រុក បានរងការខូចខាតដោយខ្យល់កន្ត្រាក់ចំនួន១០៥ខ្នង ក្នុងនោះខូចខាតធ្ងន់ចំនួន៣៩ខ្នង (ធ្វើអំពីឈើចំនួន១៧ខ្នងនិងដែកចំនួន២២ខ្នង)និងសាលារៀន០១ខ្នង បង្កឲ្យមនុស្សចំនួន០៦នាក់(ស្រី)រងបួសស្រាល។
នគបាលមូលដ្ឋានបន្តថាៈស្រុកថ្មពួក ខូចខាតលំនៅឋានប្រជាពលរដ្ឋចំនួន២៥ខ្នង ក្នុងនោះខូចខាតធ្ងន់ចំនួន០៣ខ្នង នៅក្នុងភូមិគោកកឋិន ឃុំគោកកឋិន ស្រុកថ្មពួក ។ចំពោះស្រុកស្វាយចេក ចំនួន០៨ខ្នង ខូចខាតស្រាលនៅភូមិតាដួល ឃុំផ្គាំ ស្រុកស្វាយចេក ។
ប្រភពដដែលបានបញ្ជាក់ថា៖ ដោយមើលឃើញពីផលប៉ះពាល់ផ្ទះពលរដ្ឋលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ នៅព្រឹកថ្ងៃទី២៨ ខែមីនា ឆ្នាំ ២០២២បានបញ្ជា កងកម្លាំងនគរបាល នៃស្រុកទាំង០៣ សហការជាមួយអាជ្ញាធរមូលដ្ឋានបានចុះជួយរុះរើរៀបចំនិងជួសជុលលំនៅឋានប្រជាពលរដ្ឋឡើងវិញ ផងដែរ៕
ដោយ ៖ វណ្ណា
